Read Talaud AMSAL 15 Bible Online

AMSAL 15 - Talaud bible

AMSAL 15

¹Ringannu sasimbakka apan masaṛṛionto'a, asasa'u mabbal᷊i umompo'a; sasimbakka apan maṛṛagge mapasabbangngu asasa'u.

²Manga wisaran taumata pande maaola'a asingkatta maawol᷊engnga naungnga; manga wisaran taumata woddo lal᷊oṛṛone tumba'u awawoddo.

³MAWU ua'ellega sarangkanambone apan nariaddi su al᷊awo'u tampa; i Tou uainnunu al᷊awo'a apan mapia wuṛṛu lal᷊eo.

⁴Manga wisara mapia maatamba atatohassa, manga wisara apan maal᷊essa naungnga maaddio'a naungnga.

⁵Taumata woddo tawe maddaringikka al᷊aṛṛa'u iamangnge, taumata pande maddaringikka tataggu.

⁶Su wal᷊en taumata mapia pia manambo darotongnga; paa'alan taumata woddo nawul᷊in asasilaka.

⁷Manga wisaran taumata pande napenen asingkatta, arawe ṛingirannu taumata woddo tawe aroddi.

⁸MAWU mannengkamma aal᷊iomannu taumata mapia, arawe i Tou maddantinnu sasamban taumata lal᷊eo.

⁹MAWU maddantinnu ola'u wiakku taumata marosa, arawe i Tou u'akkannu taumata apan mattinsahadda tuttuṛṛutta apulu-Ne.

¹⁰Taumata apan ma'ola'a al᷊al᷊eo sarun sansaranna, taumata apan maddiri tagguanna sarun mate.

¹¹MAWU masingkattu runian taumata nate wuṛṛu manga olangnge; tawe mariaddi ṛingirannu taumata wotongnge iawuni si Tou?

¹²Taumata apan apulune mangngal᷊uandaga maddiri tagguanna; i tou maddiri maddorongnga tatantiron taumata pande.

¹³Naungnga apan mal᷊uassa ma'ola'a hati masemakka; naungnga apan massusa maaurangnga naungnga.

¹⁴Taumata pande maddea'a asingkatta; taumata woddo maddea'a awawoddone.

¹⁵Taumata apan uatul᷊angnga ṛinone uata'a mattinsahadda su lal᷊annu pabbiaṛṛanne; arawe taumata apan lulluassa sidutu su lal᷊umanna'a.

¹⁶Mapianne darotongnga matul᷊u arawe tatantalongannu atata'utta su MAWU, sul᷊ungnge'e manambo darotongnga arawe tatantalongannu asasinggawanga.

¹⁷Mappianne mannayore ringannu tatantalongannu darangngu, sul᷊ungnge'e u'inassa remissa matemangnga arawe tatantalongannu ararantinna.

¹⁸Taumata apan mal᷊ihakka masa'u mandantan patatiakka, taumata apan masabbare mangngapiddu paddarame.

¹⁹Arawe taumata malassa sidutu mammendamma asasusa; taumata matul᷊idda tawe maasomba hal᷊ahe.

²⁰Ana'a pande, maal᷊uassa naungngu iamangnge; ana'a woddo tawe mangaddata inangngene.

²¹Awawoddo udde al᷊al᷊uassu taumata lal᷊eo, taumata pande mabbiakka matul᷊idda.

²²Hol᷊aga tawe nariaddi, amungkangngu tawe tatantalongannu pallaṛṛingidda; hol᷊aga mahessi, amungkangngu manambo apan mangonggollu tatantiro.

²³Manga wisara apan niwisara naṛṛino sutempone, mandantan al᷊al᷊uassa.

²⁴Taumata pande u'amatta su lal᷊anna sussa'a apan mattudan pabbiaṛṛanna; wal᷊ine lal᷊anna sussossokka apan mattuddan papate.

²⁵MAWU sarun manggohakku wal᷊en taumata naungnge matanggakka, arawe leta'a pussa'an bawine wal᷊u niriaggan-Ne.

²⁶MAWU maddantinnu hol᷊aga apan dal᷊eo; arawe manga wisara apan mapia maal᷊uassa naung-Nge.

²⁷Isai apan maddea'a auntunganna tawe su lal᷊anne, mappasusa, putunganne sassane. Isai maddantinnu roitta aonggolla asogokka, sarun mabbiakka su lal᷊umanna'a.

²⁸Taumata mapia maṛṛingiddu manga wisarane; taumata lal᷊eo mappasabbangngu manga hatto apan maarantinna.

²⁹MAWU maddaringikka napawe taumata mapia umal᷊iomanna, arawe i Tou tawe mappandumma taumata marosa.

³⁰Hati lulluassa maasaṛṛindu'a naungnga, watti'a mapia maal᷊uassa niawa.

³¹Taumata apan maddaringikka tatagu nareengnga taumata pande.

³²Taumata apan maddiri aṛṛaanna, tawe mangaregan batanganne sassane; taumata apan mannengkamma tatagu, mabbali taumata masaṛṛionto'a.

³³Matta'uttu MAWU eteudde rapappakku pangangehetta apan mapia; awawantuga liuṛṛoroannu asasaṛionto'u naungnga.