Read Talaud AMSAL 1 Bible Online

AMSAL 1 - Talaud bible

AMSAL 1

¹Eteindi manga tatantiro wuassi Salomo parinsin Daud, ratun Israel.

²Tuddane eteudde mantul᷊ungngu taumata tadea'u maasingkatta ereapa maola'a pande, wuṛṛu masingkattu atorannu pabbiaṛṛanna see lai wotongnge maasunna manga wisara apan pia addapingnge mal᷊al᷊umma.

³Manga tatantiro indi mangngaṛṛa'a ereapa taumata wotongnge mabbiakka ringannu pande, tawe mallinga, matul᷊idda wuṛṛu naṛṛino.

⁴Taumata apan tawe addapanne su ola'u pabbiaṛṛanna niaṛṛaanne na'oman sara uatahuanna ṛingiranna apan maṛṛoro, wuṛṛu taumata saṛṛen tumuwo niaṛṛaanne mabbal᷊i taumata apan pande wuṛṛu wotongnge maṛṛingidda ere taumata matinggakke.

⁵Ringannu manga tatantiro indi taumata pande lai sarun aatambanna asingkanne, wuṛṛu taumata apan pia si'ol᷊ane sarun maasomba aehetta.

⁶Ringannu aroddi i mangitou wotongnge maaurumma asingkatta apan uaadappingnga sulal᷊ummu wisara wul᷊awanna wuṛṛu maasunna manga wisaran taumata pande see lai manga hatto apan ipappasingkatti mangitou.

⁷Tadea'u maasomba asingkatta tutune, paarorone ṛinone taumata uatahuanna aaddatta wuṛṛu matta'uttu MAWU. Taumata longonna tawe mangaregan apande wuṛṛu maddiri aṛṛaanna.

⁸Panutukke apa apan iwabbisaran iamangngu wuṛṛu inangngu si'o, ana'u,

⁹ana waugu manga al᷊aṛṛa'i mangitou maatamba apapianu naal᷊ihidda lal᷊ogakku pua wuṛṛu wul᷊ele apan maaṛṛamaga pahuddu.

¹⁰Amungkangu taumata marosa massal᷊ongngu, ana'u, arie maddaringikka sasal᷊o'i mangitou.

¹¹unnu wisara i mangitou mabbisara, “Otte, wette i ite maddea'a taumata wuṛṛu makkimpulunna si tou. Hunan ipallal᷊akkanga, wette i ite mamangalo taumata apan tawe sal᷊ane.

¹²Orassa indi i mangitou mabbiakka su al᷊al᷊uassa wuṛṛu wadangnga mapia, arawe sal᷊immurine i mangitou sarun maola'a ere taumata apan tumaniten susa.

¹³I ite manganu manga saranapan mangitou apan maarega, tadea'u wal᷊en kite mapanen saranapa apan niaaṛṛo.

¹⁴Wette pallaṛṛenggente! Ul᷊en tatta'oanna sarun tahianni ite ringannu uasul᷊ungnga!”

¹⁵Arie pallaṛṛenggenna manga taumata ereudde, ana'u! Pangindauten mangitou.

¹⁶I mangitou tawe matatana'a mal᷊annabba amungkangu taambe na'ola'a al᷊al᷊eo. I mangitou apulune mal᷊iha-l᷊ihakka mamate.

¹⁷Sara lai manu'u winalanganna tawe sumutta sulal᷊ummu paperetta apan uataingnga uasaruanna matane,

¹⁸ewe'e manga taumata lal᷊eo udde ewe'e mantaingngu sedda su watanganne sassane — sedda apan manilaka si mangitou.

¹⁹Atonna taumata apan maddea'a pabbawiakka ringannu mappaattu araṛṛagissa sarun mamaekku niawane sassane.

²⁰Paddaringikka! Apande mammago su manga lal᷊anna wuṛṛu mangngintul᷊i su manga leta'a mal᷊alangnga!

²¹I tou mangngintul᷊i su manga ngaran soa wuṛṛu su manga tampa marame:

²²“Ei manga taumata longonna! Maddatingngu tingngera apulun kamiu sidutu aroddi? Tingngerate a'omanna tempone i yamiu umaddo mangngaddio'a wuṛṛu manol᷊a'u al᷊aṛṛa'a?

²³Paddaringikka si ya'u amungkangu i ya'u managgu si'o, ne ete si'o sarun ta'u iapal᷊iatta'a lal᷊oṛṛon naungku wuṛṛu ta'u iaṛṛa'a asingka'u.

²⁴I yamiu buatte niawagoangku, arawe i yamiu nanol᷊a'a wuṛṛu maddiri maddaringikka.

²⁵Anambon tatagu'u tawe iareggan kamiu wuṛṛu i yamiu nanol᷊a'u tatagu'u.

²⁶Ana waugu udde, amungkangu i yamiu masilaka, i ya'u sarun lumaggen kamiu. Amungkangu i yamiu mata'utta, i ya'u sarun mangeetta si yamiu.

²⁷Ore, i ya'u sarun mangeetta si yamiu amungkangu i yamiu sussinggawanga wuṛṛu uatataṛṛangnga susa ana waugu niaṛṛiaannu asasilaka apan rumanta ere anginna al᷊isusu.

²⁸Sutempo udde i yamiu sarun mamaggo si ya'u, arawe i ya'u tawe sumimbakka. I yamiu sarun maddea'a si ya'u suapan tampa arawe tawe massomba'u.

²⁹I yamiu naal᷊ihidda taumata apan maddiri maasomba asingkatta, wuṛṛu maddiri tumuṛṛutta MAWU.

³⁰I yamiu taambe saran paassa manengkamma manga al᷊aṛṛa'u ara'e maddaringikka manga tatagu'u.

³¹Ana waugu udde, i yamiu sarun maapendamma pangillul᷊eannu manga inolaannu wuṛṛu manga hol᷊agu apan dal᷊eo.

³²Taumata apan tawe asingkatta su ola'u pabbiaṛṛanna sarun mate ana waugu tawe mangarega'u, wuṛṛu taumata longonna sarun maṛṛimunsa'a ana waugu tawe maddaringikka si ya'u.

³³Arawe taumata apan maddaringikka si ya'u sarun papadul᷊iananna. I tou mabbiakka ringannu mal᷊angnganna wuṛṛu tawe atata'utta.”