Read Talaud YESAYA 10 Bible Online

YESAYA 10 - Talaud bible

YESAYA 10

¹Nasilakate i yamiu apan nakkiinnu manga tita apan wengkolla ipangallangnga pabbawala-U.

²Ringannu olangnge udde i yamiu mannal᷊awa'u taumata asiangnga maasomba hakkane wuṛṛu atatul᷊idde, wuṛṛu nangaṛṛo darotongngu manga wawine wal᷊u asisitimpal᷊ussa.

³Apate a'olaani yamiu su allo Ruata makkuumanni yamiu? Apa apandenu sutempo i Tou mandantan asasilaka wuassu wanua apan marau? Sisai i yamiu sarun maddorongnga aontolla? Suapate i yamiu sarun mamunin paa'alan kamiu udde?

⁴Pal᷊addu pabbiaṛṛannu tumba'u pateanna sulal᷊ummu pangalo ara'e ehetanna maola'a taumata niatawanna. Arawe MAWU ta'e sidutu massa'u wuṛṛu ta'e makkuumanna.

⁵MAWU nabbisara, “Nasilakate Asyur! Asyur Ta'u ipaatta maola'a sambokka wuṛṛu pal᷊o-pal᷊o ipamuulla manga taumata apan niaṛṛinoannu asasa'u-U.

⁶I Ya'u nandolokku Asyur niapapangalo pabbawala-U apan massinaadda wuṛṛu ma'ola'a si Ya'u nasa'u. I Ya'u nanddolokku Asyur iapaaṛṛo wuṛṛu iapata'o se'e iapaṛṛinda pabbawala-Ku ere awu su lal᷊anna.”

⁷Arawe ratun Asyur pia gol᷊age sassane. I tou mappandumma mappaattu araṛṛagissa ipamate manambo walahanna.

⁸I tou mammungan batanganne, wisarane, “Manga tembonannu tantara'u sarangkanambone manga ratu!

⁹Ta'u aṛṛoanna manga soan Kalno wuṛṛu Karkemis, Hamat wuṛṛu Arpad. Ta'u aṛṛoanna lai manga soan Samaria wuṛṛu Damsyik.

¹⁰Ta'u iwaddo manga araratuanna apan massubba manga paal᷊uanna apan lembon mataṛṛino wuassu apa apan pia su Yerusalem wuṛṛu Samaria.

¹¹Samaria wuṛṛu anambon walahanne buatte ta'u nipate. Sansul᷊ungnga lai ta'u olaanna su Yerusalem ringannu anambon paal᷊uanna apan sassubbanna poiaroddi.”

¹²Arawe MAWU nabbisara, “Amungkangngu apa apan Ta'u olaanna su Wuiddu Sion wuṛṛu Yerusalem udde nuddusse, i Ya'u sarun makkuumannu ratun Asyur ana waugu awawungane wuṛṛu atatanggakke.”

¹³Ratun Asyur mammunga, wisarane, “Sarangkanambone udde ta'u olaanna ringannu taṛṛino'u sassane. I ya'u masiṛṛongnga wuṛṛu pande. I ya'u mamappassa passarannu manga walahanna, wuṛṛu i ya'u nangaṛṛo saddia mangitou. Ere bantenga i ya'u naṛṛinda manga taumata apan uaparenta.

¹⁴Manga walahanna su runia naal᷊ihidda sal᷊akku manu'u winalanganna; ringannu hampa darotongngi mangitou ta'u nianu, naal᷊ihidda taumata nanganu tallukka apan nitantangnga su sal᷊akka. Tawe papaidda apan u'al᷊iappakka, tawedu namu'a sasumigge ara'e sussio'a.”

¹⁵Arawe MAWU nabbisara, “Wotongngewe wal᷊iungnga maddalo watanganne wuassu taumata mapapaanne? Apa laṛṛahari maggunanne wuassu taumata apan mappaanne? Wal᷊inewe pal᷊o-pal᷊o mammengketta taumata, ewe'e ete taumata apan mammengketta pal᷊o-pal᷊o.”

