Read Talaud DARALO 66 Bible Online

DARALO 66 - Talaud bible

DARALO 66

¹Su piaṛṛa'u mangangantari. Sambau antari. Lalluasse hunan Duata, ei ahewallu runia!

²Pangantarite wuṛṛu pamantugge aran-Ne, wantuhete i Tou ringannu manga daralo.

³Wal᷊oa'e su Ruata, “Atonna mangke maatiangnga inolaan-Nu! Seetta uasuṛṛubbawa Si'o ringannu atata'utta, ana waugu tumaniten wahewalla taṛṛino-Nu.

⁴Ahewallu runia niumal᷊intudda massubba Si'o, i mangitou mangngantari maddalo Si'o.”

⁵Rantate wuṛṛu pa'ellege inolaannu Ruata, mangke maatiangnga manga manara-Ne suwallatu taumata!

⁶Tahal᷊oanga niwal᷊u-Ne nabbal᷊i leta'a mamara, al᷊amonan kami nilumewessa ringannu u'amattu ledda. Ne i yami lulluassa ana waugu inolaan-Ne.

⁷I Tou uaparenta ringannu matohassa saran mal᷊annu-l᷊annu. Manga walahanna rariagan-Ne, tadea'u mamangalo tawe mapamunga su saruan-Ne.

⁸Paddalote Ruatan kami, ei manga walahanna, intul᷊ia'e daralonu si Tou!

⁹I Tou buatte nallu'adda si yami tadea'u sidutu wiakka, wuṛṛu tawe namalan kami manawo.

¹⁰Oh Ruata, I'o buatte nanal᷊u'atta si yami naal᷊ihidda taumata mannassala sal᷊a'a su putungnga.

¹¹I'o namalan kami nul᷊ussa su sedda, wuṛṛu I'o nangonggolu winabbawa apan mawakkata.

¹²I'o namalang kami lakkindannu seetta; i yami tinumumbe manawangnga wuṛṛu putungnga. Arawe orassa indi i yami buatte niapiddu MAWU watukku tampa apan masuwukka.

¹³I ya'u sarun mangapiddu sasamba itattambunna su Wal᷊en-Nu wuṛṛu manipussa paaire'u Si'o,

¹⁴paaire apan ta'u niwisara sutempo i ya'u sulal᷊ummu asasusa.

¹⁵I ya'u mangonggolu sasamba Si'o sasamba itattambunna wuassu winatanga apan nipile, ambinga domba wuṛṛu sapi esakka, timbulle sussal᷊oi watukku langitta.

¹⁶Rantate wuṛṛu paddaringikke, ei anambon taumata apan ma'imanna, i ya'u sarun mabbatti'u sarangkanambone apan niola'u Ruata si ya'u.

¹⁷I ya'u buatte sinumal᷊ande naiontola si Tou; orassa indi i ya'u mangantariten daralo si Tou.

¹⁸Unnuwisara i ya'u mal᷊uassa maṛingiddu al᷊al᷊eo, MAWU sarun tawe maddaringikka.

¹⁹Arawe Ruata naddaringikka si ya'u, i Tou nangonggolu darorongku.

²⁰I ya'u maddalo Ruata ana waugu i Tou tawe nanol᷊a'u al᷊iomangku, wuṛṛu tawe illol᷊one mandangngu si ya'u.