Read Talaud AMSAL 6 Bible Online

AMSAL 6 - Talaud bible

AMSAL 6

¹Ana'u, asinungka i'o buatte naddiandi su sangkatou taumata tadea'u mamaekka utangnge.

²Wuṛṛu wotongnge mariaddi i'o nul᷊usse su manga wisaranu wuṛṛu niasongngannu riandinu sassane.

³Amungkangngu atonna aroddi, ana'u, i'o sulal᷊umpen taṛṛinon taumata udde. Arawe indiwe lal᷊anne tadea'u i'o mapallossa: paal᷊ihakke inai ringannu taumata udde; sal᷊andete tadea'u i tou mappulu mamallonnu.

⁴Ariewe paatiilla dorone, wuṛṛu arie pangillol᷊o.

⁵Pallosa'e watangannu wuassu sedda udde ere manu'u winalanganna ara'e kijangnga napallossa wuassuu matataṛṛiasu.

⁶Taumata malassa ṛinone mattanno dal᷊annu pabbiaṛṛannu haṛṛammissa wuṛṛu massi'ol᷊a si tou.

⁷Haṛṛammissa tawe mamamiṛṛangnge, tawe tembonanne ara'e mallal᷊u'adde,

⁸arawe su al᷊annune tempon pangitinganna i mangitou mangngalluddu wal᷊unnu tempon ṛutumma.

⁹Maddatingngu tingngera i wolo'a udde mattiilla? Tingngerate i tou mappulu mabbangunna?

¹⁰I tou ua'ianna uaro'appu lima mangillol᷊o, wuṛṛu i tou mabbisara, “Ah, i ya'u matiilla tal᷊angkaddio'a, i ya'u aamatiil᷊anna.”

¹¹Arawe tantal᷊anna i tou mattiilla, i tou niaṛṛiaannu araṛṛutumma wuṛṛu paasiangnga apan nirumanta ere mallaṛṛampassa pia ahidde.

¹²Taumata lal᷊eo wuṛṛu tawe atoranne mammahia su anambon tampa.

¹³I tou mangngangkerammu mata wuṛṛu ma'isaratta tadea'u ipangawusu.

¹⁴Ṛingiranne apan mawukku'a napenen ṛiinna lal᷊eo wuṛṛu mamonsen patatiakka su al᷊awo'u tampa.

¹⁵Sarangkanambone udde maola'a silaka maṛṛia'a su watanganne ringannu mal᷊ihakka, wuṛṛu i tou mangke maṛṛimunsa'a.

¹⁶Pia pitu hatto apan ipaddantinnu MAWU wuṛṛu tawe iwala-Ne aroddi; Pallal᷊agu mawunga, moṛṛongnga taṛṛa wahia, ta'iakka apan namate taumata tawe sal᷊ane, ṛingiranna apan makkiinnu manga inolaanna lal᷊eo, ledda apan uasasaṛṛawutta mattudda al᷊al᷊eo, matatiala apan sidutu mammahia, wuṛṛu taumata apan mamonsen pabbawawul᷊o suwallattu sandingananna.

²⁰Ana'u, tuṛṛutte manga parentan iamangngu, wuṛṛu arie paabbul᷊iane manga tatantiron inangngu.

²¹Naungete sidutu manga wisaran mangitou wuṛṛu sahipunte udde sulal᷊ummu naungngu.

²²Manga al᷊aṛṛa'i mangitou sarun mangehetta si'o sulal᷊ummu amatanna, mallu'adda si'o sutempo ṛabbi, wuṛṛu mangonggollu tatantiro si'o sutempo i'o mabbangunna.

²³Manga tatantiron hagurangngu naal᷊ihidda sol᷊o apan masemakka; tataghun mangitou mannantiro si'o su lal᷊annu pabbiaṛṛanna apan mapia.

²⁴Ringannu aroddi i'o niaparau wuassu wawine masandaga, wuṛṛu wuassu manga sasal᷊o'a mawisan bawine awingngu taumata waine.

²⁵Ariewe i'o amono'annu araṛṛamagi mangitou, arie awol᷊engannu matan mangitou apan massal᷊o'a.

²⁶Wawine masandaga wotongnge waeṛṛannu aregan anna sanlama'a, arawe sussandaga ringannu awingngu taumata waine ṛinone waeṛṛannu niawa.

²⁷Wotongngewe taumata maṛṛiwa putungnga wuṛṛu tawe matutungnga laungnge?

²⁸Wotongngewe taumata manaiddanna waṛṛan putungnga tawe matutungnga leddane?

²⁹Udde asasilakane nassul᷊ungngu mattiilla ringannu awingngu taumata waine. Isai apan ma'ola'a inolaanna udde tawe mal᷊iu wuassu ṛuumanna.

³⁰Amungkangngu taumata manna'o anna, salaiwe waugu i tou mal᷊unussa, i tou sarun al᷊uandahanna.

³¹Wuṛṛu amungkangngu i tou niasametta i tou ṛinone mamaekka apia paapitu mallipa anambone; waugu i tou ṛinone awul᷊iannu al᷊awo'u darotongnga apan tatahuananne.

³²Arawe ereapate su manga esakka apan sussandaga? I tou manggohakku watanganne sassane! Tumanitewen boddo i tou!

³³I tou sarun sansaranna wuṛṛu heloanna. Aranne sarun mal᷊al᷊eo saran mal᷊annu-l᷊annu.

³⁴Ana waugu, ringannu inolaanne udde awingngu wawine udde maola'a mallu'adda, ma'oman sara asasa'une mangke aatambanna. Wuṛṛu napawe i tou mabbal᷊issa asasa'un naungnge, i tou tate apendamma u'akkanna.

³⁵I tou tate iasal᷊o'u roitta; salaiwe aonggolla ereapa anambone tawe ma'ompo'u asasa'une.