Read Talaud AMSAL 27 Bible Online

AMSAL 27 - Talaud bible

AMSAL 27

¹Arie tumaṛṛupassi su ola'u allo tiṛṛabbi, ana waugu i'o wagga apan sarun mariaddi tiṛṛabbi.

²Imbaṛṛangnga maddalo watangannu sassane; tanasa'e taumata waine apan ma'ola'a olangnge udde, ewe'e lai iapa awaganannu.

³Watu wuṛṛu anne udde ta'e maṛṛanna, amungkangngu isumandingngu taddu'u naungnga apan niaparantan taumata woddo.

⁴Asasa'u udde maṛṛaggissa wuṛṛu maasongkakka, arawe sumaruanna lu'adda isai maataṛṛangnga?

⁵Mapianne tataggu apan uahahati sul᷊ungnge darangngu apan niapasabbangnga.

⁶Hawe mammuullu darangngu, arawe seetta makka'uppu racunna.

⁷Amungkangngu mal᷊aidda, pul᷊a lai itola; amungkangngu mal᷊unussa, iapa mapetta lai pendamanna matemangnga.

⁸Taumata apan mannantangngu wal᷊ene, naal᷊ihidda manu'u winalanganna apan nanantangngu sal᷊akke.

⁹Su ereapa lana mawangngi wuṛṛu manga wawangngi maal᷊uassa naungnga, aroddi lai apapian hawe maal᷊uassa naungnga.

¹⁰Arie paabul᷊iane hawenu ara'e hawen iamangngu. Sulal᷊ummu asasusa imbaṛṛangnga maisumbala su tuṛṛangngu; al᷊indonganna marani maareganna wuassu tuṛṛangnga apan marau.

¹¹Ana'u, ṛinonewe i'o pande, tadea'u i ya'u mal᷊uassa wuṛṛu maasimbakka amungkangngu inseṛṛoanna.

¹²Taumata pande mallinda'a napawe maasilo silaka; taumata woddo sidutu u'amatta wua'udde niaṛṛiaannu silaka.

¹³Isai apan mamasanna utangngu taumata waine, wotongnge anuanna darotongnge maoala'a wataṛṛun riandine.

¹⁴Isai marua allo maṛṛanggapa mattabea su manga hawene ringannu tingikka ma'ikkatta, udde ere mammontoga.

¹⁵Awingnga apan apulune uatatiakka naal᷊ihidda tingikku uranna nangansalla allo massallo.

¹⁶Tawe maola'a i tou iapal᷊annabba, naal᷊ihidda anginna apan tawe ataṛṛanganna wuṛṛu lana apan tawe iaṛṛangkumma.

¹⁷Su ereapa atta'a mangasan atta'a, aroddi lai taumata massi'ol᷊a su sansul᷊ungnge.

¹⁸Isai mappadul᷊i aaluanna, sarun umanna wuane. Mangangimbe sarun iarega amungkangngu marangngu mawune.

¹⁹Su ereapa ua'e pallintauannu hatinu, aroddi lai hatinu mapal᷊iatta'u watangannu.

²⁰Su runian taumata nate, sidutu pia tampa; aroddi lai apulun taumata tawe pattaal᷊anne.

²¹Wul᷊awanna wuṛṛu sal᷊a'a iannamma sulal᷊ummu auntapanna; taumata asingkatanna wuassu ala'uanne sutempo raloanna.

²²Salaiwe taumata woddo heseṛṛanna ma'ikka-ikkatta, tawe mawul᷊i awawoddone.

²³Paddul᷊ianete winatangngu mapia-pia,

²⁴ana waugu paa'ala tawe mattaṛṛangnga mal᷊annu, ewe'e lai taṛṛino ipamarenta lai sidutu saran mal᷊annu-l᷊annu.

²⁵Nannal᷊o su wawail᷊anna wuṛṛu wowone wabbasanna wuṛṛu iammulla maola'a annu winatangngu udde, arawe tantal᷊anna udde tinumuwote nannal᷊o wakku.

²⁶Wuassu wambul᷊un manga dombanu i'o maasomba laubba, wuṛṛu wuassu roitta la'unnu sambageanganna manga ambingngu i'o wotongnge mamalli leta'a wakku.

²⁷Wuassu manga ambingngu waine i'o wotongnge maasomba susu see lai manga amonannu see mangangimbenu.