Read Talaud DARALO 77 Bible Online

DARALO 77 - Talaud bible

DARALO 77

¹Su piaṛṛa'u mangangantari. Tumuṛutti: Yedutun. Daralon Asaf.

²Ringannu ma'ikkata i ya'u sussal᷊ande su Ruata; ringannu ma'ikkata i ya'u sussal᷊ande, ne i Tou naddaringikka si ya'u.

³Sutempon asasusa i ya'u niumal᷊iomanna su MAWU, su al᷊o'engngu ṛabbi i ya'u mammatten lima'u si Tou tawe illol᷊one, arawe naungku tawe awinalatanna.

⁴Napawe i ya'u maanaungnga Ruata, i ya'u ma'uare, napawe i ya'u tumaniten maṛṛingidda, naungku mallome.

⁵MAWU na'ola'a si ya'u tawe maatiilla sutempo ṛabbi, i ya'u u'ambul᷊isadda na'oman sara tawe maawisara.

⁶I ya'u maṛṛingiddu manga allo nanangkal᷊iu, i ya'u mannaungnga wuṛṛu maṛṛingiddu manga tonna nal᷊iudde.

⁷Sutempo ṛabbi i ya'u maṛṛingidda, wuṛṛu ma'iwal᷊o sulal᷊ummu naungnga,

⁸“Saran mal᷊annu-l᷊annu MAWU manol᷊a'a wuṛṛu tate mandangngu si ya'u?

⁹Apa i Tou nangillol᷊ote mandangngu si yami? Apa i Tou tate manipussa paaire-Ne apia?

¹⁰Ruata naabul᷊ite mandangngu? Nasa'ute i Tou, na'oman sara tate umakkanna lai?”

¹¹Ana see i ya'u nabbisara, “Ete indi apan maataddu'a naungku, manungku Apan Atanggaṛṛane tate uataṛino lai.”

¹²I ya'u maapulu mannaungnga manga inolaan-Nu MAWU, mannaungnga manga al᷊aṛṛindu'u MAWU sutempo al᷊amona.

¹³I ya'u maapulu mannaungnga al᷊awo'a apan buatte niolang-Ngu, wuṛṛu maṛṛingiddu manga manara-Nu apan wahewalla.

¹⁴Oh Ruata al᷊awo'u inolaan-Nu na'ukkassa, isai ere ahewallu Ruatan kami?

¹⁵Ete I'o Ruata apan ma'ola'a al᷊aṛṛindu'a, taṛṛino-Nu buatte nipal᷊iatta-Ngu suwallatu manga walahanna.

¹⁶Ringannu atatohan-Nu I'o namallossu al᷊aṛṛanang-Ngu, papapulunni Yakub wuṛṛu i Yusuf.

¹⁷Ma'elega Si'o, oh Ruata, ua'e mabbal᷊i mata'utta, ore, wantan tahal᷊oangnga lai mangngiladda.

¹⁸Winabbawa mannosokku uranna, rallu'a mappose; sawallo ma'ilatta su al᷊awo'u tampa.

¹⁹Rallu'a mappose, sawallo mabbeessa, runia niumio'a wuṛṛu nangindo.

²⁰I'o u'amatta su lua'a, mammare tahal᷊oangnga, arawe wal᷊adda-Nu tawe asiloanna.

²¹Naal᷊ihidda mallal᷊u'adda I'o ua'ehetta al᷊aṛṛanang-Ngu, ringannu uaapidda si Musa wuṛṛu Harun.