Read Talaud AMSAL 5 Bible Online

AMSAL 5 - Talaud bible

AMSAL 5

¹Ana'u, paddaringikke si ya'u! Panutukke apande'u wuṛṛu pasasunna apan ta'u iaṛṛa'a si'o,

²tadea'u i'o masingkatta ereapa ṛinone mangapiddu watangannu wuṛṛu mabbisara ere taumata apan pia asingkatta.

³Wawine masandaga, moṛṛongnge matemangnga ere pul᷊a, wuṛṛu manga hattone maawol᷊engnga naungnga,

⁴arawe napawe sarangkanambone nal᷊iudde, nallambe ete apapetta wuṛṛu asasusa.

⁵I'o niwol᷊engnga sinumossokka su runian taumata nate; lal᷊anna apan amatanne mattuddan papate.

⁶I tou tawe matatana'a su lal᷊anna apan mattuddan pabbiaṛṛanna; ringannu awagananna i tou nanewadda wuassu lal᷊anna udde.

⁷Ana waugu udde, al᷊aṛṛana'u paddaringikke manga wisara'u wuṛṛu arie paapise.

⁸Linda'a wawine ereudde! Ewe'e arie lai mangundanin bal᷊ene.

⁹Amungkangngu i'o maggawen bawine udde, i'o sarun awul᷊iannu awawantuga wuṛṛu niawanu sarun aṛṛoannu taumata apan wagga umakkanna.

¹⁰Paa'alanu sarun masue anuannu taumata wawine, wuṛṛu hessin inasaharannu sarun mabbal᷊i tatahuanannu taumata apan awaganannu.

¹¹Panginsueanne sarun sumal᷊iomanna, sutempo wadangngu masue inasannu radda'a.

¹²Wua'udde i'o sarun mabbisara, “Ah, anio ia'i maddantinnu tatantiro? Anio i ya'u maddiri tagguanna?

¹³I ya'u maddaringikka manga huru'u wuṛṛu maddiri tumuṛṛutta si mangitou.

¹⁴Inauranna i ya'u nanawote su aellegu awadaalla.”

¹⁵Ana waugu udde, paatul᷊idda su awingngu sassane wuṛṛu onggol᷊a'e darangngunu tumba'u si tou sassane.

¹⁶Tawe gunane i'o maddea'a atatemangnga su taumata apan bal᷊ine awingngu.

¹⁷Atatemangnga udde tumba'u si'o wuṛṛu su awingngu sassane, tawe ringannu taumata waine.

¹⁸Ana waugu udde, ṛinone i'o lumuassa ringannu awingngu sassane, paddea'a darangngu su maṛṛuala apan buatte niawingngu —

¹⁹maṛṛuala maṛṛamaga wuṛṛu mal᷊inso'a ere kijangnga. Wala'e araṛṛamagu waddangnge sidutu maawewa si'o wuṛṛu darangngune maawu'anna si'o.

²⁰Apa hunane pia apulun naungnga su wawine waine, ana'u? Ipa'ura uaapulun bawine masandaga?

²¹MAWU maasilo al᷊awo'a apan a'olaannu taumata. Suapan taumata umamatta MAWU ual᷊u'adda.

²²Rosan taumata lal᷊eo udde ere sedda apan ipannongnga taumata udde sassane.

²³I tou nate ana waugu tawe manengkamma tataggu. Awawoddone nangapiddi tou su lal᷊annu papate.