¹⁶Waugu taumatan Asyur buatte namungan batanganne, MAWU Apan Lembontaṛṛino sarun mandantan al᷊aṛṛusa'itta ipakkuumannu manga tembonannu tantara apan matohassa. I mangitou sarun mamendamma sal᷊ihangnga apan matanggakka ere putungnga apan sidutu mannutungnga.

¹⁷Ruata apan na'ukkassa, Asasemakku Israel, sarun ma'ola'a ṛenggammu putungnga sulal᷊ummu allo massallo manutungnga abbi al᷊awo'a, sara lai ahuranganna ṛoaanna.

¹⁸Manga mahurangnga maappalla wuṛṛu manga wawail᷊anna masuwukka su wanua Asyur sarun mawinasa abbi-abbi, naal᷊ihidda taumata maradda'a uatataṛṛangnga ma'oman sara mate.

¹⁹Manga aaluanna sarun mallambe ete addio'a, sara ana'a maraddio'a lai wotongnge mandeengnga.

²⁰Tempone sarun dumanta lamben walahannu Israel apan naralukka tate lai mangantimmu wiakke su walahanna apan uaparenta apan maranite mamate si mangitou, ewe'e lai MAWU, Ruata susin Israel.

²¹Lambene addio'a walahannu Israel sarun mawal᷊u su Ruata apan matohassa.

²²Salaiwe taumatan Israel orassa indi anambone uasul᷊ungngu anne su apanne, tumba'u manga pirang katou apan mawelengnga. Ṛuumannu MAWU maranite, wuṛṛu atonna se'e lai matul᷊idda walahanna udde pateanna.

²³Ore, ahewallu wanua udde sarun ṛimunsaannu MAWU Apan Lembontaṛṛino; eteudde laṛṛawessu MAWU, wuṛṛu tate lai iawal᷊u.

²⁴MAWU Apan Lembontaṛṛino mabbisara uman-Ne apan uatana'a su Sion, “Arie pa'ata'uttu taumata Asyur, salaiwe i mangitou mangngallanga wuṛṛu mannansara si yamiu ere niola'u taumatan Mesir dorone.

²⁵Sulal᷊ummu tempo apan mal᷊ihakka asasa'u-U si yamiu sarun iillol᷊o, see i Ya'u sarun makkadda'a si mangitou.

²⁶Ya'u MAWU Apan Lembontaṛṛino, sarun manassakka si mangitou ringannu sambokka, ere lai i Ya'u nanassakka taumatan Midian su wowone watu Oreb. Asyur sarun Ta'u iṛṛuumanna ere lai i Ya'u nakkuumannu Mesir.

²⁷Sutempo udde i Ya'u sarun mamallossi yamiu wuassu mangangallangu taumatan Asyur, wuṛṛu i mangitou tate lai uataṛṛino si yamiu.”

²⁸Tantaran Asyur napangaṛṛote soa Ayat. I mangitou buatte sinumabbi Migron! Wal᷊unni mangitou nitantangnga su Mikhmas!

²⁹I mangitou buatte sinumabbi pallal᷊iuanna wuṛṛu nanaṛṛabbi su Geba! Tumana'u soan Rama nata'utta, wuṛṛu tumana'u Gibea, soan Ratu Saul, tinumal᷊angken batanganne.

³⁰Pangintul᷊ite, ei tumana'u Galim! Paddaringikke, tumana'u Laisya! Simbakke, tumana'u Anatot!

³¹Tumana'u Madmena wuṛṛu Gebim tinumal᷊angnga ma'imbuni.

³²Allo indi seetta poite su soa Nob, wuṛṛu isudde i mangitou mammansagu angkumma watukku Wuiddu Sion, su soa Yerusalem.

³³MAWU Apan Lembontaṛṛino sarun mapaaṛṛaa mangitou naal᷊ihidda rannu nitonto wuassu alune. Apan aṛṛamahanne wuṛṛu atanggaṛṛanne suwallatti mangitou sarun pototanna wuṛṛu iṛṛa'a.

³⁴MAWU sarun mapaaṛṛa'a mangitou naal᷊ihidda punnu alu su tangnga mahurangnge tuwangannu wal᷊iungnga. Salaiwe i mangitou matohassa naal᷊ihidda alu apan atohasanne su Libanon, i mangitou sarun maṛṛa'a lai!