Read Talaud AMSAL 29 Bible Online

AMSAL 29 - Talaud bible

AMSAL 29

¹Isai sidutu lullawangnga awungkangngu tantiroanna, su sambau tempo sarun mawinasa wuṛṛu tate maola'a apia.

²Amungkangngu taumata mapia mamarenta, lal᷊oṛṛon soa mal᷊uassa. Arawe amungkangngu taumata lal᷊eo uaparenta, tumana'u soa uatataṛṛangnga.

³Isai mappulun apande, maal᷊uassa naungngu iamangnge. Isai maggahawen taumata masandaga maggolo'a roinne.

⁴Amungkangngu tembonanne uaagassa atatul᷊idda, wanuane sarun matohassa. Arawe amungkangngu i tou wal᷊iun doitta, wanuane sarun manawo.

⁵Isai maddalo sansul᷊ungnge taumata, mantaingngu sedda su watanganne sassane.

⁶Taumata lal᷊eo niasongngannu sedda ana waugu rosane, taumata matul᷊idda uapendamma mal᷊ussa wuṛṛu lal᷊umanna'a.

⁷Taumata mapia masingkattu hakku taumata lome, arawe taumata lal᷊eo tawe maasunna.

⁸Taumata apan apulune mannangkulla maasongkakku soa, arawe taumata pande mapal᷊annabbu paggahahio.

⁹Amungkangngu taumata pande wuṛṛu taumata woddo maggahatto, taumata woddo udde tumba'u mandona wuṛṛu lullage na'oman sara mandantan paggahahio.

¹⁰Taumata apan masaṛṛionto'a naungnge ipabbinsin taumata apan maroun daṛṛa, arawe lal᷊u'arannu taumata mapia.

¹¹Taumata woddo mandona uahahati, arawe taumata pande masabbare wuṛṛu makkaddannu asasa'u.

¹²Amungkangngu tembonanne ma'imanna su watti'a awusu, mamanara sarangkanambone sarun maola'a lal᷊eo.

¹³Sangkatou asiangnga wuṛṛu mangangallange udde uasul᷊ungnga; sitarua MAWU nangonggollu mata ipa'ellega asasemakku pabbiaṛṛanna.

¹⁴Amungkangngu ratu mannamba'a taumata lome, su tonnane i tou sarun mamarenta.

¹⁵Tatantiro wuṛṛu tatagu maapande taumata. Ana'a apan sidutu babbatu'anna apulune sarun mamansili inangngene.

¹⁶Amungkangngu taumata lal᷊eo mamarenta, lal᷊awangnga aatambanna. Arawe taumata matul᷊idda sarun maasilo ananawon taumata lal᷊eo.

¹⁷Aṛṛa'ete anangngu, ne i tou mangonggollu atatammudda si'o, wuṛṛu maola'a al᷊al᷊uassu naungngu.

¹⁸Walahanna apan tawe naasomba aehettu MAWU mabbal᷊i walahanna apan napenen pabbawawul᷊o. Lal᷊umanna'a su taumata apan matuṛṛutta titan MAWU.

¹⁹Sangkatou allangnga tawe wotongnge tumba'u aṛṛaannu wisara. I tou maasunna, arawe waggan pandumanne.

²⁰Mannamboanna antimma su taumata longonna, wuassu taumata apan mabbisara arawe tawe maṛṛingidda dorone.

²¹Allangnga apan a'entenganna ro'en ta'e dario'a, panginsueanne mabbal᷊i pua maattikka.

²²Taumata apan mal᷊ihakka masa'u maaola'a manambo taumata matatiakka wuṛṛu marosa.

²³Taumata matanggakka sarun iapawawo; taumata naungnge masaṛṛionto'a sarun raloanna.

²⁴Taumata apan mammanara suadio'a ringannu manana'o, atappasanne mabbinsin batanganne sassane. Amungkangngu i tou mabbati'a atonna su pallaṛṛuunganna, i tou sarun iṛṛuumanna. Arawe amungkangngu i tou sidutu mal᷊annabba, i tou sarun aṛṛinoannu wawontogu Ruata.

²⁵Matta'uttu addapattu taumata, pangillul᷊eanne asasusa. Pangimante MAWU, ne i'o sarun matammudda.

²⁶Manambo taumata apan maddea'a aranna su tembonanne, arawe mangonggollu atatul᷊idda tumba'u MAWU sassane.

²⁷Taumata mapia tawe mal᷊uassa ringannu taumata lal᷊eo; taumata lal᷊eo maddantinnu taumata mapia.