Read Talaud AMSAL 8 Bible Online

AMSAL 8 - Talaud bible

AMSAL 8

¹Paddaringikka! Apapande mangke mammago, asingkatta nattingikke.

²I tou uarisikka su manga wuidda su winggin dal᷊anna, wuṛṛu su manga pappengannu lal᷊anna.

³Su ngara wahewalla, su lal᷊anna sumutta watukku soa, isudde niaringiṛṛanna tingikke.

⁴“Ei, alu taumata, ete si'o i ya'u u'ui; suapan riaddianna su runia, panutukke wawago'u!

⁵I yamiu apan taambe natimu asingkatta su pabbiaṛṛanna, pangurumpe tadea'u ṛingirannu maṛṛoro; i yamiu apan longonna, pangurumpe tadea'u maola'a maasunna.

⁶Panutukke manga wisara'u, ana waugu sarangkanambone naṛṛino wuṛṛu maarega.

⁷Apan ta'u niwisara, sarangkanambone atonna, ana waugu i ya'u maddantinnu wawahia.

⁸Manga wisara'u matul᷊idda abbi, tawe saran sangkapaddi apan wengkolla ara'e nassal᷊a.

⁹Su taumata pande, wisara'u atonna, su taumata masiṛṛungnga wisara'u naṛṛino.

¹⁰Arega'e tatantiro'u nangillembo wuassu sal᷊a'a tutune, pakkoroa'e asingkatta nangillembo wuassu wul᷊awanna tutune.

¹¹Ete i ya'u asingkatta, maareganna wuassu berlian; tawe iasul᷊ungngu manga apa apan ipaapulunu.

¹²Ete i ya'u asingkatta; si ya'u pia pasasunna, asasiṛṛungnga wuṛṛu apande.

¹³Mangaddatta MAWU atappasanne maddantinnu al᷊al᷊eo; i ya'u maddirin awawunga wuṛṛu atatanggakka. I ya'u maddantinnu pallal᷊agu apan dal᷊eo wuṛṛu manga wisara apan awusu.

¹⁴Ete i ya'u apan nangonggollu tatantiro sulal᷊ummu naungnga. Wuṛṛu i ya'u lai apan napal᷊iatta'a. I ya'u pande wuṛṛu lai matohassa.

¹⁵Manga ratu ta'u nisumbalanna mappaamattu manarane, manga tembonanne ta'u nitul᷊ungnga manohassa atatul᷊idda.

¹⁶Ana waugu saha'u, manga tembonanne wuṛṛu manga papunna mammarenta wuṛṛu mappaamattu atatul᷊idda.

¹⁷I ya'u u'akkanni mangitou apan mappulu'u; apan maddea'a si ya'u, sarun maasangkalla si ya'u.

¹⁸Si ya'u nasaddiate paa'ala see lai awawantuga wuṛṛu lal᷊umanna'a.

¹⁹Apan niasombangannu wuassia'u nangillembo wuassu wul᷊awanna tutune; maareganna wuassu sal᷊a'a tutune.

²⁰I ya'u uatantuṛṛutta lal᷊annu atatul᷊idda, i ya'u lullempangnga su lal᷊annu apapia.

²¹Taumata apan mandangngu si ya'u, ta'u olaanna ala; wal᷊ene ta'u paneannu darotongnga.

²²I ya'u niriaddin MAWU naola'a paarorone, ete i ya'u lanna'u manara-Ne apan paarorone sutempon al᷊amona.

²³I ya'u niola'a ro'en panattaṛṛannu al᷊amona, su paarorone, tantal᷊anna runia taambe niriaddi.

²⁴I ya'u niasungkanga tantal᷊anna tahal᷊oangnga taambe niriaddi, tantal᷊anna taambe sinumabbangnga manga al᷊imatan kua'e.

²⁵I ya'u niasungkanga tantal᷊anna manga wowone taambe nipasi'a, tantal᷊anna manga wuidda taambe niapararisikka,

²⁶tantal᷊anna MAWU taambe nandiaddi runia wuṛṛu manga wadda'a, ewe'e lai tantal᷊anna taambe niolang-Nge ompengngu leta'a paarorone.

²⁷I ya'u ua'ellega sutempo langitta niwilatta, wuṛṛu winalanganna niattingnga su wowon tahal᷊oangnga,

²⁸sutempo MAWU nangaddon binabbawa su winalanganna, wuṛṛu manga matan ua'e su tahal᷊oangnga,

²⁹sutempo i Tou namarenta ua'en tahal᷊oangnga tadea'u imbaṛṛangnga lumewessa manga passaranne. I ya'u lai isudde sutempo apampakku runia niwilan-Ne.

³⁰I ya'u su sandiṛṛan-Ne naola'a ana'a arangnguan-Ne, allo-allo ete i ya'u ana'a apan maal᷊uassa si Tou; i ya'u sidutu mannalangnga su saruan-Ne.

³¹I ya'u lulluassa su wowon dunia-Ne, wuṛṛu maapendamma lal᷊umanna'a suwallattu taumata.

³²Ana waugu udde, paddaringikke si ya'u, ei ingana'a dario'a! Tuṛṛutte tatantiro'u, ne i'o sarun su lal᷊umanna'a.

³³Sengkampe tatantiro wuṛṛu ariaddite pande imbaṛṛangnga i'o tawe mangaregane.

³⁴Lal᷊umanna'a su taumata apan maddaringikka si ya'u apan mamiallo ua'ianna su ngaran bal᷊e'u, wuṛṛu uariaga su ngara wahewalla atatanaangku.

³⁵Isai apan maasomba si ya'u, sarun ma'ompa'a wiakka, ete si tou MAWU mal᷊uassa.

³⁶Isai tawe maasomba si ya'u, mandugi watanganne sassane; taumata apan maddantingku, mandangngu papate.”