Read Talaud AMSAL 14 Bible Online

AMSAL 14 - Talaud bible

AMSAL 14

¹Putunganna niola'u apapanden bawine, arawe ihohakku awawoddone.

²Taumata apan matul᷊idda matta'utta wuṛṛu maaddatta su MAWU Ruata; taumata apan wiakke wengkolle manggaddio'a si Tou.

³Ana waugu warabungane, taumata woddo apulunu mannanggakku watanganne; taumata pande sarun lu'arannu manga wisarane sassane.

⁴Tawe sapi, tawe hessin bawail᷊anna; ringannu atatohassu sapi, pangitinganna sarun lumambalanna.

⁵Matatiala apan matul᷊idda sidutu mabbatti'u ṛinone, matatiala apan tawe apangimananna sidutu mammahia.

⁶Taumata mawunga sarun tawe maola'a pande, arawe taumata pande mal᷊uassa massi'ol᷊a.

⁷Ariewe maggahawen taumata longonna; taweddu apan wotongnge iaṛṛa'a si'o.

⁸Taumata pande masingkatta ereapa ṛinone mammanara, taumata woddo niawusuannu awawoddone.

⁹Taumata woddo tawe pandumme tanne rosane ampunganna ara'e tawe, taumata mapia maapulu rosane ampunganna.

¹⁰Al᷊al᷊uassa ara'e asasusa sasahipunanna sulal᷊ummu naungnga; taumata waine tawe mamendamma su sampunna.

¹¹Wal᷊en taumata mapia sidutu matohassa; wal᷊en taumata lal᷊eo sarun maṛṛa'a.

¹²Pia dal᷊anna apan aellehanna matul᷊idda, arawe panginsueanne lal᷊anna udde mattuddan papate.

¹³Pangillul᷊eannu lal᷊age asinungka pia lal᷊uai; al᷊al᷊uassa wotongnge muddussu asasusa.

¹⁴Taumata lal᷊eo sarun mani'o wuan aaluanna, taumata mapia sarun mani'o wuan apapiane.

¹⁵Taumata woddo mangngimanna anambon bisara, taumata pande tawe walate manarane.

¹⁶Taumata pia budine sidutu uatehamma wuṛṛu mangngindau wuassu al᷊al᷊eo, taumata woddo nasa'u, wua'udde naapendamma mal᷊angnganna.

¹⁷Taumata apan taṛṛa rona ma'ola'a awawoddo; taumata pande masabbare.

¹⁸Taumata apan tawe batti'u pabbiaṛṛanne sarun maola'a woddo; taumata pande sarun aatambanna asingkanne.

¹⁹Taumata lal᷊eo sarun massuṛṛubbawa su taumata naungnge matul᷊idda, tadea'u sumal᷊ande maiakkanna.

²⁰Taumata asiangnga tawe passangkapianna ewe'e lai ṛattangannu manga hawene; arawe taumata ala manambo hawene.

²¹Isai mallobbossa taumata waine, na'ola'a rosa; isai apan u'akkannu taumata asiangnga, sarun mabbiakka su lal᷊umanna'a.

²²Isai mattinsahaddu apapia, sarun pangimananna wuṛṛu aaddatanna; isai manggol᷊agu al᷊al᷊eo i tou su lal᷊anna nassal᷊a.

²³Sulal᷊ummu anambon manara wuṛṛu auntunganna; hatto awusu ma'ola'a taumata manawo su paasiangnga.

²⁴Taumata pande raddaloanna ana waugu apapandene, taumata woddo tinumelengnga ana waugu awawoddone.

²⁵Amungkangngu sangkatou matatiala mabbisara atonna, i tou nanal᷊amatta niawa; amungkangngu i tou mammahia, i tou nandal᷊eo sansul᷊ungnge.

²⁶Taumata apan mangngimanna MAWU mabbal᷊i mal᷊angnganna, wuṛṛu amonanne uatahuanna mandariagane.

²⁷Mangngimanna su MAWU uddewe punnu al᷊al᷊uassa; wuṛṛu lal᷊anna ipallinda'u papate.

²⁸Awawantugu ratu ua'ianna su anambon tumana'u soane; amungkangngu tawe tumana'u soa i tou tawe taṛṛino.

²⁹Taumata pande tawe mal᷊ihakka masa'u; taumata woddo tawe ma'ul᷊inna watanganne.

³⁰Naungnga matammudda maapia wadangnga; mangngune uddewe naal᷊ihidda radda'a apan maapate.

³¹Isai ma'ola'a mapia su taumata asiangnga, i tou mangngaddata Ruatane; isai mangngallangnga taumata lome, mallobbossa Mandariaddine.

³²Taumata lal᷊eo nate ana waugu al᷊al᷊eo, taumata mapia nilu'arannu apapiane.

³³Apande sidutu sulal᷊ummu naungngu taumata mapia; arawe niallangnga sulal᷊ummu ṛingirannu taumata woddo.

³⁴Atatul᷊idda wuṛṛu apapia mandantan arannu walahanna, arawe rosa maa'ola'a walahanna udde aal᷊uandahanna.

³⁵Ratu mal᷊uassa su mamanaran araratuanne apan pande; arawe i tou masa'u su mamanaran aratuanne apan tawe maamattu manarane.