Read Talaud AMSAL 23 Bible Online

AMSAL 23 - Talaud bible

AMSAL 23

¹Napawe i'o uma'ianna umanna ringannu sangkatou tembonanne, paanungete isai i tou.

²Napawe i'o pia pulu umanna apan wahewalla, taṛṛangate apulunu udde.

³Arie mabbal᷊iu su anna matemangnga apan nisarune, asinungka i tou sarun maggau si'o.

⁴Imbaṛṛangnga mattinsahadda tadea'u maddea'a maala. Addoa'e apulunu udde.

⁵Ana waugu tumba'u sulal᷊ummu sangkaṛṛondappa darotongngu sarun mawul᷊i, ereola'u i tou pia papaidde wuṛṛu tumalla'a su winabbawa ere manu'a rajawali.

⁶Imbaṛṛangnga umanna ringannu taumata mapiikka. Imbaṛṛangnga lai numemma anne apan matemangnga.

⁷Ana waugu, i tou sarun mabbisara, “Wette umanna; panamba'o lai,” sumbal᷊i pandumanne wal᷊ine aroddi. I tou tumba'u mangngarassa, arawe sulal᷊ummu naungnge wal᷊ine.

⁸Sal᷊immurine biakka apan buatte niallummu, imutanu apia, wuṛṛu manga wisaranu apan mapia si tou tawe gunane.

⁹Ariewe manantiro taumata woddo; i tou sarun tawe mangaregan tatantironu udde.

¹⁰Imbaṛṛangnga saran paassa manesse'u passarannu leta'a pussa'a ara'e manganu leta'a ana'a asisintimpal᷊ussa.

¹¹Ana waugu, MAWU udde mananamba'a apan matohassa ete i Tou apan manamba'a si mangitou lumawangnga si'o.

¹²Panutukke al᷊aṛṛa'u hurunu wuṛṛu paaṛṛimadda umurumma al᷊aṛṛa'a.

¹³Ariewe paasamballa mangaṛṛa'a anangngu. Amungkangngu i'o mamuulla si tou ringannu ue, i tou tawe mate,

¹⁴ewe'e sarun masal᷊amatta.

¹⁵Ana'u, i tou mal᷊uassa atonna amungkangngu i'o pande.

¹⁶I ya'u lullala'a amungkangngu maaringikka si'o maggahatton bisara naṛṛino.

¹⁷Imbaṛṛangnga mannaungnga lal᷊eo su taumata marosa. Paatuṛṛutte sidutu su Ruata,

¹⁸tadea'u sutempo addantane i'o maralukka wuṛṛu pangangantimmu tawe mawul᷊i.

¹⁹Paddaringikka, ana'u! Ariaddite pande. Panutukke paapia-pia lal᷊annu pabbiaṛṛannu.

²⁰Imbaṛṛangnga maggahawen taumata taṛṛa wu'anna ara'e mawal᷊iu,

²¹ana waugu i mangitou sarun mabbal᷊i asiangnga. Amungkangngu i'o mangke mattiilla, ne tate lai mal᷊annu i'o sarun malluṛṛen laubba nahahesa'a.

²²Paatuṛṛutte iamangngu; ana waugu, tawe i tou, i'o tawe baddi'a su runia. Amungkangngu inangngu timmadete, paelleha'a manungku i'o mangngaddatta si tou.

²³Al᷊aṛṛa'a apan atonna, apande, aehetta, wuṛṛu pasasunna — sarangkanambone udde wotongnge awallianna, arawe tumaniten maarega amungkangngu iwal᷊u'a.

²⁴Sangkatou iamangnga sarun lumuassa amungkangngu anangnge pia pallal᷊agu mapia; i tou sarun lumuassa amungkangngu anangnge pande.

²⁵Antimanna hagurangngu lumuassa su saruannu; antimmanna lulluasse wawine apan nanungkangngu.

²⁶Panutukke paapia-pia wuṛṛu pattannote ola'u pabbiaṛṛangku, ana'u!

²⁷Wawine masandaga apan sussandaga udde sedda apan maasilaka.

²⁸I mangitou mangngampangnga ere mallaṛṛampassa wuṛṛu naaola'a manambo esakka sussandaga.

²⁹Masingkatawe i'o apa apan sarun mariaddi su taumata apan ma'inumma anggore tumaniten manambo, wuṛṛu masokka mattemma ua'e maawu'anna? Taumata udde susa wuṛṛu uatataṛṛangnga. I tou sidutu uatatiakka wuṛṛu sussal᷊iomanna. Matane maṛṛamutta wuṛṛu awangnge nangkal᷊essa, salaiwe sarangkanambone udde wotongnge ial᷊inda'i tou.

³¹Arie pabbala'a anggore mamono'a si'o, salaiwe saṛṛene tumaniten maanemma wuṛṛu aasiloanna lullendappa sulal᷊ummu halasi see mangngelekka ringannu piane sulal᷊ummu tonggol᷊anna.

³²Tiṛṛabbine marua allo i'o sarun maapendamma ere niapattu atoanna mawisa.

³³Matanu maanumpitanna, ṛingirannu niumal᷊iwu wuṛṛu moṛṛongngu mattaṛṛupassi.

³⁴I'o uapendamma naal᷊hidda ere su pentakku tiangngu apalla su tangngan tahal᷊oangnga; puanu tuttiri wuṛṛu i'o lullenggete.

³⁵Ana see i'o sarun mabbisara, “Al᷊imangke i ya'u nipuulla wuṛṛu niperon taumata, arawe i ya'u tawe maanaungnga apa apan buatte nariaddi. Uare, i ya'u tumaniten aamatiil᷊anna! I ya'u ṛinone ma'inumma apia!”