Read Talaud DARALO 97 Bible Online

DARALO 97 - Talaud bible

DARALO 97

¹MAWU uddewe Ratu! Ṛinone runia udde lumala'a, wuṛṛu manga taṛṛanusa lumuassa.

²I Tou papal᷊iwutannu winabbawa wuṛṛu ararandumma; atatul᷊idda wuṛṛu tita uddewe sasariannu araratuan-Ne.

³Putungnga nilumewa su saruan-Ne, nagepoddu seetta apan uapal᷊iwutta si Tou.

⁴Sawallo-Ne mannemakka runia, runia nangindo naasilo si Tou.

⁵Manga wowone nonossa ere lilinna su saruannu MAWU, su saruannu MAWU, tembonannu ahewallu runia.

⁶Langitta mammasingkattu atatul᷊iddu MAWU, wuṛṛu anambon walahanna naasilo awawantu-Ge.

⁷Anambon taumata apan massubba paal᷊uanna sarun pansilianna, apan mammungan darotongnga apan tawe gunane; anambon monganna sarun massubba su saruannu MAWU.

⁸Tumana'u Sion wuṛṛu manga soan Yehuda naungnge mal᷊uassa napawe naaringikka MAWU nakkawessa.

⁹Ana waugu I'o, oh MAWU, tembonannu ahewallu runia; I'o mawantuga nangillembo wuassu al᷊awo'u monganna.

¹⁰Ei i yamiu apan mandangngu MAWU, aratinten al᷊al᷊eo! Ana waugu MAWU ual᷊u'adda wiakku al᷊aṛanang-Nge, i Tou namallossi mangitou wuassu taṛṛinon taumata lal᷊eo.

¹¹Semakka nilumapputte su taumata apan naungnge matul᷊idda, wuṛṛu lal᷊uassa su taumata apan mabbiakka su ṛinone.

¹²Lallala'e, ei manga taumata apan naungnge matul᷊idda ana waugu sarangkanambone apan buatte niola'u MAWU, wuṛṛu paadiangkamante su Ruata apan susi.