Read Talaud DARALO 69 Bible Online

DARALO 69 - Talaud bible

DARALO 69

¹Su piaṛṛa'u mangangantari. Tumuṛṛuttu antari: Wunga hal᷊ohomma. Wuassi Daud.

²Sal᷊amatewe i ya'u, oh Ruata, ana waugu ua'e sarate ullekka'u.

³I ya'u nal᷊ioṛṛo'a su lota apan mal᷊al᷊umma, tawe tampa pamaheṛṛanne. I ya'u nawul᷊ussa su ua'e apan mal᷊al᷊umma, nielekku lua'u ṛuabba.

⁴I ya'u mangngintul᷊i na'oman sara nallome wuṛṛu tonggol᷊angku namara. Mata'u maṛṛagete uaṛṛaddo sasumbalan Ruata'u.

⁵Taumata apan maddantingku tawe pinangiananne, mannamboanna wuassu uta'a su pua'u. Manga taumata matohassa maapulu mamate si ya'u; i mangitou namangalo si ya'u ringannu aal᷊uandaga. I ya'u niwata'a mamelengngu darotongnga apan tawe ta'u niaṛṛo.

⁶Oh Ruata, I'o masingkattu manga pasasal᷊a'u rosa'u tawe iawuni Si'o.

⁷Arie pabbala'a i ya'u mandantan asasili su manga taumata apan uaantimma Si'o, oh Ruata, Ruata Apan Lembontaṛṛino. Arie pabbala'a i ya'u mandantan lal᷊ela su manga taumata apan massubba Si'o oh Ruatan Israel!

⁸Ana waugu ete I'o i ya'u nilobbosasa, ana waugu I'o i ya'u niapasal᷊a.

⁹I ya'u nabbal᷊i ere taumata raho su manga tuṛṛangku, naal᷊ihidda ana'a uata'a su manga iaangku tuari'u.

¹⁰Ikka'u nahewalla ana waugu darangngu su Wal᷊en-Nu, manga al᷊uandagu taumata apan mallobbosa Si'o naṛṛia'a su waddangku.

¹¹I ya'u lulluai wuṛṛu nappuasa arawe i mangitou mangngadio'a si ya'u.

¹²I ya'u nalluṛṛen nasa karongnga tatialan lullal᷊o, arawe i mangitou mammasendekka si ya'u.

¹³I ya'u nabbal᷊i ipaal᷊umeme su tampa taumata uaammula, wuṛṛu antarin manga taṛṛa wu'anna su ola'u riri'u.

¹⁴Arawe i ya'u niumal᷊iomanna Si'o, oh MAWU, oh Ruata, simbaṛṛewe i ya'u sutempo apan mapia. Ontol᷊ewe i ya'u ana waugu darangngu-Nu apan wahewalla wuṛṛu ana waugu paddul᷊i-Nu.

¹⁵Arie pabbala'a i ya'u mawul᷊ussa sulal᷊ummu lota, sal᷊amatewe i ya'u wuassu manga taumata apan maddantingku wuṛṛu wuassu ua'e apan mal᷊al᷊umma.

¹⁶Arie pabbala'a i ya'u ielekku lua'u ṛuabba, wuṛṛu mawul᷊ussa su wantan tahal᷊oangnga ara'e ilabbinga sulal᷊ummu loṛṛangnga.

¹⁷Simbaṛṛewe i ya'u, oh MAWU, ana waugu I'o mapia wuṛṛu sidutu marangngu. Saileiwe i ya'u ana waugu wahewalle darangngu-Nu.

¹⁸Ariewe pa'imbuni wuassu allang-Ngu indi, ana waugu i ya'u massusa, paasaṛṛawutte mangontola si ya'u.

¹⁹Rantate panal᷊amatta si ya'u, pallosa'a i ya'u wuassu manga see'u.

²⁰I'o masingkatta aroddi i ya'u iapasal᷊a, lallobbosanna wuṛṛu aal᷊uandahanna, I'o naasilo anambon see'u.

²¹Aal᷊uandaga naadio'a naungku, wuṛṛu i ya'u tate antimma. I ya'u maddea'a darangngu, arawe tawe gunane, i ya'u maddea'a mallal᷊imbata, arawe i ya'u tawe naasomba.

²²Ewe'e lai i ya'u nionggol᷊annu racunna iapaanna; sutempo marou, i ya'u nionggol᷊annu cuka niapa'inumma.

²³Wala'e sal᷊iwangngi mangitou mandantan asasilaka, wuṛṛu maola'a sedda su manga rahon mangitou.

²⁴Wala'e matan mangitou mawuta wuṛṛu liuddi mangitou sidutu lome.

²⁵Emaa'e asasa'u-Nu si mangitou, wala'e i mangitou aemaannu asasa'u-Nu apan lukkenggama.

²⁶Wala'e paddasananni mangitou mal᷊annaba, wuṛṛu manga rasanni mangitou taweddu matana'a.

²⁷Ana waugu i mangitou mammate taumata apan niṛṛuuman-Nu, wuṛṛu maggahatton manga taumata apan nisansaran-Nu.

²⁸Wala'e pasasal᷊an mangitou aatambanna anambone; arie i mangitou iapaṛṛino.

²⁹Wala'e aranni mangitou pappasanna wuassu wuken taumata wiakka; wuṛṛu tawe uawoṛetta sulal᷊ummu arannu taumata matul᷊idda.

³⁰Arawe i ya'u niallangnga wuṛṛu sussal᷊iomanna, watunnawe i ya'u oh Ruata, wuṛṛu sal᷊amatewe i ya'u.

³¹Ne i ya'u sarun maddalo Ruata ringannu antari, mamantuga si Tou ringannu antari adiangkamanna.

³²Udde lembon ipaapulun MAWU wuassu sasamba sapi, sasamba sapi wahewalla.

³³Naasilo udde, taumata niallangnga lulluassa, taumata apan massubba Ruata naungnge wahewalla.

³⁴Ana waugu MAWU naddaringikka taumata asiangnga; i Tou tawe namalan al᷊aṛṛanang-Nge sulal᷊ummu tattupanna.

³⁵Paddalote Ruata, ei langitta wuṛṛu runia, tahal᷊oangnga wuṛṛu anambon riadianna sulal᷊umme.

³⁶I Tou sarun manal᷊amatta Yerusalem wuṛṛu maparisikku apia manga soan Yehuda. Al᷊aṛṛana'u MAWU sarun mamanua poiaroddi; leta'a udde mabbal᷊i pussa'an mangitou.

³⁷Ana'a papapulunne sarun manahuanna; manga taumata apan marangngu MAWU sarun mamanua isudde.