Read Talaud YESAYA 11 Bible Online

YESAYA 11 - Talaud bible

YESAYA 11

¹Pallaṛṛiten Ratu Daud ere alu apan buatte nituwangnga. Arawe su ereapa wuassu tuidde tinumuwo solla wakku, aroddi lai wuassu pallaṛṛiten Daud sarun sumabbangnga sangkatou ratu.

²Taṛṛino MAWU sarun mangehetta si tou, ma'ola'a si tou pia buddine wuṛṛu masiṛṛungnga, pande makkawessa wuṛṛu mangamatta; masingkattu apulun Duata wuṛṛu masallungnga si Tou.

³Apulune eteudde tuttuṛṛutta MAWU. I tou makkuungnga tumba'u sambal᷊iate ara'e pangiananne wuassu wisaran taumata waine.

⁴Taumata asiangnga ṛuunganne ringannu matul᷊idda, taumata lome sasamba'anne ringannu atonna; taumata nassal᷊a iṛṛuumanna wuassu parentane, taumata lal᷊eo radda'anne.

⁵I tou mammanara ringannu matul᷊idda wuṛṛu satia sulal᷊ummu al᷊awo'a.

⁶Serigala sarun mamanua suadio'a ringannu domba, macan tutul ual᷊allowangnga su sandiṛṛannu ambinga. Ana'u sapi sarun mannioma nannal᷊o suadio'a ringannu ana'u singa, wuṛṛu ana'a addio'a ua'ehetta si mangitou.

⁷Sapi sarun umanna nannal᷊o suadio'a ringannu beruangnga, manga anangnge matti'illa suadio'a. Singa u'anna laṛṛami ere lai sapi.

⁸Ewe'e lai sangkatou ana'a addio'a sarun tawe maasomba angngone napawe mannalangnga suadio'a ringannu atoanna mawisa.

⁹Su Sion, Wuiddu Ruata Na'ukkassa, tawe al᷊al᷊eo apan manggohakka. Wanua sarun mapenen asingkatta su ola'u Ruata, naal᷊ihidda ua'e namene tahal᷊oangnga.

¹⁰Tempone sarun dumanta sangkatou ratu pallaṛṛiten Daud maola'a punnu aellegu manga walahanna. I mangitou sarun dumanta ringanni tou, wuṛṛu tampa atatanaanne mangke raddaloanna.

¹¹Su allo udde MAWU sarun paassa lai mappaattu taṛṛino-Ne mangapidda mapul᷊e uman-Ne lambene su Asyur wuṛṛu su Mesir, su manga wanua Patros, Sudan wuṛṛu Elam, su Babel, Hamat wuṛṛu manga taṛṛanusa apan marau.

¹²MAWU sarun manduittu sambau waneṛṛa su walahanna udde. Udde tatialane i Tou nangammullu apia walahannu Israel wuṛṛu Yehuda apan nassal᷊iawukka su ahewallu runia wuṛṛu nangapiddi mangitou mapul᷊e.

¹³Araratuannu Israel tate lai aurangannu naungnga su Yehuda, wuṛṛu Yehuda tate lai masseettu Israel.

¹⁴I mangitou suadio'a sarun mamangalo taumatan Filistin su waṛṛatta wuṛṛu mangaṛṛo pabbawalage su ra'i. I mangitou sarun mamaddon walahannu Edom wuṛṛu Moab, wuṛṛu walahannu Amon sarun massuṛṛubbawa si mangitou.

¹⁵MAWU sarun mapaamaran Eṛṛesannu Suez. I tou ma'ola'a anginna mal᷊oso tumiuppa na'oman sara Sal᷊ukku Efrat mabbal᷊i pitun bua lal᷊annu ua'e apan mawawo, ne suapan taumata wotongnge tumumbe ringannu uasilope.

¹⁶Su uman-Ne lambene sarun pia dal᷊anna mal᷊oangnga tadea'u maasabbangnga wuassu Asyur, naal᷊ihidda sutempo Israel sinumabbangnga wuassu Mesir.