Read Talaud DARALO 72 Bible Online

DARALO 72 - Talaud bible

DARALO 72

¹Wuassi Salomo. Oh Ruata, tantiroa'e tita-Nu su ratu, onggol᷊a'e atatul᷊iddu MAWU su ratu.

²Antimanna I'o makkuungngu al᷊aṛṛanang-Ngu tumuṛuttu tita, wuṛṛu ma'ola'a taumata niallangnga ringannu atatul᷊idda.

³Antimanna wanuan kami masunge matahul᷊andimma, wuṛṛu pia atatul᷊idda su ahewallu walahanna.

⁴Antimanna ratu manahekka manamba'a tumanangnge asiangnga, mantul᷊ungu manga taumata asiangnga wuṛṛu mamate manga mangangallangi mangitou.

⁵Antimanna i tou sidutu uata'a maṛṛawa mappulunna, tantal᷊anna pia matannallo wuṛṛu wul᷊anna.

⁶Antimanna i tou ere uranna apan nangansalla su wadda'a, naal᷊ihidda uranna masassaga apan nangammo manga wawail᷊anna.

⁷Antimanna atatul᷊idda aatambanna su al᷊o'engngu tempo wuṛṛu paa'ala mannambo su al᷊o'engngu ta'e pia bul᷊anna.

⁸Araratuanne sarun mahewalla wuassu tahal᷊oangnga maddatingu tahal᷊oangnga, uawannada wuassu ra'i maddatingu waṛṛata.

⁹Tumana'u wadda'a sarun massuṛṛubawa si tou wuṛṛu seetta umal᷊intudda su saruannu leddane.

¹⁰Manga ratun Tarsis wuṛṛu manga taṛṛanusa sarun mangapiddu sasamba si tou. Manga ratun Arab wuṛṛu Etiopia nirumanta uaapiddu aonggolla.

¹¹Anambon ratu sarun umal᷊intudda su saruanne, al᷊awo'u walahanna mabbal᷊i allangnge.

¹²Ana waugu i tou namallossu taumata niallangnga apan tawe maal᷊ore, wuṛṛu taumata asiangnga apan sussal᷊ande si tou.

¹³I Tou u'akkannu taumata asiangnga wuṛṛu taumata susa, wuṛṛu nanal᷊amatta wiakku taumata awussa.

¹⁴I Tou namallosi mangitou wuassu pangangallanga wuṛṛu araṛagissa, ana waugu wiakki mangitou tumaniten maarega si tou.

¹⁵Sal᷊amatte si tuangnga ratu! Antimanna si tou ionggolla wul᷊awanna wuassu Arab. Antimanna i tou ial᷊iomanna suapan tempo wuṛṛu sidutu daringiṛṛanna.

¹⁶Antimanna ganduma lumambalanna su ahewallu wanua, wuṛṛu manga wuidde napenen hessin sasuanna. Antimanna letange masuwukka ere Panenteannu Libanon, wuṛṛu tumana'u soane aatambanna naal᷊ihidda nannal᷊o su wadda'a.

¹⁷Antimanna arannu ratu sidutu nanaunganna saran mal᷊annu-l᷊annu, wuṛṛu tumelengke saran matannallo ta'e pia. Antimanna manga walahanna madoronga al᷊amatanna ere i tou, wuṛṛu anambon taumata mannagone lal᷊umanna'a.

¹⁸Daralo su MAWU, Ruatan Israel! Tumba'u i Tou apan ma'ola'a inolaanna maatiangnga.

¹⁹Daralo su aran-Ne apan mawantuga saran mal᷊annu-l᷊annu; antimanna ahewallu runia mapenen awawantu-Ge! Ariaddite aroddi. Amin!

²⁰Nuddusse manga aal᷊iomanni Daud, ana'i Isai.