Read Talaud AMSAL 20 Bible Online

AMSAL 20 - Talaud bible

AMSAL 20

¹Ua'e apan maawu'anna maaola'a taumata tawe atoranne wuṛṛu mahio. Nawoddote taumata apan ma'inumma ma'oman sara iwu'anne.

²Asasa'un datu naal᷊ihidda tingikku singa; taumata apan mandantan asasa'une udde atappasanne mannilakka watanganne sassane.

³Tumba'u taumata woddo apan maapulu matatiakka; pallal᷊agu apan raddaloanna eteudde mangindaun patatiakka.

⁴Mabbawailla apan malassa tawe mammanara wawail᷊anne sutempone; panginsueanne sutempo mangitingnga wawail᷊anne tawe hassine apa-apa.

⁵Lal᷊oṛṛon naungngu taumata sasummandinge ere paṛṛihi apan mal᷊al᷊umma; tawe asiannu taumata apan tawe pasasunna.

⁶Manambo taumata apan mangnga'u watanganne hawe, arawe apan atonna-tonna satia, masahadda paddeaanne.

⁷Al᷊aṛṛana'a naauntungnga amungkangngu pia iamangnga apan mapia wuṛṛu mabbiakka matul᷊idda.

⁸Napawe ratu uma'ianna udde adderan pallaṛṛuunganna, i tou maasilo sarangkanambone apan dal᷊eo.

⁹Apa pia taumata apan wotongnge mabbisara, “Naungku waresi, i ya'u nal᷊iute wuassu rosa?”

¹⁰Timbanganna wuṛṛu aul᷊aanna mallinga ipaadirin MAWU.

¹¹Wuassu inolaannu ana'a wotongnge asingkatanna apa pallal᷊agune mapia wuṛṛu matul᷊idda.

¹²Tal᷊inga ipaddaringikka wuṛṛu mata ipa'ellega, itarua udde ete MAWU apan nandiaddi.

¹³Taumata apan taṛṛa atiilla sarun maasiangnga. Taumata apan maṛṛimadda mammanara uatahuanna manambo anna.

¹⁴Mamamalli sidutu sussal᷊iomannu aregga masaggadda. Arawe napawe buatte namalli lulluassa ringannu aregga apan niasombanganne.

¹⁵Manga wisara apan lal᷊oṛṛoannu asingkatta, maareganna wuassu wul᷊awanna ara'e berlianna.

¹⁶Isai mappulu mamaekka utangngu taumata waine, wotongngete anuanna darotongnge maola'a wataṛṛun riandine.

¹⁷Darotongnga ina'ulen mallinga, paarorone matemangnga nenengnge, arawe wua'udde pendamanna ere temangngu wakka.

¹⁸Hol᷊aga pia gessine ana waugu iaṛṛingidda; ana waugu udde, ariete mattingkasahadda tantal᷊anna hol᷊aga taambe naatokka mapia.

¹⁹Taumata apan mal᷊uassa ma'umbilangngu taumata waine, tawe mapangaddapingnga; imbaṛṛangnga maggawen taumata apan matal᷊imoṛṛonganna.

²⁰Taumata apan mammontoga hagurangnge, wiakke sarun mawul᷊i naal᷊ihidda sol᷊o nappaddumma su ṛabbi wasa.

²¹Darotongnga apan paarorone niasombanganna ringannu mal᷊ihakka, panginsueanne inauranna wal᷊ine al᷊amatta.

²²Imbaṛṛangnga mabbal᷊issa al᷊al᷊eo ringannu al᷊al᷊eo lai; pangimante MAWU, ete i Tou apan sarun mantul᷊ungnga.

²³Aul᷊aanna wuṛṛu watun timbanganna apan mallinga tawe ial᷊uassa MAWU.

²⁴MAWU buatte nanantunnu lal᷊annu pabbiaṛṛannu taumata su runia indi; waugu udde taumata tawe maasunna lal᷊annu pabbiaṛṛanne sassane.

²⁵Paṛṛingidda paapia-pia tantal᷊anna taambe maddiandin sasamba su MAWU. Wotongnge mariaddi i'o sarun sumassilla sal᷊immurine.

²⁶Ratu apan pande masingkattu isai taumata lal᷊eo; i tou sarun makkuumanni mangitou ringannu tawe ampungnge.

²⁷Lal᷊ummu naungngu taumata udde asasemakka wuassu MAWU apan mannemakka ahewallu naungnga.

²⁸Amungkangngu ratu mamarenta ringannu darangngu, atonna wuṛṛu matul᷊idda, ne i tou sarun sidutu uataṛṛino.

²⁹Taumata dario'a raddaloanna ana waugu atatohanne, wuṛṛu taumata timmade aaddatanna ana waugu owanne.

³⁰Taṛṛaassa ola'u pabbiaṛṛanna masahadda mammappassa al᷊al᷊eo, wuṛṛu mammaresi naungngu taumata.