Read Talaud DARALO 74 Bible Online

DARALO 74 - Talaud bible

DARALO 74

¹Antari tatantiro Asaf. O Ruata, sarangkal᷊o'engnge I'o manantangngi yami? Anio I'o sidutu massa'u al᷊aṛṛanang-Ngu sassane?

²Naungewe al᷊aṛanang-Ngu apan nipile-Nu ro'en dorone, walahanna apan nipallossu MAWU tadea'u maola'a pussa'a-Nu. Naungewe Wuiddu Sion, apan niolang-Ngu tampa atatanaan-Nu.

³Rea'ete tampa apan nallambe ete manga tuidda; al᷊awo'a su wal᷊e-Nu buatte niṛṛimunsa'u seetta.

⁴Manga seen-Nu mangngintul᷊i su wal᷊e-Nu, wuṛṛu namasi'u manga waneṛṛa auntunganna isudde.

⁵I mangitou naal᷊ihidda mananuwanga alu apan mammal᷊iunga, ipannuwanga manga aaluanna su mahurangnge.

⁶Anambon alu ni'uitta niṛṛimunsa'i mangitou ringannu wal᷊iunga wuṛṛu darupa.

⁷I mangitou nanoṛṛobba Wal᷊en-Nu na'oman sara nasue; wuṛṛu nandal᷊eo tampa passubbanna Si'o.

⁸I mangitou maapulu mapasuṛṛubbawan kami, wuṛṛu nanoṛṛobba anambon tampa patataṛamawuanna su wanua indi.

⁹Manga nabi wuṛṛu manga al᷊aṛṛindu'a tate iasilo apia, wuṛṛu tawe saran sangkatou masingkatta maddatingngu tingngera olangnge arendi.

¹⁰Maddatingngu tingngera, oh Ruata, seetta mangngeetta Si'o? Sarangkal᷊o'engnge i mangitou mallobbossa aran-Nu?

¹¹Anio I'o tate mantul᷊ungngi yami? Anio I'o naabul᷊in kami?

¹²Ro'en panattaṛṛanne tumba'u I'o ratu'u, oh Ruata, tumba'u I'o apan nanal᷊amatta si yami.

¹³Ringannu atatohassa apan wahewalla I'o nama'a tahal᷊oangnga, wuṛṛu namesangnga puan manga naga su tahal᷊oangnga.

¹⁴I'o nakkimunsa'a manga puan Lewiatan wuṛṛu i tou niola'a inassu mamanuan wadda'a.

¹⁵I'o napa'elekku al᷊imatan kua'e wuṛṛu sal᷊ukka; sal᷊ukka apan wahewalla niapamara-Nu.

¹⁶I'o apan nandiadi allo wuṛṛu ṛabbi, wuṛṛu nangatokku tampan matannallo wuṛṛu wul᷊anna.

¹⁷I'o nanantunnu manga passarannu runia, na'ola'a tempon paddissa wuṛṛu uranna.

¹⁸Naungete ereapa seetta mallobbossa Si'o, oh MAWU, manga walahanna apan tawe maillal᷊a Si'o mangngadio'a aran-Nu.

¹⁹Arie panantillu al᷊aṛṛanang-Ngu apan tawe maal᷊ore su liman seetta apan maṛṛagissa. Arie sarangkal᷊o'engnge maabul᷊in asasusan al᷊aṛṛanang-Ngu.

²⁰Naungete paaire apan niolang-Ngu si yami, ana waugu taumata ma'ola'a al᷊al᷊eo su al᷊awo'u tampa marandumma su runia indi.

²¹Arie mamalan taumata niallangnga pappansilianna, antimanna taumata su asasusa wuṛṛu asiangnga maddalo Si'o.

²²Darisikke oh Ruata, ṛawesa'e hatto-Nu! Ana waugu su al᷊o'engngu allo I'o lallobbosannu manga taumata apan tawe mangimanna Si'o.

²³Arie paabul᷊iane aintul᷊in manga seen-Nu, pagahahion manga seen-Nu apan mallannu ma'ikkatta!