Read Talaud AMSAL 17 Bible Online

AMSAL 17 - Talaud bible

AMSAL 17

¹Mappianne sangkawo'o nasi rarundinganannu paddarame, wuassu anna matemangnga manambo arawe rarundinganannu pattatiakka.

²Allangnga apan pande sarun uataṛṛino al᷊aṛṛana'a apan mammansili; wuṛṛu sarun manengkamma pussa'a suadio'a ringannu manga tuṛṛangngu ana'a udde.

³Wul᷊awanna wuṛṛu sal᷊a'a iannamma su auntupanna, arawe naungngu taumata iannammu MAWU.

⁴Taumata lal᷊eo tuttuṛṛutta manga tatantiro apan dal᷊eo, taṛṛa awusu mappulu maddaringikka manga wisara aal᷊uandaga.

⁵Isai mangngal᷊uandaga taumata masa'ina, mallobbossa taumata Ruata mandariaddine. Isai apan lulluassu asasilakan taumata waine, sarun maasomba ṛuumanna.

⁶Al᷊al᷊uassu taumata timmadete eteudde ana'a pulunna; al᷊al᷊uassu al᷊aṛṛana'a eteudde hagurangnge.

⁷Taumata aaddatanna tawe wotongnge mangngawusu; taumata woddo tawe ṛinone maabbisara wisara maarega.

⁸Piaddu massunna roitta aonggolla wotongnge ma'ola'a al᷊aṛṛindu'a; ringannu roitta aonggolla sarangkanambone wotongnge maola'a.

⁹Amungkangngu mappulu arangnguannu taumata, ampunge pasasal᷊a apan niola'i mangitou. Mangke manul᷊en pasasal᷊a tumba'u mammassutta paggahahawe.

¹⁰Sambau tatagu lembon maarega su taumata mapia wuassu maṛṛasutta hahesekka su taumata woddo.

¹¹Taumata lal᷊eo mandantan al᷊al᷊eo, arawe papate rumanta ringanni tou naola'a daroloṛṛanna apan maṛṛagissa.

¹²Mapianne massomban inangngu beruangnga apan niawul᷊iannu anangnge, wuassu ringannu taumata woddo apan niumal᷊iwun awawawoddone.

¹³Isai mabbal᷊issa apapia ringannu al᷊al᷊eo, ne al᷊al᷊eo tawe masabbangnga wuassu wal᷊ene.

¹⁴Manattakku patatiakka udde naal᷊ihidda namaassa lal᷊annu ua'e; ana waugu soṛṛote tantal᷊anna patatiakka taambe nanattakka.

¹⁵Taumata maddantinnu taumata apan mappaṛṛinon taumata lal᷊eo, wuṛṛu mapasal᷊an taumata apan tawe sal᷊ane.

¹⁶Tawe gunane taumata woddo mangnginsue roitta ipaddea'a apande, ana waugu i tou tawe ṛingiranna mapia.

¹⁷Sangkatou hawe sidutu mapia su hawene, arawe sangkatou tuṛṛangnga uapasanna asasusa suaddio'a.

¹⁸Taumata apan maddiandi tadea'u maola'a mamaekku awallassu sansul᷊ungnge uddewe taumata woddo.

¹⁹Taumata apan apulune su rosa, i tou apulune lai uatatiakka. Taumata apan tal᷊immoṛṛonganna, maddea'a papate.

²⁰Sangkatou taṛṛa l᷊inga tawe lumuassa, taumata ringannu lilangkamal᷊e'a sarun maasomba silaka.

²¹Maasomba ana'a longonna atappasanne naasomba asasusa; maola'a iamangngu ana'a woddo tawe mangonggollu al᷊al᷊uassa.

²²Naungnga apan lulluassa maapia waddangnga; naungnga apan massusa maal᷊eo ikkatta.

²³Mallaṛṛungnga apan mangngempe, mannengkamma roitta aonggolla ringannu mal᷊annabba wuṛṛu tawe mangamattu atatul᷊idda.

²⁴tuddan taumata apan pia pasasunna eteudde tadea'u maasomba apande, arawe tuddan taumata woddo tawe tantunne.

²⁵Ana'a apan woddo mappasusan iamangnge, wuṛṛu mapal᷊uain naungngu inangngene.

²⁶Tawe su ṛinone mangandangngu denda su taumata apan tawe sal᷊ane; tawe su ṛinone mangallangnga taumata apan mapia.

²⁷Taumata apan matakko'a ṛingiranne, tawe bisarane manambo. Taumata pande, sidutu matammudda.

²⁸Sangkatou woddo lai sarun sunnanna pande wuṛṛu pia asingkatta amungkangngu i tou mal᷊annabba wuṛṛu uatinnannanga.