Read Talaud MANNANASE 3 Bible Online

MANNANASE 3 - Talaud bible

MANNANASE 3

¹Al᷊awo'u saranapa su runia indi nariaddi sutempo apan nitantunnu Ruata.

²Ruata nanantunnu tempo ipanungkangnga wuṛṛu tempo mate, tempo massuanna wuṛṛu tempo mangabbutta,

³tempo ipamate wuṛṛu tempo ipangapia, tempo ipanggohakka wuṛṛu tempo ipa'ola'a.

⁴Ruata nanantunnu tempo lumuai wuṛṛu tempo lullagge, tempo sussangitta wuṛṛu tempo massal᷊aingnga,

⁵tempo matatamba ringangu wawine wuṛṛu tempo palli matatamba, tempo maṛṛa'uppa wuṛṛu tempo maṛṛaddanna.

⁶Ruata nanantunnu tempo maasomba wuṛṛu tempo awul᷊ianna, tempo mangngalludda wuṛṛu tempo mangnginsue,

⁷tempo manggesa'a wuṛṛu tempo manabbi'a, tempo mal᷊annabba wuṛṛu tempo mabbisara.

⁸Ruata nanantunnu tempo mandangngu wuṛṛu tempo maddantinna, tempo mapapangalo wuṛṛu tempo maddame.

⁹Apate hessin al᷊awo'u inasaharanni ite?

¹⁰I ya'u masingkatta manungku Ruata nangonggollu winabbawa apan mawakkatta si ite.

¹¹I tou nanantunnu tempo apan naṛṛino su al᷊awo'u saranapa. I tou nangonggolla si ite paapulu tadea'u maasingkatta allo addantane, arawe i ite tawe maasunna inolaannu Ruata wuassu panattaṛṛanne maddatingngu panguddusanne.

¹²I ya'u masingkatta manungku si ite taweddu mappianne wuassu lullala'a wuṛṛu mammendamma pabbiaṛṛanna su al᷊o'engngu uukki ite.

¹³Mappianne i ite sarangkanambone umanna wuṛṛu ma'inumma see mattemma hessin inasaharannu manaran kite. Eteudde aonggollu Ruata.

¹⁴I ya'u masingkatta manungku al᷊awo'u manaran Duata siditu sarun mal᷊annu-l᷊annu. Taumata tawe maatamba ara'e maahaingnga. Wuṛṛu mammanara aroddi tadea'u i ite mata'utti Tou.

¹⁵Apan orassa indi nariaddi, buatte nariaddi paarorone. Apan orassa indi pia, piate ro'en mal᷊annute. Ruata nanantunna tadea'u apa apan buatte nariaddi, sarun mariaddi apia.

¹⁶Piaddu lai apan ta'u niasiloanna su rinia indi: suapa apan ṛinone pia atatul᷊idda wuṛṛu apapia, isudde pia alaleo.

¹⁷I ya'u naṛṛingidda, Ruata sarun makkungngu taumata apan mapia ara'e lai taumata lal᷊eo, ana waugu suapan inolaanna wuṛṛu suapan manara sarun mariaddi sutempo apan buatte nitantunna Ruata.

¹⁸Inaappuangku eteudde: Ruata nanal᷊u'atta si ite tadea'u mapal᷊iatta'a manungku pal᷊addu pabbiaṛṛanni ite tawe paṛṛalane ringangu pal᷊adu pabbiaṛṛannu winatangnga.

¹⁹Salaiwe ereapa lai, pal᷊adu pabbiaṛṛannu taumata wuṛṛu winatangnga uddewe uasul᷊ungnga. Iapa sambau sarun mate, aroddi lai iapa waine. Itarua udde suaddio'a riaddianna. Nariaddi taumata ta'e ma'untunganna wuassu winatangnga, ana waugu sitarua pabbiaṛṛanna udde tawe gunane.

²⁰I mangitou mattudda watukku tampa apan uasul᷊angnga. I mangitou niola'a wuassu awu wuṛṛu sarun mabbelengnga lai ringangu awu.

²¹I ite wagga, tanne ghaṛṛahon taumata masengkengnga ire'e wuṛṛu ghaṛṛahon winatangnga sumossokka sulal᷊ummu leta'a.

²²Ana waugu udde i ya'u naatutukke manungku taweddu mappianne su taumata wuassu mattemma hessin manarane. Wal᷊ine wua isudde taweddu apan wotongnge olaanne. Tawe mariaddi i tou maasingkatta apa apan sarun mariaddi napawe i tou natete.