Read Talaud DARALO 57 Bible Online

DARALO 57 - Talaud bible

DARALO 57

¹Su piaṛṛa'u mangangantari. Tumuṛṛuttu antari: Imbaṛṛangnga manggohakka. Daralo wuassi Daud, sutempo i tou tinumal᷊anga su loṛṛangnga mallinda'i Saul.

²Akkanaawe i ya'u, oh Ruata, akkanaawe i ya'u, ana waugu ete Si'o i ya'u uatillumma. Sulal᷊ummu al᷊ungngu papaiddu MAWU i ya'u uaimbuni, na'oman sara tandi'a mabbal᷊i mal᷊enakka.

³I ya'u sussal᷊annde su MAWU Apan Atanggaṛṛanne, su Ruata apan mammanara ana waugu i ya'u.

⁴Wuassu surga i Tou sinumimbakka wuṛṛu nanal᷊amatta si ya'u; i Tou namaddon manga taumata apan mangngallanga si ya'u. I Tou sarun mapal᷊iatta'a manungku i Tou ual᷊ua'adda si ya'u, wuṛṛu sidutu marangngu si ya'u.

⁵I ya'u nipangaloannu seetta, i mangitou naal᷊ihidda singa u'inassa taumata. Isin mangitou naal᷊ihidda tambakka wuṛṛu anaanna, lilan mangitou naal᷊ihidda hal᷊ele maṛṛoro.

⁶Oh Ruata, pal᷊iatta'e awawantu-Gu su langitta, wuṛṛu awasa-Nu su ahewallu runia.

⁷See'u mantaingngu sedda si ya'u, wuṛṛu nangaddio'a naungku. I mangitou naal᷊i loṛṛangnga su amatangku, arawe i mangitou sassane nawontolla sulal᷊umme.

⁸I ya'u mangimanna atonna, oh Ruata, i ya'u mangimanna atonna, i ya'u mangantarite wuṛṛu maddalo Si'o.

⁹Ei pabbangunte, niawa'u! Ei apu'ote, gambus wuṛṛu kecapi! I ya'u sarun mamu'o matannallo.

¹⁰MAWU, i ya'u maadiangkamanna Si'o, suwallatu manga walahanna. I ya'u maapulu mangantarin daralo Si'o suwallatu manga taumata.

¹¹Ana waugu darangngu-Nu wahewalla naddatingngu langitta, wuṛṛu apapia-Nu naddatingngu winabbawa.

¹²Oh Ruata, pal᷊iatta'e awawantu-Gu su langitta, wuṛṛu apapia-Nu su ahewallu runia.