Read Talaud ANTARI MAWANTUGA 1 Bible Online

ANTARI MAWANTUGA 1 - Talaud bible

ANTARI MAWANTUGA 1

¹Antari Mawantuga niarangngi Salomo.

²Ari'e i ya'u ringannu biwikku; darangngunu mattemanga wuassu anggore!

³I'o mawangngi-wangngi, arannu ere lana mawangngi nabboso; ana waugu udde manga maṛṛuala maapulunu!

⁴Pandiahite i ite, ore ratu'u, apira'e i ya'u sulal᷊ummu wabbo'anu. Ana waugu I'o i yami sarangkanambone lullassa, wuṛṛu maddalo darangngunu nilumebbe wuassu anggore; naṛṛinote manga maṛṛuala maapulunu!

⁵Salaiwe ma'itumma, i ya'u maṛṛamaga, ore manga maṛṛualan Yerusalem; ma'itumma ere manga rasannu Kedar, arawe maṛṛansangnga ere manga pampele su wal᷊en araratuanni Salomo!

⁶Arie pa'innunu pisi'u ma'itumma, ana waugu i ya'u nal᷊akkabbu paddissa. Manga iaangku esakka massa'u si ya'u, wuṛṛu nandolo'u mammanara su waillu anggore; i ya'u tawe tempo ipamaddul᷊i watangangku sassane.

⁷Wal᷊oa'e, ei arangnguangku, suapa i'o mallu'adda manga domba, suapa i'o napal᷊allowangi mangitou sutempo wawallo? Ṛatadde i ya'u sarun maola'a ere mamamal᷊intadda suwallattu ammul᷊annu domban manga hawenu?

⁸Ṛatadde i'o waggan tampane, ei i'o aṛṛamahanne suwallattu wawine? Pallaṛṛenggente lanna'u amatannu amul᷊annu domba wuṛṛu lu'arete manga ambingu maranin paddasanannu manga mallal᷊u'adda.

⁹Arangnguangku, i'o naal᷊ihidda awal᷊o wawine apan mabbol᷊engnga kereta ratun Mesir.

¹⁰Wambalanu maṛṛamaga su pattangngannu lal᷊ogakka, ullekkanu maṛṛansanga ringannu wul᷊ele permata.

¹¹I yami na'ola'a lal᷊ogakka wul᷊awanna si'o, ringannu manik-manik wuassu sal᷊a'a.

¹²Tantal᷊anna ratu'u su lal᷊allowanganna, tinumopangnga hal᷊uru mawangngi narwastu'u.

¹³Arangnguangku erete mur awangngine, sutempo ual᷊allowanga su roo'u.

¹⁴Arangnguangku naal᷊ihidda sampunna bunga soṛṛongu manu'a su manga waillu anggore En-Gedi.

¹⁵I'o maṛṛamaga atonna tatuno naungku, tumaniten maṛṛamaga i'o! Matanu naal᷊ihidda merpati.

¹⁶I'o na'ewokka, arangnguangku na'ewokka atonna i'o! Lallowanganni addua su wal᷊abbukka ma'elomma.

¹⁷Alu aras maola'a diṛṛi wal᷊en kadua, wuṛṛu alu cemara olaanna lotengnge.