Read Talaud YESAYA 16 Bible Online

YESAYA 16 - Talaud bible

YESAYA 16

¹Wuassu soa Sela su wadda'a lol᷊okka, walahannu Moab nangonggollu ana'u domba apan ionggolla su tembonannu Yerusalem.

²Manga taumatan Moab uaṛṛaddo su wiwikku Sal᷊ukku Arnon lapiddu u'amatta niwingone naal᷊ihidda manga manu'u winalanganna apan nilimbuaṛṛanna wuassu sal᷊akke.

³I mangitou nabbisara su walahannu Yehuda, “Wal᷊oa'e apa apan ṛinone olaanni yami. Ariaddite si yami pattillummanna apan masunge wuassu paddissu allattune, wuṛṛu wala'e i yami matana'a su al᷊ungnge. I yami indi tumatal᷊angnga; wunia'e i yami wuṛṛu arie pappate i yami.

⁴Wala'e i yami mattindaho su wanuanu. Lu'arewe i yami wuassu manga taumata apan mappulu mamate si yami.” (Pangangallangnga wuṛṛu pamamate sarun masue, wuṛṛu manga taumata apan makkimunsa'a wuṛṛu mangngallangnga wanua Israel sarun mawul᷊i.

⁵Wua'udde sangkatou suwallattu papapulunni Daud sarun maola'a ratu, wuṛṛu i tou sarun mamarenta pabbawalage ringannu darangngu wuṛṛu satia. I tou sarun mandisikku atatul᷊idda wuṛṛu mal᷊ihakka mammanara ma'ola'a apapia.)

⁶Walahannu Yehuda, “I yami naaringikke ola'u awawungan walahannu Moab. I yami masingkatta manungku i mangitou mawunga wuṛṛu matanggakka. Wisaran mangitou tumba'u tingikka apan tawe loṛṛone.”

⁷Ana waugu udde wala'ewe walahannu Moab ualal᷊uaite. Wala'e i mangitou lumuai amungkangngu maanaungnga anna matemangnga apan wiasane iwabbo'o mangitou su soa Kir-Hareset. Wala'e i mangitou maaddio'a naungnga wuṛṛu ma'uare.

⁸Manga wawail᷊anna maranin Hesybon wuṛṛu manga waillu anggori Sibma buatte niapaarusa, manga wailla apan wiasane mangngonggollu anggore apan apianne su manga tembonannu walahanna wuṛṛu mammu'anna si mangitou. Dorone manga waillu anggore udde uawannadda naddatingngu soan Yaezer; wuṛṛu su ra'i sara wadda'u anne, wuṛṛu su samba'an baṛṛatta naddatingngu samba'an Tahal᷊oangnga Nate.

⁹Orassa indi i ya'u lulluaiten baillu anggori Sibma ere lai i ya'u lulluain Yaezer. Allo mata'u tinumuro ana waugu Hesybon wuṛṛu Eleale, ana waugu hessin sinuananne ni'annu seetta sara nasue.

¹⁰Tawe saran sangkatou lulluassu manga wailla apan masuwukka udde. Taweddu umuin lal᷊uassa ara'e mangngantari su waillu anggore. Taweddu mamakkan anggore ipa'ola'a ua'en anggore. I ya'u buatte napaaddon paggahahion lal᷊uassi mangitou.

¹¹Naungku ma'uare wuṛṛu natuno ma'ellega saṛṛen Moab wuṛṛu Kir-Heres.

¹²Taumatan Moab mattinsahadda suma'a wuidda pangangaddoannu sasamba su tampa patataṛṛamawuanni mangitou ana inai umal᷊iomanna, arawe tawe gasillene.

¹³Eteudde tanata apan dorone nionggollu MAWU su ola'u Moab.

¹⁴Wuṛṛu orassa indi MAWU nabbisara, “Tallu tonna pase lai, anambon pa'a'ala apan ilalluassu Moab sarun mawul᷊i. Tumanangnge apan manambo sarun maola'a addio'a wuṛṛu lome.”