Read Talaud AMSAL 12 Bible Online

AMSAL 12 - Talaud bible

AMSAL 12

¹Taumata apan mappulun asingkatta i tou mal᷊uassa maasomba tatagu; arawe taumata apan maddiri taguanna uddewe taumata longonna.

²Taumata mapia arangnguannu MAWU, arawe taumata apan makkiinnu al᷊al᷊eo sarun iṛṛuumanna.

³Tawe saran sangkatou apan sidutu tumelengnga ana waugu al᷊al᷊eo; arawe taumata matul᷊idda sidutu matohassa, tawe maholle.

⁴Awingnga apan mapia eteudde al᷊al᷊uassa wuṛṛu lal᷊umanna'u awingnge esakka, awingnga apan mammansili awingnge esakka naal᷊ihidda radda'a maṛṛenessa duṛṛi.

⁵Taumata matul᷊idda maṛṛingiddu apa mapia; taumata lal᷊eo mangngumpangngu pangangawusu.

⁶Manga wisaran taumata lal᷊eo maapate; manga wisaran taumata matul᷊idda maasal᷊amatta.

⁷Taumata lal᷊eo sarun manawo wuṛṛu mawinasa tawe lannangnge; arawe taumata mapia sarun matatana'a matohassa maṛṛawa mappulunna.

⁸Taumata raddaloanna ana waugu apapandene; taumata aal᷊uandahanna ana waugu awawoddone.

⁹Mapianne maola'a tumana'u soa lal᷊ebbone apan pia manarane, sul᷊ungnge ere ala'uannu taumata wahewalla arawe elessu anna.

¹⁰Taumata mapia mappadul᷊i winatangnge; arawe taumata lal᷊eo mannansara winatangnge.

¹¹Mabbawailla apan marassaga pia biakke manambo, arawe taumata apan mangnginsue tempone su manara tawe gunane uddewe taumata woddo.

¹²Taumata lal᷊eo apulune maasomba auntunganna wuassu taumata mal᷊awangnga; taumata mapia nal᷊ihidda alu apan mabbua.

¹³Taumata lal᷊eo niasongngannu manga wisara lal᷊eo apan niwisarane; taumata mapia nal᷊iu wuassu asasusa.

¹⁴Suapan taumata maasomba lal᷊antakku manga wisara wuṛṛu inolaanne; sangkatou-sangkatou onggol᷊annu wawal᷊inne ere buatte niolangnge.

¹⁵Taumata longonna mammendamma watanganne taambe nassal᷊a saran paassa, arawe taumata pande apulune maddaringikka tatantiro.

¹⁶Amungkangngu taumata woddo umal᷊udda orassa udde lai i tou mamasingkattu taddu'u naungnge; arawe taumata pande tawe pandumme salaiwe i tou al᷊uandahanna.

¹⁷Ringannu mabbisara ṛinone, taumata manduittu atatul᷊idda; ringannu mammahia, taumata mandantan aal᷊iba'ukka.

¹⁸Walate wisarane wotongnge maal᷊essa naungnga ere niusu'u hal᷊ele; manga wisaran pande naal᷊ihidda undamma apan maapia.

¹⁹Awusu sarun asingkatanna ringannu sangkaṛṛondappa, arawe manga wisara atonna sidutu uatatana'a su al᷊o'engngu allo.

²⁰Taumata apan makkiinnu al᷊al᷊eo mappulun aal᷊iba'ukka; taumata apan mattinsahaddu apapia sarun mal᷊angnganna.

²¹Taumata mapia sarun tawe aṛṛiaannu asasilaka; taumata lal᷊eo mangke aaṛṛiaannu asasusa.

²²MAWU maddantinnu taumata awusu; arawe i Tou mal᷊uassa su taumata apan matul᷊idda.

²³Taumata pande tawe mammungan asingkanne; taumata woddo tuttolon awawoddone.

²⁴Araṛṛimadda maaola'a taumata pia taṛṛinone; amamalassa mammata'u taumata maola'a allangnga.

²⁵Apendamma sussinggawangnga maapaddi apulun naungnga, arawe manga wisara masaṛṛionto'a maahewalla naungnga.

²⁶Taumata mapia ma'untunganna wuassu al᷊indonganne; taumata lal᷊eo umal᷊iwu ana waugu al᷊al᷊eone.

²⁷Ringannu amamalassa tawe asombanganna apa apan raddeaanna; ringannu mammanara masahadda taumata maasomba paa'ala.

²⁸Taumata apan u'amatta su lal᷊anna apan naṛṛino sarun mabbiakka su al᷊al᷊uassa; taumata apan u'amatta su lal᷊anna sal᷊a udde mattuddan papate.