Read Talaud DARALO 71 Bible Online

DARALO 71 - Talaud bible

DARALO 71

¹Ete Si'o i ya'u uatillumma, oh MAWU, arie pabbala'a i ya'u pansilianna.

²Pallosaawe i ya'u, ana waugu I'o matul᷊idda, daringiṛṛewe wuṛṛu sal᷊amatewe i ya'u.

³Ariaditewe si ya'u ere wowone watu tampa'u uatana'a, apan sidutu mal᷊uassa pattudanne. Ana waugu I'o buatte nakkawessa manal᷊amatta si ya'u, Ete I'o tampa i ya'u uatillumma wuṛṛu uasirungnga.

⁴Oh Ruata'u, liuaawe i ya'u wuassu taumata lal᷊eo, wuassu taṛinon manga taumata wal᷊iu wuṛṛu maṛṛagissa.

⁵Ana waugu ete I'o aantimangku, oh MAWU, MAWU, i ya'u mangimanna Si'o ro'en i ya'u ta'e dario'a.

⁶Su al᷊o'engngu pabbiaṛṛangku i ya'u uaunsandakka Si'o, I'o ual᷊u'adda si ya'u ro'en i ya'u niasungkanga ne i ya'u sidutu maddalo si'o.

⁷Pabbiaṛṛangku nabbal᷊i tul᷊ada su awadaalla, ana waugu ete I'o pattillummangku apan matohassa.

⁸I ya'u sidutu maddalo Si'o, su al᷊o'engngu allo ta'u iapasingkatta awawantu-Gu.

⁹Arie I'o mandamme'u sutempo i ya'u timmadete ariewe pantantanga'a i ya'u napawe atatoha'u nasuete,

¹⁰ana waugu manga see'u maggahatto'u, manga taumata apan maapulu mamate si ya'u naammule.

¹¹Unni mangitou, “I Tou nitantangngu Ruata; wette i ite mangenggenna wuṛṛu manametta si tou, ana waugu tateddu manal᷊amatta si tou.”

¹²Ariewe I'o marau wuassia'u, oh Ruata, Ruata'u pal᷊ihakke mangontola si ya'u.

¹³Wala'ewe manga taumata apan mammangalo si ya'u, pansilianna wuṛṛu pateanna. Wala'ewe taumata apan maapulu manilaka si ya'u ial᷊iwune wuṛṛu papal᷊iwutannu asasusa.

¹⁴Arawe i ya'u sidutu uaantimma Si'o, wuṛṛu aatambanna anambone maddalo Si'o.

¹⁵Su al᷊o'engngu allo i ya'u mabbatti'u manga inolaan-Nu apan matul᷊idda, wuṛṛu asasal᷊amatta wuas-Si'o apan tawe iareengnga.

¹⁶I ya'u maddalo inolaan-Nu apan matohassa, oh MAWU Ruata, ta'u iapasingkatta atatul᷊iddu MAWU, tumba'u atatul᷊iddu MAWU sassane.

¹⁷Oh Ruata, I'o mangangaṛa'a si ya'u ro'en i ya'u ta'e dario'a, naddatingngu orassa indi ta'u iwabbatti'a manara-Nu apan maatiangnga.

¹⁸Oh Ruata, i ya'u ariewe pattantanga'a, ma'oman sara i ya'u matimmade wuṛṛu owananna, tadea'u i ya'u mapabbatti'u taṛino wuṛṛu atatohan-Nu su anambon papapulunna apan addantane.

¹⁹Oh Ruata, atatul᷊iddu nappatakku langitta; tumaniten wahewalla manga inolaan-Nu; isai wotongnge maasul᷊ungnga Si'o?

²⁰I'o nangonggola si ya'u manambo asasusa mawakkata, arawe I'o sarun mamelengngu ikka'u wuṛṛu mamangunna si ya'u wuassu labbinga.

²¹I'o sarun ma'ola'a si ya'u lembon aadatanna, wuṛṛu maminalatta si ya'u apia.

²²I ya'u maddalote Si'o, ringannu gambus, ana waugu I'o mapia, oh Ruata'u. I ya'u mangantariten daralo Si'o ringannu kecapi, oh Ruata susin Israel.

²³I ya'u lullala'a ringannu lulluassa, lapiddu mangngantarin daralo Si'o. Wadangku mangngantari ringannu lulluassa, ana waugu I'o buatte nanal᷊amatta si ya'u.

²⁴Su al᷊o'engngu allo sarun ta'u iwatti'a atatul᷊iddu MAWU, ana waugu manga taumata maapulu manilaka si ya'u buatte niawaddo wuṛṛu nipansilianna.