Read Talaud AMSAL 3 Bible Online

AMSAL 3 - Talaud bible

AMSAL 3

¹Ariewe paabul᷊iane sarangkanambone apan buatte ta'u niaṛṛa'a si'o, ana'u. Naungewe sidutu parenta'u,

²tadea'u mal᷊o'engnga uukku wuṛṛu i'o mabbiakka su al᷊aluassa.

³Ṛinone i'o sidutu mangngimanna wuṛṛu satia su Ruata wuṛṛu su sansul᷊ungngu taumata. Naungewe udde, wuṛṛu sahipunte sulal᷊ummu naungngu,

⁴tadea'u i'o ilalluassa wuṛṛu a'ellehannu Ruata wuṛṛu taumata.

⁵Pangimante MAWU ringannu ahewallu naungngu, wuṛṛu ariete mangasakku pasasunnanu sassane.

⁶Pannaungke MAWU sulal᷊ummu al᷊awo'u manaranu, ne i Tou sarun mamiaṛṛangngu lal᷊annu pabbiaṛṛanna apan mapia.

⁷Arie mangngasakku watangannu mappandeanna wuassu apan suṛṛinone; ewe'e paatuṛṛutta MAWU wuṛṛu pangindaute wuassu al᷊al᷊eo.

⁸Inolaannu udde sarun maola'a ere undamma si'o apan maapia waddangngu wuṛṛu mallimbakku lal᷊ummu naungngu.

⁹Pangaddate MAWU ringannu mangonggolla si Tou sambau saranapa apan apianne wuassu al᷊awo'u darotongnga wuṛṛu hessin sasuannu,

¹⁰ne manga wal᷊ingkakku sarun mapenen gandumma wuṛṛu ua'e anggore sarun tumomope'e na'oman sara tate tampa pangaddoanne.

¹¹Napawe MAWU makkuumannu, ana'u, sengkammawe udde maoala'a sambau pannanaunganna, wuṛṛu ariewe naungngu sumassillu al᷊aṛṛang-Nge udde.

¹²MAWU mammuulla taumata apan arangnguan-Ne, naal᷊ihidda sangkatou iamangnga mammuulla anangnge apan arangnguanne.

¹³Lal᷊umanna'a su taumata apan naola'a pande wuṛṛu naasomba paasasunna.

¹⁴Auntunganne maggewal᷊anna wuassu sal᷊a'a, wuṛṛu maareganna wuassu wul᷊awanna.

¹⁵Asingkatta maareganna wuassu watu permata; al᷊awo'a apan ipaapulunu taweddu maasul᷊ungnga.

¹⁶Asingkatta mangngonggollu uukka mal᷊o'engnga, paa'ala wuṛṛu awawantuga.

¹⁷Asingkatta ma'ola'a wiakku masunge wuṛṛu matahul᷊andimma.

¹⁸Taumata apan uaagassa matohassa su asingkatta sarun mabbiakka tutune wuṛṛu su lal᷊umanna'a.

¹⁹Ringannu asingkatta, MAWU nandiaddi runia; ringannu darangngu-Ne i tou namilattu langitta su tampa-Ne.

²⁰Ringannu asingkan-Ne i tou nandiaddi manga al᷊imatan kua'e su al᷊ungngu leta'a nawa'a pangeleṛṛannu ua'ene see lai winabbawa su langitta nanossokku ua'e su runia.

²¹Ana waugu udde, paaṛṛamiate su asingkatta wuṛṛu su paṛṛaringidda apan mapia, ana'u! Arie saran paassa udde ipallossa,

²²ne pabbiaṛṛannu sarun papadul᷊iananna — maṛṛamaga wuṛṛu maal᷊uassa.

²³I'o sarun umamatta su al᷊al᷊angnganna, wuṛṛu sarun tawe matara.

²⁴I'o sarun matiilla ringannu tawe apendamma matta'utta, wuṛṛu i'o maatilla mal᷊angnga su al᷊o'engngu ṛabbi.

²⁵Ariete i'o mata'uttu asasilaka apan sarun rumanta ringannu sangkaṛṛondappa ere anginna ma'ikkatta, wuṛṛu namate manga taumata lal᷊eo.

²⁶MAWU sarun mallu'adda si'o. I Tou tawe mamalanu mataṛṛo sulal᷊ummu sedda.

²⁷Amungkangngu i'o pia lebbene ipa'ola'a apapia su taumata apan mappandumma apapianu, ariewe i'o manola'a ma'ola'a olangnge udde.

²⁸Ariewe mandolokku sansul᷊ungngu taumata maṛṛaddo sara tiṛṛabbi, amungkangngu su orassa udde lai i'o wotongnge mantul᷊ungnge.

²⁹Ariewe makkiinnu sambau inolaanna apan maarugi sansul᷊ungngu taumata apan uatana'a maraninu wuṛṛu mangngimanna si'o.

³⁰Ariewe matatiakka tawe pinangiananne ringannu sangkatou apan saran paassa tawe na'ola'a al᷊al᷊eo si'o.

³¹Ariewe naungngu mal᷊al᷊eo su taumata apan maṛṛagissa, wuṛṛu arie pattanno pallal᷊aghun mangitou.

³²Waugu, MAWU maddantinnu taumata apan ma'ola'a al᷊al᷊eo, arawe i Tou uaaukku taumata apan biakke matul᷊idda.

³³MAWU mamontoga wal᷊en taumata lal᷊eo, arawe mangngal᷊amatta wal᷊en taumata apan matuṛṛutta si Tou.

³⁴MAWU maddantinnu taumata matanggakka naungnge, arawe mangngal᷊amatta taumata naungnge mawawo.

³⁵Taumata pande sarun aatambanna awangngin aranne, arawe taumata woddo mangke aatambanna pasasal᷊ane.