Read Talaud DARALO 86 Bible Online

DARALO 86 - Talaud bible

DARALO 86

¹Aal᷊iomanni Daud. Daringiṛṛewe aal᷊iomangku, oh MAWU, wuṛṛu simbaṛewe i ya'u, ana waugu i ya'u asiangnga wuṛṛu lome.

²Lu'arewe wia'u, ana waugu I'o marangngu si ya'u, sal᷊amatewe allang-Ngu apan mangngimanna Si'o.

³Ete I'o Ruata'u, akkanaawe i ya'u oh MAWU, ana waugu su al᷊o'engngu allo i ya'u u'al᷊iomanna Si'o.

⁴MAWU, pal᷊uasaawe naungngu allang-Ngu, ana waugu ete Si'o tuddan naungku.

⁵I'o mapia, oh MAWU, wuṛṛu sidutu mangngampunga, taumata apan u'al᷊iomanna Si'o sidutu raddangnguan-Nu ringannu darangngu apan nilumambalanna.

⁶Daringiṛṛewe aal᷊iomangku, oh MAWU, daringiṛṛewe sasal᷊ande'u maiontolla.

⁷Sutempon asasusa i ya'u u'al᷊iomanna Si'o, ana waugu I'o sinumimbakka si ya'u.

⁸Oh MAWU, tawe mawu ere I'o, taweddu maaola'a ere a'olaan-Nu.

⁹Anambon walahanna apan niolang-Ngu sarun rumanta, oh MAWU, tadea'u massubba Si'o wuṛṛu maddalo awawantu-Gu.

¹⁰Ana waugu I'o matohassa wuṛṛu ma'ola'a manga al᷊aṛindu'a, tumba'u I'o Ruata.

¹¹Tantiroa'e apulu-Nu si ya'u, oh MAWU, tadea'u i ya'u mappaamatta ringannu matuṛṛutta; olaawe i ya'u ma'imanna ringannu ahewallu naungnga.

¹²I ya'u maadiangkamanna Si'o ringannu ahewallu naungku, oh MAWU Ruata'u; i ya'u maddalote awawantu-Gu saran mal᷊annu-l᷊annu.

¹³Ana waugu I'o sidutu mandangngu si ya'u ringannu darangngu apan wahewalla, I'o buatte namallossu niawa'u wuassu loṛangngu labbinga.

¹⁴Oh Ruata, taumata mawunga naddisikka mamangalo si ya'u, sangkammul᷊anna taumata maṛṛagissa mamate si ya'u; i mangitou tawe mangantagu I'o MAWU.

¹⁵Arawe I'o, oh MAWU, Ruata marangngu wuṛṛu maakkanna, masabbare, napenen darangngu wuṛṛu tatuṛutta.

¹⁶Ellehewe wuṛṛu dangnguewe i ya'u, tohassawe wuṛṛu sal᷊amatewe i ya'u, ana waugu ere inangku, i ya'u lai mattaṛamawu Si'o.

¹⁷Onggol᷊awe i ya'u tatialan apapia-Nu oh MAWU, tadea'u taumata apan maddantingku mabbal᷊i, napawe i mangitou maasilo Si'o mantul᷊ungnga wuṛṛu malluassa si ya'u.