Read Talaud MANNANASE 2 Bible Online

MANNANASE 2 - Talaud bible

MANNANASE 2

¹I ya'u nakkawessa tadea'u mapaal᷊uassu waddangnga tadea'u maasingkatta apa udde lal᷊umanna'a. Inauranna udde lai tawe gunane.

²I ya'u wukkute naatutukka manungku lal᷊agge udde awawoddo wuṛṛu lal᷊umanna'a tawe gunane.

³Nisasannu apulu tadea'u maola'a pande, i ya'u mappandumma tadea'u mallal᷊umanna'a ringangu ma'inumma anggore wuṛṛu maddamea. I ya'u massunna manungku eteudde lal᷊anne apan apianne su taumata mattemma pabbiaṛṛanne apan maautta su runia indi.

⁴Manga manara wahewalla buatte ta'u niola'a. I ya'u napararisikku manga wal᷊e'u. I ya'u na'ola'a manga waillu bunga wuṛṛu manga wailla apan nisuanannu alu anggore wuṛṛu al᷊awo'u hatin aaluanna apan mabbua.

⁶I ya'u naal᷊i manga li'u iapa'elekka su waillu bunga wuṛṛu manga wawail᷊anna udde.

⁷I ya'u uatahuanna manambo allangnga, mawae apan ta'u niwallianna, aroddi lai apan nasungkangnga su wal᷊e'u. winatangnga papaddul᷊ianangku mannamboanna wuassu anambon winatangngu taumata apan buatte natana'a su Yerusalem.

⁸I ya'u nangammullu sal᷊a'a wuṛṛu wul᷊awanna aonggollu manga ratu su manga wanua apan paparentangku. Mangangantari esakka wuṛṛu mangangantari wawine maal᷊uassa naungku ringannu manga antarin mangitou. I ya'u uatahuanna manambo lai awingku su liudde anambone suapawe ipaapulu'u.

⁹Atonna, i ya'u maggewal᷊anna wuassu anambon taumata apan uatana'a su Yerusalem, wuṛṛu apande'u mattanggaṛṛana.

¹⁰Al᷊awo'u apulun naungku, ta'u niwatu'anna. Tawe sarana paassa i ya'u maṛṛaddannu waddangku mattemma al᷊awo'u al᷊al᷊uassa. I ya'u lullala'a wuasu al᷊awo'u inasaharangku, wuṛṛu eteudde lal᷊antakke si ya'u.

¹¹Arawe wua'udde i ya'u nanaṛṛassidda al᷊awo'u manara'u wuṛṛu lai al᷊awo'u inasaharangku su ipanginsue manga manara'u udde, ne i ya'u natutukke manungku sarangkanambone udde tawe atappasanne. Inasaharangku udde tawe gunane tumba'u ere mangngenggenna anginna.

¹²Salaiwe ereapa olangnge sangkatou ratu tumba'u wotongnge mammanara ere manara apan buatte niola'u ratu apan naṛṛo wuassi tou. Ana see i ya'u mannattakke maṛṛingidda: apa atappassanne maola'a pande ara'e longonna ara'e woddo?

¹³Atonna, i ya'u masingkatta, “Asingkatta mappiannu wuassu awawoddo, ere lai semakka mappianne wuassu ararandumma.

¹⁴Taumata pande wotongnge maasilo tampa apan tuddanne; taumata woddo ere u'amatta uasasaṛṛipo.” Arawe i ya'u masingkatta lai manungku paladdu pabbiṛṛanna apan uasul᷊ungnga sarun maṛṛia'a si mangitou sarangkanambone.

¹⁵Ne i ya'u naṛṛingidda, “Pal᷊addu pabbiaṛṛanna apan naṛṛia'a su taumata woddo sarun ta'u apendamanna lai. Nariaddi, apa hunane al᷊awo'u apande-U?” Ana see i ya'u nangautta hatto manungku apande udde atonna tawe gunane saran addio'a.

¹⁶Taumata woddo sarun mal᷊ihakka timbul᷊ianna, arawe taumata apan pia asingkatta lai tawe sidutu nannaunganna. Mal᷊annu-l᷊annu sarangkanambone sarun mawul᷊i wuassu naungnga. I ite sarangkanambone sarun mate, mawae taumata pande ara'e lai taumata longonna.

¹⁷Ana waugu udde pabbiaṛṛanna tate lai pangartianne si ya'u, wal᷊ine wua isudde tawe. Sarangkanambone tawe gunane; i ya'u tumba'u ere mangngenggenna anginna.

¹⁸Al᷊awo'u hessin manara'u wuṛṛu asombangku tawe gunane si ya'u, ana waugu ṛinone ta'u itantangnga su hahanti'u.

¹⁹wuṛṛu isai masingkatta tanne i tou pande ara'e woddo? Arawe salaiwe erepa i tou sarun manahuanna hessin inasaharangku apan buatte niasombangangku sutempo i ya'u mabbiakka su runia indi al᷊amattu inasaharangku wuṛṛu asingka'u. Nariaddi, udde lai sia-sia.

²⁰Orassa indi i ya'u sinumassilla buatte nammanara aroddi aṛṛimadde.

²¹Ana waugu taumata mammanara maṛṛimadda ringangu nappaattu al᷊awo'u asingkatta, apande wuṛṛu apapian manarane su ipaddea'a sambau saranapa. Arawe panginsueanne i tou ṛinone manantangngu liaha pinaddea'a saranapa udde. Nariaddi, udde lai tawe gunane, wuṛṛu lai atonna udde tawe su atatul᷊idda!

²²Su al᷊o'engngu pabbiaṛṛanne taumata mammanara masahadda wuṛṛu mattinsahadda; wua'udde suapate hessin inasaharanne apan wotongnge ipammungane?

²³Al᷊awo'u apa apan niolangnge su al᷊o'engngu pinabbiaṛṛanne, mangngapiddu asasusa wuṛṛu taddu'u naungnga si tou. Sutempo ṛabbi lai naungnge massusa. Nariaddi sarangkanambone udde atonna tawe gunane.

²⁴Taweddu mappianne su taumata wuassu anna, ua'e wuṛṛu mappaattu hessin inasaharanne. I ya'u natutukka manungku udde lai aonggollu Ruata.

²⁵Isai apan wotongnge umanna wuṛṛu mallal᷊umanna'a ringangu tawe Duata?

²⁶Ruata nangonggollu apande, asingkatta wuṛṛu lal᷊umanna'a taumata apan maal᷊uassa naung-Nge. Arawe taumata marosa nirolokku MAWU mammanara maddea'a anna mangngombon hessine tadea'u itantilla su taumata apan maal᷊uassa naungngu Ruata. Nariaddi, sarangkanambone udde tawe gunane ere manara mangngenggenna anginna.