Read Talaud DARALO 76 Bible Online

DARALO 76 - Talaud bible

DARALO 76

¹Su piaṛṛa'u mangangantari. Ringannu nanalangnge kecapi. Daralon Asaf. Aantari.

²Ruata tinumelengnga su Yehuda; aran-Ne niasingkatanna su Israel.

³Yerusalem uddewe tampa atatanaan-Ne; Wuiddu Sion tampa pamanuan-Ne.

⁴Poiaroddi i Tou nakkimunsa'a anambon ahiddu pangalo, anambon anaanna pia sawallone, allunga wuṛṛu hal᷊ele.

⁵Mangke mawantuga I'o, wuṛṛu lullansianga, nangillembo wuassu manga wowonen al᷊amona.

⁶Manga taumata waṛṛani buatte nipangaṛoanna; i mangitou niamatiil᷊anna wuṛṛu tate maatimpu'o. Manga tantara waṛṛani wuṛṛu matohassa niawul᷊ianten atatohanne.

⁷Anambon awal᷊o wuṛṛu sumasa'ene nanawo nate ṛatangannu asasa'u-Nu, oh Ruatan Yakub!

⁸Mangke wahewalla atonna I'o! Amungkangu I'o masa'u, isai wotongnge maataṛṛangnga?

⁹Wuassu langitta I'o namasingkattu raṛṛawen-Nu; runia nata'utta wuṛṛu mal᷊annabba.

¹⁰Napawe I'o dirumarisikka mamarikissa tadea'u manal᷊amatta taumata apan niallangnga su runia.

¹¹Manga taumata apan tumaniten mal᷊aṛṛaga lai maddalo Si'o, wuṛṛu apan ta'e massa'u ual᷊uṛen nasa tatiala lullal᷊o.

¹²Panipusse paairenu su MAWU Ruatanu. Ṛinone anambon walahanna apan uatana'a marani mangapiddu sasamba su Ruata apan iaata'utta.

¹³I Tou namaddi ikkatu manga tembonanne; manga ratu sussinggawanga su saruan-Ne.