Read Talaud AMSAL 11 Bible Online

AMSAL 11 - Talaud bible

AMSAL 11

¹MAWU maddantinnu taumata apan mappaattu timbanganna ipallinga arawe i Tou mal᷊uassa ringannu taumata apan mappaattu timbanganna naṛṛino.

²Taumata mawunga sarun al᷊uandahanna; taumata naungnge mawawo i tou taumata pande.

³Taumata mapia aehetannu atatul᷊idde, taumata apan apulune mangngawusu sarun ṛimunsaannu awusune.

⁴Amungkangngu uasaruante papate, darotongnga tate gunane; wiakku sarun masal᷊amatta napawe naungngu masaṛṛionto'a.

⁵Lal᷊annu wiakku taumata mapia iratakku atatul᷊idda, arawe taumata lal᷊eo mangngapiddu watanganne su papate.

⁶Taumata matul᷊idda masal᷊amatta ana waugu asasaṛṛionto'u naungnge; taumata apan tawe apangimananna, mawontolla su awawal᷊iune.

⁷Amungkangngu taumata lal᷊eo mate, pangangantimme lai nate; uaantimma su atatohanne sassane tawe gunane.

⁸Taumata na'ukassa marau wuassu asasusa; taumata lal᷊eo maasomba hal᷊ahe.

⁹Paggahahatton taumata lal᷊eo maapate; apanden taumata mapia maasal᷊amatta.

¹⁰Soa maṛṛamaga amungkangngu taumata matul᷊idda maasomba wiakke; tumana'u soa lullala'a napawe taumata lal᷊eo nate.

¹¹Al᷊amattu taumata matul᷊idda maaṛṛansangnga soa; wisaran taumata lal᷊eo maahohakka.

¹²Mangngal᷊uandaga taumata waine, uddewe inolaanna apan longonna; taumata apan pia budine, sarun tawe mapasabbangnga wisara sangkapaddi.

¹³Mananal᷊iawukku watti'a awusu tawe maaṛṛapa addappingnge, arawe taumata apan apangimananna wotongnge maaddapingngu hatto.

¹⁴Walahanna sarun massongkakka amungkangngu tawe piaṛṛangnge; aatambanna mananagu, asasal᷊amatta mangke matatana'a.

¹⁵Maddiandi mamaekka awallassa su taumata waine udde atappasanne mandantan asasilaka; mappianne tawe sumutta su hatto udde tadea'u mal᷊annabba.

¹⁶Wawine apan pallal᷊agune mapia maasomba aaddatta; taumata maṛṛagissa mangngammullu paa'ala.

¹⁷Taumata naungnge matul᷊idda mangnguntungnga watanganne; taumata maṛṛaggissa mandugi watanganne.

¹⁸Auntungannu taumata lal᷊eo, auntunganna tawe gunane, auntungannu taumata inolaanne mapia eteudde auntunganna apan tutune.

¹⁹Isai matammudda ma'ola'a mapia, sarun mabbiakka su lal᷊umanna'a; isai mattinsahadda ma'ola'a al᷊al᷊eo mattuddan papate.

²⁰MAWU maddantinnu taumata apan ma'ola'a al᷊al᷊eo, arawe i Tou mandangngu taumata apan mabbiakka tawe sangkulle.

²¹Taumata lal᷊eo ṛinone iṛṛuumanna; taumata mapia sarun masal᷊amatta.

²²Araṛṛamagu wawine apan tawe apapia, naal᷊ihidda wul᷊awanna su ngirunnu wawi.

²³Apulun taumata mapia sidutu hessine lai mapia, arawe apan wotongnge antimannu taumata lal᷊eo tumba'u asasa'u.

²⁴Pia taumata mappulu mangonggolla, arawe aatambanna paa'alane, piaddu apulune mapiikka, arawe aatambanna lai paasiangnge.

²⁵Taumata apan apulune mangngonggolla sarun mangillembo, taumata apan apulune mantul᷊ungnga sarun itul᷊ungnga lai.

²⁶Isai mangngombon darotongnge sarun wontohannu taumata, arawe taumata apan mabbal᷊u'a sarun maasomba daralo.

²⁷Isai maṛṛimadda ma'ola'a apapia sarun arangnguannu taumata; isai maddea'a al᷊al᷊eo, sarun aṛṛiaannu asasusa.

²⁸Isai apan mangngasakku paa'alane sarun manawo ere rongnga naṛṛangute; taumata apan susi sarun mati'akka ere lal᷊uwon rongnga wakku.

²⁹Taumata apan mappasusan amonanne, sarun awul᷊iannu sarangkanambone. Taumata woddo sarun mangimbe taumata pande.

³⁰Taumata apan susi sarun maatokka wiakke; taumata apan pande aatambanna mallal᷊aṛṛenggene.

³¹Amungkangngu su runia indi taumata mapia lai sarun manarimmattu wawal᷊inne, natantunte taumata lal᷊eo wuṛṛu marosa sarun maasomba ṛuumanna.