Read Talaud AMSAL 24 Bible Online

AMSAL 24 - Talaud bible

AMSAL 24

¹Arie pannaungnga lal᷊eo su taumata lal᷊eo, wuṛṛu arie paggahawen mangitou.

²I mangitou tumba'u maṛṛingiddu araṛṛagissa wuṛṛu tumba'u maggahatton apa apan maasilaka.

³Amonanna niola'a ringannu apande wuṛṛu pasasunna.

⁴Wuṛṛu amungkangngu pia asingkatta, ne manga wabbo'ane sarun al᷊oṛṛoanna ringannu nasuungnga manga saranapa maarega wuṛṛu maṛṛansangnga.

⁵Taumata pande massaraunganna wuassu taumata matohassa; asingkatta mappianne wuassu auatanna.

⁶Ana waugu tantal᷊anna taambe napapangalo ṛinone pia hol᷊aga apan naatokka paarorone, wuṛṛu lembon manambo mananantiro, pia antimma wahewalla manungku sarun maauntungnga.

⁷Taumata woddo tawe maasunna apande. I tou tawe maawisara sarangkadio'a amungkangngu taumata tantal᷊anna uahahatton manga hatto mahuna.

⁸Taumata apan sidutu manggol᷊agu al᷊al᷊eo, sarun isaggo mangangul᷊a'ukka.

⁹Suapan hol᷊agu taumata woddo uddewe rosa. Taumata apan sidutu mappasal᷊an taumata waine, tawe aranguannu anambon taumata.

¹⁰Napawe i'o niawul᷊iannu antimma sulal᷊ummu tempo apan susa, ne i'o nasutta taumata lome.

¹¹Arie mapapaddua mamallossu taumata apan buatte niṛṛumanna pateanna; ambangewe taumata apan tantal᷊anna iaapidda su tampa panggahantonganna.

¹²I'o wotongnge mabbisara, “Udde wal᷊ine manara'u.” Arawe Ruata ual᷊u'adda si'o. I tou masingkatta wuṛṛu makkungnga ṛingirannu. I tou mabbal᷊issa taumata tumuṛṛuttu inolaanne.

¹³Ana'u, pa'inumpe pul᷊a, ana waugu udde mapia. Su ereapa pul᷊a wuassu sal᷊akku langone, matemangnga inumanna,

¹⁴aroddi lai apande mapia su ṛimuuddu. Amungkangngu i'o pande, masemakke wiakku sutempo addantane.

¹⁵Imbaṛṛangnga ere taumata lal᷊eo apan ma'ire makkampassa taumata matul᷊idda wuṛṛu mangaṛṛo wal᷊ene.

¹⁶Ana waugu, salaiwe taumata matul᷊idda masokka manawo, i tou sidutu sarun rumarisikka apia. Arawe mawal᷊i'a, taumata lal᷊eo sarun maṛṛimunsa'u asasilaka.

¹⁷Ariewe lumuassa amungkangngu seennu masilaka, wuṛṛu arie lumala'a amungkangngu i tou manawo.

¹⁸Ana waugu, MAWU sarun ma'ellega inolaannu udde wuṛṛu mattiala al᷊al᷊eone, ana see tate lai makkuumannu seennu udde.

¹⁹Imbaṛṛangnga masa'u ara'e mal᷊al᷊eo naungnga su taumata lal᷊eo.

²⁰Taumata lal᷊eo tawe tempo addantane wuṛṛu tawe antimma.

²¹Ana'u, ata'uten MAWU, wuṛṛu pangaddate ratu. Arie pallaṛṛenggennu taumata lal᷊eo apan lullawangnga si mangitou.

²²Taumata ereudde wotongnge mate sulal᷊ummu sangkaṛṛondapa, ana waugu silaka apan niaparantan Duata ara'e ratu wal᷊ine hatto addio'a.

²³Manga taumata pande buatte nabbisara ereindi: Mallaṛṛuungnga tawe wotongnge mangempe samba'a.

²⁴Amungkangngu taumata nassal᷊a iwal᷊one tawe nassal᷊a, ne mallaṛṛuungnga udde sarun wontohanna wuṛṛu lelannu anambon taumata.

²⁵Arawe mallaṛṛuungnga apan nakkuumannu taumata nassal᷊a sarun su lal᷊umanna'a wuṛṛu aaddatanna.

²⁶Sasimbakka apan naṛṛino eteudde tatialan paggahawe tutune.

²⁷Imbaṛṛangnga mapararisikku putunganna tantal᷊anna i'o taambe nanaddia wawail᷊annu wuṛṛu taamben mammanara.

²⁸Imbaṛṛangnga maola'a matatiala su taumata waine ringannu tawe pinangiananne apan mapia; wuṛṛu arie lai mangawusu su ola'i tou.

²⁹Arie mabbisara, “I ya'u sarun mabbal᷊issa si tou sarangkanambone apan buatte niola'i tou si ya'u!”

³⁰Su paassa i ya'u buatte sinumabbi wawail᷊anna wuṛṛu waillu anggore tatahuannannu sangkatou malassa apan woddo.

³¹Apan ta'u niasiloanna isudde tumba'u sinuananna ṛoaanna wuṛṛu manga akke. Tatandangnge lai naṛṛaate.

³²Napawe i ya'u nanutukka wuṛṛu naṛṛingiddu olangnge udde, i ya'u naasomba al᷊aṛṛa'a indi:

³³Ringannu mangngiolabba wuṛṛu mattiilla tal᷊angkadio'a, ringannu ua'ianna uaṛṛiwa lima wuṛṛu mangngillol᷊o tal᷊angkadio'a,

³⁴awussa wuṛṛu paasiangnga nirumanta namangalo ere mallaṛṛampassa pia ahidde.