Read Talaud DARALO 94 Bible Online

DARALO 94 - Talaud bible

DARALO 94

¹Oh Ruata, ete I'o Ruata apan mabbal᷊issa, pal᷊iatta'e wawal᷊in-Nu, oh MAWU.

²Darisikke, oh Mallaṛṛuunga ahewallu runia, ṛuumana'e taumata mawunga uasul᷊ungngu inolaanni mangitou.

³Oh MAWU, maddatingngu tingngera taumata lal᷊eo lulluassa? Maddatingngu tingngera, oh MAWU?

⁴I mangitou napasabbangu manga wisara lal᷊eo, wuṛṛu mammungan al᷊al᷊eon mangitou.

⁵I mangitou mangngallanga al᷊aṛṛanang-Ngu, oh MAWU, wuṛṛu namate manga taumata nipile-Nu.

⁶I mangitou mammate wawine wal᷊u wuṛṛu asisin timpal᷊ussa wuṛṛu taumata raho apan uatana'a su wanua indi.

⁷Unni mangitou, “MAWU tawe maasilo, Ruatan Yakub tawe maatutukka.”

⁸Ei walahangku, ariewe mattingka woddo ereudde, paapiate mappaattu ṛingirannu!

⁹Ruata apan na'ola'a tal᷊inga, apa i Tou tawe maaringikka? I Tou apan na'ola'a mata, apa i Tou tawe maasilo?

¹⁰I Tou apan mangngaṛṛa'a manga walahanna, apa i Tou tawe makkuumanna? I Tou apan nabbal᷊i mananantiron anambon taumata, apa i Tou tawe uatahuanna asingkatta?

¹¹MAWU masingkattu ṛingirannu taumata, i Tou masingkatta manungku sarangkanambone udde tawe gunane.

¹²Lal᷊umanna'a su taumata apan niaṛṛaan-Nu, oh MAWU, taumata apan niaṛṛaannu manga tita-Nu.

¹³I'o napatammuddi tou su manga allon asasilaka, na'oman sara nial᷊i loṛṛangnga ipanametta taumata lal᷊eo.

¹⁴Ana waugu MAWU sarun tawe manantangngu al᷊aṛṛanang-Nge; i Tou tawe ma'ellega aroddi pussa'a-Ne.

¹⁵Ne tita sarun iapaamatta apia su pallaṛṛuungnga, anambon taumata matul᷊idda sarun maapulun tita udde.

¹⁶Isai mangambanga si ya'u su saruannu taumata lal᷊eo? Isai apan manamba'a si ya'u su saruannu taumata inolaanne lal᷊eo?

¹⁷Unnu wisara MAWU tawe nantul᷊ungku, i ya'u sarun ma'ingkatta watukku runian taumata nate.

¹⁸Sutempo i ya'u maṛṛingidda manungku i ya'u sarun manawo, darangngu-Nu, MAWU, naaola'a si ya'u dirumarisikka matohassa.

¹⁹Napawe naungku matta'utta wuṛṛu sussinggawanga, I'o nallimbatta si ya'u wuṛṛu nalluassa si ya'u.

²⁰I'o tawe maammulu manga mallaṛṛuunga lal᷊eo, apan manggol᷊agu al᷊al᷊eo ringannu sasarianne tita.

²¹I mangitou suadio'a lumawangnga taumata matul᷊idda, wuṛṛu nakkuumanna pateanna taumata apan tawe sal᷊ane.

²²Arawe MAWU udde mananambaa'u, Ruata'u nabbal᷊i passirungangku.

²³I Tou nakkuumannu taumata lal᷊eo uasul᷊ungngu al᷊al᷊eone, wuṛṛu napal᷊annabi mangitou ana waugu rosane. MAWU Ruatan kite sarun mapal᷊annabi mangitou.