Read Talaud DARALO 51 Bible Online

DARALO 51 - Talaud bible

DARALO 51

¹Su piaṛṛa'u mangangantari. Daralo niarangngi Daud

²napawe i tou nitaguanni Nabi Natan ana waugu sinumandaga si Batsyeba.

³Akkanaawe i ya'u oh Ruata, ana waugu I'o sidutu marangngu, pappasawe rosa'u ana waugu darangngu-Nu apan wahewalla.

⁴Ukkasawe al᷊awo'u al᷊al᷊eo; waresiwe i ya'u wuassu rosa'u.

⁵Ana waugu i ya'u mangnga'u manga pasasal᷊a'u, rosa'u sidutu nanaungangku.

⁶Su saruan-Nu, tumba'u su saruan-Nu i ya'u narosa, wuṛṛu a'olaangku pallal᷊aghu a'ellehan-Nu lal᷊eo. Ne suṛṛinone I'o makkuumangku, naṛṛinote apulu-Nu.

⁷Mangke atonna, i ya'u lal᷊eo ro'en i ya'u niasungkangnga, wuṛṛu naṛṛaitannu rosa ro'en ta'e su illoṛṛo.

⁸I'o maddoronga atatul᷊iddu naungnga; loṛṛoiten naungku ringannu apande-Nu.

⁹Ukkasawe i ta'u, ne i ya'u sarun mawaresi; ukkasawe i ya'u, ne i ya'u sarun mabbiranne wuassu sangarenna.

¹⁰Wala'ewe i ya'u maddaringikka watti'u al᷊al᷊uassa, tadea'u naungnga apan niṛṛimunsang-Ngu indi lumala'a apia.

¹¹Tal᷊iuraawe hati-Nu wuassu manga rosa'u, wuṛṛu pappassawe al᷊awo'u pasasal᷊a'u.

¹²Olaawe naungku apan tutune, oh Ruata, limbakuewe naungku ringannu atatohassa apan masabbare.

¹³Ariewe mandamme'u wuassu saruan-Nu, wuṛṛu ariewe mangal᷊appa gaṛṛaho-Nu apan susi wuassi ya'u.

¹⁴Olaawe i ya'u mal᷊uassa apia ana waugu asasal᷊amatta wuas-Si'o, i ya'u onggol᷊ewen naungnga apan sidutu matuṛutta Si'o.

¹⁵Ne i ya'u sarun mangaṛa'u parenta-Nu su taumata marosa, tadea'u i mangitou mabelengnga ringan-Nu.

¹⁶Liuaawe i ya'u wuassu papate, oh Ruata mananal᷊ama'u, ne ringannu lullala'a i ya'u sarun mamasingkattu atatul᷊iddu MAWU.

¹⁷Oh MAWU, ontol᷊ewe i ya'u mabbisara, ne i ya'u sarun maddalo Si'o.

¹⁸I'o maddirin sasamba laṛṛatanna; unnu wisara i ya'u nangonggolu sasamba itattambuna, ne I'o maddiri.

¹⁹Sasamba su Ruata uddewe naungnga apan natuno, naungnga matuṛṛutta wuṛṛu pia awawal᷊u tawe itol᷊ang-Ngu.

²⁰Oh Ruata, paal᷊iattaawe apapia-Nu su Sion, parisiṛṛa'e apia manga darandungu Yerusalem.

²¹Ne I'o sarun manengkamma sasamba apan natataṛṛino, sasamba itattambunna wuṛṛu sasamba apan nasuungnga sapi esakka sarun olaanna sasamba su wowon mezbah-Nu.