Read Talaud MANNANASE 7 Bible Online

MANNANASE 7 - Talaud bible

MANNANASE 7

¹Aranna mawangngi mappianne wuassu lana maaregga; wuṛṛu allon papate mappianne wuassu allo niariaddianna.

²Mapianne inai su wal᷊en taumata nate wuassu inai su tampan andeangnga. Ana waugu i ite ṛinone sidutu mannaungnga manungku papate uaṛṛaddo suapan taumata.

³Asasusa mappianne wuassu lal᷊agge. Salaiwe hati lullal᷊o, sawal᷊iate naungnga maluassa.

⁴Taumata woddo sidutu mangngenggenna lal᷊umanna'a; taumata pande sidutu maṛṛingiddu papate.

⁵Mappianne tagguannu taumata apan pia budine, wuassu raloannu taumata apan masahadda massunna.

⁶Lal᷊aggen taumata woddo tawe atappasanne, ere tingikku larangnga nasoṛṛobbu putungnga.

⁷Amungkangngu taumata pande mallinga, tumaniten woddo manarane; amungkangngu taumata manengkamma roitta aonggolla, narusate ṛingiranne.

⁸Mappianne panginsueannu sambau hatto wuassu panattaṛṛanne; mappianne masabare wuassu tumaniten mawunga.

⁹Arie tumaniten mal᷊ihakka mandona; tumba'u taumata woddo apan mangngune.

¹⁰Ariewe maiwal᷊o, “Anio tempon tiwatta mappianne wuassu orassa indi?” Tumbu'a taumata longonna apan maiwal᷊o aroddi.

¹¹Taumata wiakka ṛinone pia asingkatta; lal᷊oṛṛon asingkatta uasul᷊ungngu pussa'a;

¹²ere lai roitta aonggollu atatammudda. Nangillembo apande su ola'u asingkatta! Isai uatahuanna sarun masel᷊amatta.

¹³Panutukke manaran Duata. Isai apan wotongnge manul᷊idda apa apan niwengkollu Ruata?

¹⁴Nariaddi, lalluasse amungkangngu i'o tantal᷊anna su lal᷊umanna'a. Arawe amungkangngu i'o niaṛṛiannu asasilaka, arie paabbul᷊iane manungku Ruata nangonggollu darua udde. I ite wegga apa apan sarun mariaddi manansunna.

¹⁵Pabbiaṛṛangku tawe gunane, arawe su al᷊o'engngu pabbiaṛṛangku udde i ya'u naasilo ere manansunna indi; Pataṛṛa assa taumata mapia mate salaiwe i tou ma'imanna. Pataṛṛa assa taumata lal᷊eo uukke mal᷊o'engnga, salaiwe i tou sidutu ma'ola'a rosa.

¹⁶Ariete tumaniten mapia wuṛṛu ariete lai tumaniten pande. Apa hunane mammate watanganne?

¹⁷Arie lai tumaniten dal᷊eo ara'e tumaniten longonna. Apa hunane mate taambe tempone?

¹⁸Pangindauten olangnge darua tanginna. Amungkangngu i ite matta'uttu Ruata, i ite sarun maasomba apapia.

¹⁹Asingkatta maaola'a tatahuanne lembon matohassa wuassu mapul᷊o tembonanne su sambau soa.

²⁰Su runia indi tawe sangkatou taumata apan nasuungnga; taweddu sidutu apan ma'ola'a apapia wuṛṛu tawe saran paassa na'ola'a rosa.

²¹Arie mappulu maddaringikka watti'a awusu, isai masingkatta i'o tantal᷊anna wabbontohannu sangkatou mangangimbe.

²²I'o sassane lai naatutukke manungku taumata waine lai buatte niwontohannu.

²³Sarangkanambone udde ta'u nissal᷊u'atannu asingka'u. Arawe lembon ta'u raddeaanna asingkatta udde, lembon marau i tou wuassia'u.

²⁴Isai wotongnge maasingkatta atappasannu pabbiaṛṛanna indi? Tumanite malal᷊umma madea'a passunnanne!

²⁵Arawe i ya'u maṛṛimadda massal᷊umma wuṛṛu maddea'a apande, tadea'u maasomba asingkatta wuṛṛu sasimbakku al᷊awo'u aiwal᷊o, I ya'u maannamma massunna manungku rosa udde awawoddo, wuṛṛu al᷊al᷊eo uddewe ipaapulu.

²⁶I ya'u naasingkatta manungku wawine mappettana wuassu papate. Darangngun bawine ere soma wuṛṛu sedda apan nariahite manemetta pabbawiakke. Laṛṛa'umme ere tal᷊i apan uaṛṛapussa masagadda. Taumata apan mappaamattu apulun Duata mal᷊iu wuassu seddane, arawe taumata marosa sarun asametanne.

²⁷Pa'ellege, unnu Sangkatou Maṛṛaṛingidda: Sarangkanambone udde ta'u niasangkal᷊anna, sutempo passangka lempangnga i ya'u madde'a sasimbakke.

²⁸I ya'u ta'e lai maddea'a manga sasinaukke waine, arawe tawe naasomnba. Suwallattu saṛṛiwu su atoune, i ya'u naasangkalla sangkatou esakka apan aaddatangku. Arawe suwallatti mangitou tawe sangkatou wawine apan wotongnge ta'u iaregga.

²⁹Tumba'u indi apan niasombangangku: Ruata na'ola'a si ite tawe lembone wuṛṛu wiasa. Arawe ete i ite sassane apan na'ola'a watanganni ite masahadda passunnanne wuṛṛu mangke uawengkolla.