Read Talaud AMSAL 10 Bible Online

AMSAL 10 - Talaud bible

AMSAL 10

¹Indiwe manga tatantiron Salomo: Ana'a apan pande udde ilalluassu iamangnge; ana'a apan woddo maasusa naungngu inangngene.

²Paa'ala apan niasombanganna ringannu mallinga tawe mandantan auntunganna; arawe mawal᷊i'a, atatul᷊idda sarun manal᷊amatta.

³MAWU sarun mamalan taumata mapia amal᷊unusanna; arawe i Tou mannal᷊awa'a taumata lal᷊eo tadea'u taumata udde tawe maasomba apa apan ipaapulune.

⁴Taumata malassa sarun maola'a asiangnga; taumata maṛṛimadda sarun maala.

⁵Taumata pande mangngammullu pangitinganne su sutempone, arawe taumata apan tumba'u mattiilla sutempo mangngitingnga, mandantan asasili su watanganne.

⁶Taumata mapia sarun maasomba al᷊amatta. Araṛṛagissa uawuni sulal᷊ummu manga wisaran taumata lal᷊eo.

⁷Pannanaunganna su taumata mapia udde maola'a al᷊amatta, arawe taumata lal᷊eo lapiddu abbul᷊iananna.

⁸Taumata apan pande, apulune mannengkamma al᷊aṛṛa'a; taumata apan wisarane woddo sarun ilamammiṛṛanna.

⁹Taumata matul᷊idda, mabbiakka mal᷊angnganna; taumata apan mallinga sarun asingkatanna.

¹⁰Isai apan mammunin atatul᷊idda, mapasapputtu asasusa; isai apan mannagu ringannu uahahati, mattinsahadda atatahul᷊andimma.

¹¹Pabbawisaran taumata mapia maaola'a wiakka lal᷊umanna'a, arawe wuassu wisaran taumata lal᷊eo uawuni naungnga lal᷊eo.

¹²Pabbawinsin mandantan patatiakka; darangngu mangngampungnga anambon pasasal᷊a.

¹³Taumata apan ṛingiranne matakko'a mabbisaran manga wisara masiṛṛungnga; taumata woddo ṛinone puul᷊anna.

¹⁴Taumata masiṛṛungnga mangngammullu asingkatta; napawe taumata woddo mabbisara, i tou mammol᷊engnga asasilaka.

¹⁵Paa'ala ual᷊u'adda siapa ala, asasusa maaola'a papate su taumata asiangnga.

¹⁶Amungkangngu inolanna apapia, lal᷊antakke eteudde mabbiakka su lal᷊umanna'a; amungkangngu ma'ola'a rosa, pangillul᷊eanne mannamboanna lai rosa.

¹⁷Isai apan maddaringikka tatagu sarun mabbiakka su lal᷊umanna'a, isai apan maddiri manga'u pasasal᷊ane i tou sulal᷊umpen asasilaka.

¹⁸Taumata apan mammunin asasa'u i tou udde taṛṛa awusu. Taumata apan mannal᷊iawukku aumbilangnga i tou longonna.

¹⁹Lembon manambo wisara, asinungka manambo lai marosa; taumata apan wotongnge mangul᷊inna lilane i tou udde pande.

²⁰Wisaran taumata apan mapia naal᷊ihidda sal᷊a'a tutune; lal᷊annu ṛingiddu taumata lal᷊eo tawe gunane.

²¹Wisaran taumata apan mapia, maola'a al᷊amatta su anambon taumata; awawoddon taumata woddo mammate watanganne sassane.

²²Ana waugu tumba'u al᷊amattu MAWU taumata nabbal᷊i ala; mammanara maṛṛimadda tawe maatamba darotongnga.

²³Taumata woddo mal᷊uassa naungnge ma'ola'a pasasal᷊a; taumata pande apulune maddea'a asingkatta.

²⁴Taumata masaṛṛionto'a maasomba apa apan ipaapulune; taumata lal᷊eo maasomba apa apan lembon iaata'unne.

²⁵Napawe anginna wahewalla tumumbu'a mawul᷊ite taumata lal᷊eo; arawe taumata matul᷊idda matatana'a matohassa saran mal᷊annu-l᷊annu.

²⁶Arie mandolokku taumata malassa, i tou tumba'u mandal᷊eo naungnga, ere cuka maaṛṛangirassa isi ara'e timbulla maaṛṛage mata.

²⁷Pangaddate MAWU, ne i'o sarun mabbiakka mal᷊annu; taumata lal᷊eo mate tatal᷊anna taambe tempone.

²⁸Antimmu taumata mapia ma'ola'a si tou su lal᷊umanna'a; antimmu taumata lal᷊eo tawe loṛṛone.

²⁹MAWU ual᷊u'adda taumata matul᷊idda, arawe mammate taumata inolaanne lal᷊eo.

³⁰Taumata masaṛṛionto'a sarun mabbiakka masunge matahul᷊andimma; taumata lal᷊eo sarun tawe maatana'a su leta'a pussa'a.

³¹Taumata masaṛṛionto'a mabbisaran manga wisaran apande; taumata lal᷊eo sarun ihanggumma moṛṛongnge.

³²Manga wisaran taumata masaṛṛionto'a maal᷊uassa naungnga; manga wisaran taumata lal᷊eo sidutu maataddu'a naungnga.