Read Talaud DARALO 60 Bible Online

DARALO 60 - Talaud bible

DARALO 60

¹Su piaṛṛa'u mangangantari. Tumuṛṛuttu antari: Wunga hal᷊ohomma tatialane. Daralo al᷊aṛṛa'a wuassi Daud,

²sutempo i tou namangalo taumatan Aram-Mesopotamia wuṛṛu taumatan Aram-Zoba, wuṛṛu sutempo i Yoab napul᷊e wua namaddon 12.000 su atoune taumatan Edom su Wawal᷊annu Asin.

³I'o nanol᷊a'i yami, oh Ruata, wuṛṛu namalan kami niawaddo.

⁴I'o nangio'u runia na'oman sara niṛṛumattanga; sul᷊eaawe apa apan napapesanga, ana waugu runia niumio'a.

⁵Niwala-Nu al᷊aṛṛanang-Ngu naṛṛiaannu asasusa mawakkata; i yami sussasendekka ere taumata wu'anna.

⁶I'o napanaungngu manga taumata ma'imanna, tadea'u i mangitou mal᷊iu wuassu ṛuumanna.

⁷Sal᷊amatewe i yami ringannu taṛṛino-Nu, simbaṛṛewe aal᷊iomanni yami, tadea'u manga taumata apan arangnguan-Nu iapasal᷊amatta.

⁸Wuassu atatanaan-Ne apan susi Ruata nabbisara, “I ya'u lumala'e wuṛṛu mattahiate leta'u Sikhem; Wawal᷊annu Sukot sarun Ta'u iundi.

⁹Gilead wuṛṛu Manasye uddewe pussaa-U, Efraim araposa waja-U, wuṛṛu Yehuda ta'innu araratuang-Ku.

¹⁰Arawe Moab uddewe tampa pangukkasanna ledda-U; I Ya'u lumala'a ana waugu auntungu Filistea. Si Edom Ta'u tinuntungannu sapatu-U maola'a tatiala manungku i tou pussaa-U.”

¹¹Isai sarun mangapi'u watukku Edom? Isai mangehetta si ya'u watukku soa pia tatandange watu udde?

¹²Oh Ruata, I'o talawe tumantalonga suadio'a ringanni yami? I'o talawe inai suadio'a ringannu tantaran kami?

¹³Ontol᷊ewe i yami su saruannu seetta, ana waugu sasumbalan taumata tawe gunane.

¹⁴Suadio'a ringannu Ruata, i ite sarun matohassa wuṛṛu waṛṛani, Ete i Tou apan namaddon seetti ite.