Read Talaud MANNANASE 5 Bible Online

MANNANASE 5 - Talaud bible

MANNANASE 5

¹Paṛṛingidde tantal᷊anna taambe mabbisara, wuṛṛu arie tumaniten mal᷊ihakka maddiandi su Ruata. I Tou roso surga wuṛṛu i'o wowa su runia.

²Lembon sussinggawanga, lembon bahewalla pendamanna maasomba wal᷊iawa lal᷊eo. Lembon manambo mabbisara, lembon wahewalla pendamanna mapasabbangngu manga wisara awusu.

³Nariaddi, amungkangu i'o maddiandi su Ruata, ola'e ringannu mal᷊ihakka. I Tou maddiri su taumata apan woddo. Ana waugu udde, suunga'e paddariandinu.

⁴Mappianne tawe maddiandi wuassu maddiandi see mangawusu.

⁵Ariewe manga wisaranu maaola'a si'o marosa, na'oman sara i'o rinone mabbisara su imam apan mangngimbe MAWU, manungku i'o nassal᷊ate naddiandi. Ipa'ura ma'ola'a Ruata masa'u si'o ma'oman sara i'o niṛṛimunsang-Nge ana waugu hessin manaranu?

⁶Su ereapa manambo wal᷊iawa udde tawe atappasanne, aroddi lai manambo wisara tawe gunane. Arawe ata'utten MAWU.

⁷Arie tumiangnga maasilo tembonanne mangngallangnga taumata asiangnga, mangngaṛṛo pussa'an mangitou wuṛṛu tawe mangongnggolla si mangitou atatul᷊idda. Suapan mamanara lal᷊u'arannu tembonanne wuṛṛu itarua lal᷊u'arannu tembonanne apan mattaggaṛṛanna pangkanne.

⁸Ewe'e wiakku ratu lai uaantimma hessin pangitinganna.

⁹Taumata apan wal᷊iun doitta, tawe saran paassa matimu roinne; taumata apan wal᷊iun darotongnga, tawe saran paassa lumuassu auntunganna. Sarangkanambone tawe gunane.

¹⁰Lembon manambo paa'alan sangkatou lembon manambo taumata waine ṛinone onggol᷊anni tou anna. Tawe auntunganna su tatahuanne, i tou tumba'u masingkatta manungku i tou ala.

¹¹Sangkatou mamamanara wotongnge mariaddi tumba'u addio'a anna, arawe i tou mangke wotongnge maatiilla mal᷊angnga. Arawe, sangkatou apan manambo darotongnge, i tou tawe maatiilla ana waugu sussinggawangnga.

¹²I ya'u naasilo su runia indi pia sambau apan maasusa; sangkatou apan mangngombon darotongnge ipangantagga ṛutumma.

¹³Arawe darotongnga udde nawul᷊i ana sambau asasilaka, na'oman sara taweddu itantilli tou su manga anangnge.

¹⁴I ite niasungkangnga ringangu uatantol᷊e; aroddi lai i ite manantangngu runia indi, tawe mangapiddu manga apa wuassu al᷊awo'u darotongnga inasaharanni ite.

¹⁵Udde mangke maasusa atonna! I ite inai ere lai sutempo orassa indi nirumanta. I ite mattinsahadda mangngenggenna anginna, wuṛṛu apa hessine?

¹⁶Su al᷊o'engngu pabbiaṛṛanna, i ite uasasaṛṛipo sulal᷊ummu ararandumma, i ite mattinsahadda, sussinggawangnga, massa'u wuṛṛu pia tuddu'u naungnga.

¹⁷Ne i ya'u naasunnate manungku apa apan apianne si ite tumba'u anna, ua'e wuṛṛu mattemma hessin inasaharanni ite su al᷊o'engngu paabiaṛṛanna maautta apan nionggollu Ruata si ite; eteudde pal᷊addu paabbiaṛṛanni ite.

¹⁸Amungkangngu sangkatou manengkamma paa'ala wuṛṛu darotongnga wuassu Ruata, wuṛṛu iwala mappaattu paa'ala udde, i tou ṛinone maadiangkamanna wuṛṛu mattemma al᷊awo'u hessin manarane. Udde lai aonggollu Ruata.

¹⁹Ruata namene naungngu taumata udde ringannu al᷊al᷊uassa, ne i tou tawe suminggawangnga maṛṛingiddu ola'u pabbiaṛṛanna apan maautta indi.