Read Talaud DARALO 78 Bible Online

DARALO 78 - Talaud bible

DARALO 78

¹Aantari tatantiron Asaf. Paddaringikke tatantiro'u, ei walahangku, panutukke manga wisara'u.

²I ya'u maapulu mabbisaran sasanato'a wuṛṛu sasumandinga, wuṛṛu manal᷊a'an ao'a wuassu al᷊amona,

³manga hatto apan niaringiṛṛanni yami wuṛṛu nisengkami yami, apan niwa'e iupungngu al᷊amonan kami.

⁴I yami maddiri mangaddapingu watti'a udde su manga ana'i yami; i yami mappulu mamasingkatta su pallal᷊awanna manansunna su ola'u taṛṛinon MAWU wuṛṛu manga manara-Ne apan wahewalla, see lai manga inolaan-Ne apan maatiangnga.

⁵Su walahannu Israel i Tou nangonggolu tita-Ne, wuṛṛu su papapulunni Yakub parenta-Ne. I Tou nandolokku iupungu al᷊amonan kite manantiro su manga ana'i mangitou,

⁶tadea'u pallal᷊awanna manansunna maaillal᷊a si Tou, ana see mabbatti'a su manga ana'i mangitou.

⁷Ringannu aroddi i mangitou lai sarun pia antimma lai su Ruata, wuṛṛu tawe maabul᷊in inolaan-Ne, arawe sidutu matuṛutta parenta-Ne,

⁸tadea'u i mangitou tawe mangaṛussa iupungngu al᷊amonan mangitou apan apulune mammangalo wuṛṛu mandal᷊eo; pallal᷊awanna apan matul᷊u pangangimanne, wuṛṛu tawe maddaringikka Ruata.

⁹Ṛuanganni Efraim apan ahidde anaanna wuṛṛu papiti'a, tinumal᷊angngu watanganne sutempo uapapangalo.

¹⁰I mangitou nilumawanga paairen Duatan mangitou, wuṛṛu maddiri tumuṛṛutta tita-Ne.

¹¹I mangitou naabul᷊in manga inolaan-Ne, wuṛṛu manga hatto maatiangnga apan niapal᷊iatta'u MAWU si mangitou.

¹²Su saruannu al᷊amonan mangitou, Ruata na'ola'a al᷊aṛṛindu'a su wanua Mesir, su leta'u Zoan.

¹³I Tou nama'a tahal᷊oangnga, ana see napal᷊ewessi mangitou; ua'e naipattaalla ere niṛṛappinganna.

¹⁴I Tou ua'ehetta si mangitou ringannu winabbawa sutempo allo wuṛṛu ringannu semakku putungnga su al᷊o'engngu ṛabbi.

¹⁵I Tou nama'a wowone watu su wadda'a, wuṛṛu nangonggolu ua'e pa'inumanna si mangitou manambo-nambo.

¹⁶Wuiddu watu nirolokku MAWU mapasabbangu ua'e, ana see nangelekka naal᷊ihidda sal᷊ukka.

¹⁷Arawe i mangitou sidutu ma'ola'a rosa su saruannu Ruata, su wadda'a i mangitou mammangalo su saruannu Apan Atanggaṛṛane.

¹⁸I mangitou nattatudda mannal᷊u'atta Ruata, ringannu maddorongnga anna apan ipaapulun mangitou.

¹⁹I mangitou lullawangnga Ruata ringannu mabbisara, “Wotongngewe Ruata mapaanni ite su wadda'a?

²⁰Atonna i Tou namuulla wowone watu apan maattikka, na'oman sara ua'e nangelekka ringannu masassaga. Arawe wotongngewe lai i Tou mangonggolu roti wuṛṛu mangonggolu ṛemessa su al᷊aṛṛanang-Nge?”

²¹Naaringikka udde Ruata nasa'u wuṛṛu nanoṛṛobba al᷊aṛṛanang-Nge ringannu putungnga; asasa'u-Ne su saruanni mangitou aatambante,

²²ana waugu i mangitou tawe mangimanna Ruata, su taṛṛino-Ne apan wotongnge manal᷊amatta si mangitou.

