Read Talaud DARALO 63 Bible Online

DARALO 63 - Talaud bible

DARALO 63

¹Daralon Daud, sutempo i tou uatana'a su wadda'u Yehuda.

²Oh Ruata, ete I'o Ruata'u, i ya'u maddea'a wuṛṛu laṛṛintulu'u I'o. Naal᷊ihidda leta'a maṛṛasa maroun kua'e, aroddi lai i ya'u maroun MAWU.

³Wala'ewe i ya'u ual᷊ellega Si'o su Wal᷊en-Nu, wuṛṛu ma'ellega atatohassa wuṛṛu awawantu-Gu.

⁴Darangngu-Nu maaregganne wuassu wiakka, ana waugu udde i ya'u maddalo Si'o.

⁵Su al᷊o'engngu pabbiaṛṛangku i ya'u maadiangkamanna Si'o; lima'u niwatte Si'o lapiddu u'al᷊iomanna.

⁶I ya'u maddalo Si'o ringannu lulluassa lullala'a, ana waugu I'o namatu'a niawa'u naal᷊ihidda ringannu anna matemangnga.

⁷Sutempo ual᷊allowanga sutampa atatiil᷊anna, i ya'u uanaungnga Si'o; su al᷊o'engngu ṛabbi i ya'u maṛṛigiddu MAWU,

⁸ana waugu ete I'o niumontolla si ya'u; sual᷊ungngu papaiddu MAWU i ya'u mangngantarin al᷊al᷊uassa.

⁹I ya'u uaṛṛaggo Si'o ma'ikka-ikkata, lima-Nu ua'ehetta si ya'u.

¹⁰Arawe manga taumata apan mamate si ya'u sarun sumossokka su runian taumata nate.

¹¹I mangitou sarun nate sulal᷊ummu pangalo, wuṛṛu mabbal᷊i inassu winatangnga mal᷊aṛṛaga.

¹²Ratu sarun lumuassa ana waugu aontollu Ruata; taumata apan nassalun arannu Ruata lullala'a, arawe moṛṛongngu taṛṛa wahia sarun sappinganna.