Read Talaud DARALO 79 Bible Online

DARALO 79 - Talaud bible

DARALO 79

¹Daralon Asaf. Oh Ruata, walahanna apan tawe maillal᷊a uatana'e su leta'a pussa'a-Nu. I mangitou nandal᷊eote Wal᷊en-Nu, Yerusalem niola'a ete tuidda.

²Winal᷊unannu manga allang-Ngu tinantangngi mangitou naola'a inassu manga manu'u winalanganna. Winal᷊unannu manga arangnguan-Nu niwalan mangitou aroddi maola'a inassu manga winatanga matengnga.

³Su ahewallu soan Yerusalem daṛṛan mangitou nabboso ere ua'e; taweddu nallabingi mangitou.

⁴I yami naola'a paaeettu manga walahanna su al᷊indonganna, i mangitou nilumagge wuṛṛu mannappissi'a si yami.

⁵Oh MAWU, sarangkal᷊o'engnge I'o masa'u, wuṛṛu asasa'u-Nu lukkenggampe ere putungnga?

⁶Sabbanga'e asasa'u-Nu su manga walahanna apan tawe maaillal᷊a Si'o wuṛṛu su manga araratuanna apan tawe mattaṛṛamawu Si'o.

⁷Ana waugu i mangitou buatte namate al᷊aṛṛanang-Ngu, wuṛṛu nanggohakku tampa atatanaanni mangitou.

⁸Arie makkuumanni yami ana waugu rosan al᷊amonan kami. Akkanaawe paal᷊ihakka i yami, ana waugu i yami niasueanten antimma.

⁹Ontol᷊ewe i yami oh Ruata, mananal᷊amatti yami, ampungewe manga rosan kami wuṛṛu pallosaawe i yami maola'a aaddata Si'o sassane.

¹⁰Arie pabbala'a walahanna waine maiwalon kami, “Suapate Ruatan mangitou?” Wala'ewe i yami maasilo wawal᷊inne su walahanna apan namate manga allang-Ngu.

¹¹Daringiṛṛewe sasal᷊iomannu taumata tataṛṛanganna; antimanna manga taumata apan buatte tinantunna mate iwala wiakka ana waugu taṛṛino-Nu.

¹²Oh MAWU, wal᷊isete walahanna udde anambone paapitu ana waugu anambon aal᷊uandagi mangitou su saruan-Nu.

¹³Ne i yami al᷊aṛṛanang-Ngu, domba papadul᷊ianan-Nu, sarun maadiangkamanna Si'o saran mal᷊annu-l᷊annu, wuṛṛu maddalo Si'o sara maṛṛawa mappulunna.