²³Salaiwe aroddi i Tou namarenta langitta mamu'essa manga ngarane.

²⁴I Tou nanossokku ganduma wuassu surga, manna maola'a wiakki mangitou.

²⁵I Tou nangonggola si mangitou anna nilumambalanna; i mangitou niumanna rotin mala'ekatta.

²⁶I Tou lai nandolokku anginna ra'i tinumiuppa; ringannu taṛṛino-Ne anginna timukka sinumingangu.

²⁷I Tou nanossokku manga manu'u winalanganna su al᷊aṛṛanang-Nge, anambone naal᷊ihidda annen sahatta tawe iareengnga.

²⁸I Tou nangonto'u manga manu'u winalanganna udde su paddasananna uapal᷊iwutta su tampa i mangitou uatana'a.

²⁹Ana see i mangitou niumante na'oman sara nal᷊aidda, ana waugu Ruata buatte nangonggola apa apan ipaapulun mangitou.

³⁰Arawe apulun naungngi mangitou taambe lai nautunganna; nariaddi tantal᷊anna i mangitou ta'e u'anna,

³¹Ruata nasa'u wuṛṛu nilumawangnga si mangitou; i Tou namate manga taumatan Israel apan ta'e dario'a wuṛṛu matohassa.

³²Salaiwe aroddi al᷊aṛṛanang-Nge sidutu marosa, manga al᷊aṛṛindung-Nge tawe naola'a si mangitou mangimanna.

³³Ne Ruata nanginsue wiakki mangitou naal᷊ihidda sasangngo, manga tonna ipabbiakki mangitou nasue sulal᷊ummu atata'utta.

³⁴Suapan Ruata mamate manga pira suwallati mangitou, ingana'a waine sinumassilla wuṛṛu nabelengnga ringanni Tou.

³⁵I mangitou naanaungnga manungku Ruata mallal᷊u'addi mangitou, wuṛṛu manungku Apan Atanggaṛṛanne mananal᷊amatti mangitou.

³⁶Arawe i mangitou namahia si Tou, manga wisaran mangitou awusu wara'a.

³⁷I mangitou tawe tumuṛutta si Tou, wuṛṛu tawe uaagassa su paaire-Ne.

³⁸Arawe Ruata mandangngu wuṛṛu nangampunga al᷊aṛṛanang-Nge, wuṛṛu tawe namate si mangitou. Masokka-sokka i Tou maṛṛaddannu asasa'u-Ne, wuṛṛu tawe mapasabbangu naung-Nge lal᷊eo.

³⁹I Tou mannaungnga manungku i mangitou tumba'u riadianna apan wotongnge mate, naal᷊ihidda anginna apan sinumabbi wuṛṛu tate mabelengnga.

⁴⁰Aroddi asokkane i mangitou lumawangnga si Tou, wuṛṛu manaddu'a naung-Nge sutempo su wadda'a.

⁴¹Masokka-sokka i mangitou manal᷊u'atta Ruata, mapasusa Apan Susi, Ruatan Israel.

⁴²I mangitou tawe manaungnga taṛṛino-Ne, su allo i Tou namallossi mangitou wuassu seetta,

⁴³sutempo i Tou na'ola'a manga al᷊aṛṛindu'a su Mesir, wuṛṛu inolaanna maatiangnga su wadda'u Zoan.

⁴⁴Manga sal᷊ukki mangitou niwal᷊u nabbal᷊i daṛṛa, na'oman sara i mangitou tawe na'inumma ua'ene.

⁴⁵I Tou nanansara si mangitou ringannu lango apan manambo, wuṛṛu namalan leta'i mangitou nil᷊al᷊eon aakka.

⁴⁶I Tou nandantan ul᷊idda wuṛṛu saṛṛappalanna, wuṛṛu nanginsue pangitinganna wuṛṛu hessin wawail᷊anna.

⁴⁷I Tou namate punnu anggori mangitou ringannu uranna watu, wuṛṛu manga alu aran mangitou ringannu angngukka masunge.

⁴⁸I Tou namalan uranna eisse nangansalla su winatangngi mangitou, wuṛṛu rallu'a massawallo namate manga winatangngi mangitou.

