Read Talaud AMSAL 4 Bible Online

AMSAL 4 - Talaud bible

AMSAL 4

¹Ei manga al᷊aṛṛana'a, paddaringikke al᷊aṛṛa'u iamangngu! Paatutuṛṛe udde, ne i'o sarun mabbal᷊i masiṛṛungnga.

²Ta'u iaaṛṛa'a si'o indi mapia, ana waugu udde ariewe i'o tawe maddaringikka al᷊aṛṛa'a udde.

³Sutempo i ya'u ta'e al᷊aṛṛana'a, ana'a tinggassan hagurangku,

⁴i ya'u aaṛṛannu iamangku. I tou mabbisara, “Paanaungete manga tatantiro'u, imbaṛṛangnga i'o maabul᷊ine. Amata'e manga tatantiro'u tadea'u i'o sidutu mabbiakka su lal᷊umanna'a.

⁵Ariaddite masiṛṛungnga wuṛṛu pande! Naungete sidutu manga tatantiro'u wuṛṛu arie paddammea'a.”

⁶Arega'e asingkatta udde, ne asingkatta sarun mallu'adda si'o; pandangngute si tou ne i tou sarun mandiaga si'o tadea'u sidutu mal᷊angnganna.

⁷Apan ṛinone olaanna paarorone eteudde pattinsahadda maola'a masiṛṛungnga. Al᷊awo'a apan raddeaannu, arawe paarorone eteudde pattinsahadde maaddea'a pasasunna.

⁸Wattea'e asingkatta, ne i'o sarun itanggakki tou. Ṛa'uppa i tou, ne i Tou sarun mandantan awawantuga si'o.

⁹I tou sarun mangonggollu wantin bunga apan maṛṛansangnga si'o tadea'u maola'a mahkotanu.

¹⁰Paddaringikke si ya'u, ana'u! Panutukke paapia-pia manga tatantiro'u, ne uukku sarun mal᷊o'engnga.

¹¹I ya'u buatte nangaṛṛa'u asingkatta si'o wuṛṛu buatte nangaṛṛa'u ola'u mabbiakka apan mapia.

¹²Amungkangngu i'o mabbiakka aroddi, ne tawe sal᷊awangnge sutempo u'amatta, wuṛṛu sarun tawe itara sutempo tuttutal᷊angnga.

¹³Paanaungete sidutu al᷊aṛṛa'a apan buatte nisengkammu wuassia'u. Pal᷊u'are udde mapia-pia, ana waugu ringannu al᷊aṛṛa'a udde pabbiaṛṛannu pia hessine.

¹⁴Arie manantuṛṛutta lal᷊annu pabbiaṛṛannu taumata lal᷊eo wuṛṛu arie pattanno inolaanni mangitou.

¹⁵Arie paṛṛingiddi mangitou. Linda'a i mangitou wuṛṛu sidutua'e amatannu!

¹⁶Taumata lal᷊eo tawe maatiilla tantal᷊anna taambe na'ola'a al᷊al᷊eo. I mangitou tawe amatiil᷊anna tantal᷊anna taambe napanilaka taumata waine.

¹⁷Al᷊al᷊eo wuṛṛu araṛṛagissa udde naola'a ere anna wuṛṛu ua'en mangitou.

¹⁸Dal᷊annu taumata lal᷊eo marandumma ere randummu ṛabbi. I mangitou natara wuṛṛu nanawo awagananna. Arawe lal᷊anna apan aamatannu taumata mapia mangke ere matannallo sussabbangnga; mallannu massemakka, sara panginsueanne mabbal᷊i masema-semakka.

²⁰Panutukke manga wisara'u, ana'u! Paddaringikke manga tatantiro'u.

²¹Ariewe paddammea'a, ewe'e sahipunte sidutu sulal᷊ummu naungngu.

²²Taumata apan maasunna sarun masal᷊amatta wuṛṛu maola'a lal᷊umanna'a.

²³Paariagai mapia-pia naungngu, ana waugu ete naungngu apan manantunnu lal᷊annu pabbiaṛṛannu.

²⁴Imbaṛṛangnga saran paassa mabbisara tawe suṛṛinone. Paaraua'e manga wisara wahia wuṛṛu manga wisara apan pandumanne i pangngil᷊iwun taumata.

²⁵Ṛinone hatinu mammasilon atatul᷊iddu naungngu; tawe ṛinone paṛṛimaunanapa ereola'u pia sampu su samba'an batu.

²⁶Ṛingira'e paapia-pia tantal᷊anna taambe mamanara, ne i'o sarun mahessi sulal᷊ummu al᷊awo'u inasaharannu.

²⁷Pangindauten al᷊al᷊eo, wuṛṛu pabbiakke ringannu matul᷊idda. Imbaṛṛangnga sumewadda wuassu lal᷊anna apan atonna.