⁴⁹I Tou napasabbangu asasa'u-Ne apan lukkenggamma ringannu nandolokku sambageanganna mala'ekattu papate apan na'ola'a si mangitou niasueannu naungnga.

⁵⁰I Tou tawe naṛṛaddannu asasa'u-Ne ara'e niumakkannu wiakki mangitou, arawe namate si mangitou ringannu radda'u manu'a.

⁵¹I Tou namate manga ana'a esakka pahul᷊une sulal᷊ummu sambau amonannu taumatan Mesir.

⁵²Ana see i Tou namiaṛṛa'u al᷊aṛṛanang-Nge naal᷊ihidda ammul᷊annu domba, wuṛṛu nangehetta si mangitou niumamattu wadda'a.

⁵³Sulal᷊ummu aehen-Ne i mangitou mal᷊angnganna wuṛṛu tawe mata'utta, arawe seetti mangitou nawul᷊ussa sulal᷊ummu tahal᷊oangnga.

⁵⁴Ana see al᷊aṛṛanang-Nge niapiddi Tou watukku letang-Nge apan susi, watukku panenteanna apan niaṛo-Ne sassane.

⁵⁵Su saruannu al᷊aṛṛanang-Nge i Tou nallimbuakka tumana'a isudde ana see i Tou nattahia wanua udde su anambon ṛuangannu walahannu Israel, al᷊aṛṛanang-Nge, na'oman sara i mangitou napamanua su manga rasannu seetta.

⁵⁶Arawe i mangitou nilumawanga wuṛṛu nanal᷊u'atta Ruata Apan Atanggaṛṛane manga parenta-Ne tawe daringiṛṛanni mangitou.

⁵⁷I mangitou nandal᷊eo ere lai al᷊amonan mangitou, wuṛṛu tawe pangimananna ere papiti'a wengkolla.

⁵⁸I mangitou maannamma Ruata ringannu tampa passubbanna, wuṛṛu na'ola'a si Tou nasa'u ringannu manga paal᷊uanni mangitou.

⁵⁹Naasilo udde, Ruata mangke nasa'u, wuṛṛu nanol᷊a'i mangitou.

⁶⁰I Tou nanantangngu rasan-Ne su Silo, tampa atatanaan-Ne suwallatu taumata.

⁶¹I Tou namalan Wantallu Paaire-Ne niatawanna; waneṛṛan awawantu-Ge niaṛṛon ro'appa.

⁶²I Tou nasa'u al᷊aṛanang-Nge, pussa'a-Ne, wuṛṛu namalan mangitou nipaten hal᷊ele.

⁶³Manga umbasanni mangitou niepoddu putungnga, taweddu maawingngu manga maṛualan mangitou.

⁶⁴Manga imammi mangitou nipaten hal᷊ele, manga inawal᷊uanni mangitou tawe maal᷊uai.

⁶⁵Ne MAWU dirumarisikke ere taumata napu'o wua natiilla, naal᷊ihidda taumata matohassa wua na'inumma anggore.

⁶⁶I Tou napatal᷊angngu manga seen-Ne, wuṛṛu namaddon mangitou sarangkal᷊o'engnge.

⁶⁷Arawe i Tou nanol᷊a'u papapulunni Yusuf wuṛṛu tawe namile ṛuanganni Efraim.

⁶⁸Arawe nipile-Ne eteudde ṛuanganni Yehuda, wuṛṛu Wuiddu Sion apan arangnguan-Ne.

⁶⁹I Tou napararisikku Wal᷊en-Ne ere tatanaan-Ne su surga, wuṛṛu ere runia, matohassa saran mal᷊annu-l᷊annu.

⁷⁰I Tou namile si Daud allang-Nge, wuṛṛu namile si tou wuassu ammul᷊annu winatangnga papadul᷊iananne,

⁷¹wuassu tampa i Tou uapadul᷊i inangngu domba, ipamiaṛṛa'u Israel al᷊aṛṛanang-Nge.

⁷²Daud nappadul᷊i si mangitou ringannu naungnga mal᷊uassa, wuṛṛu nangehetta si mangitou ringannu apande.