Read Talaud YESAYA 18 Bible Online

YESAYA 18 - Talaud bible

YESAYA 18

¹Wuassu sambau wanua, su samba'a manga sal᷊ukku Sudan niaringikka tingikku serangga.

²Wuassu wanua udde nirumantate manga daroloṛṛanna massaalannu pandanna tinumumbe Sal᷊ukku Nil. Ei, manga daroloṛṛanna apan matikko'a, paal᷊ihakka apul᷊ete su wanuanu apan aeleṛṛannu manga sal᷊ukka udde. Apira'e indi sambau tanata hunan walahannu apan matohassa wuṛṛu waṛṛani, manga taumatanu apan matanggakka wuṛṛu pisine al᷊ussa wuṛṛu iaata'utta su ahewallu runia.

³Ei, i yamiu sarangkanambone apan uatana'a su runia! Pa'ellege amungkangngu manga waneṛṛa iruitte su puiddu manga wowone! Paddaringikke napawe trompetta tiupanna!

⁴MAWU nabbisara si ya'u, “Wuassu atatanaang-Ku al᷊iurosone, i Ya'u sarun mangintanno inawa ringannu matammudda wuṛṛu matilangnga, ere atatammuddu wal᷊angngukka apan naola'a sutempo ṛabbi apan masal᷊ihangnga sutempon pangangitingnga, wuṛṛu ere asemakku matannallo sutempo allo.

⁵Tantal᷊anna taambe tempon pabbawua, sutempo wungane natontongnga wuṛṛu wuan anggore taambe nal᷊aha su alune, Sudan sarun ṛimunsaannu seetta, ere al᷊uassu lari'a mammototta manga rannan alu anggore.

⁶Manga winal᷊unannu tantarane sarun itantangnga mabbal᷊i inassu manga manu'u winalanganna sutempo paddissa, wuṛṛu winatangnga mal᷊aṛṛaga sutempo masunge.”

⁷Sarun a'omanna tempone manga sasamba iapasingkatta su MAWU Apan Lembontaṛṛino wuassu wanua udde apan sasabbiannu manga sal᷊ukka, wuassu pabbawalage apan matohassa waṛṛani, wuassu manga taumatane apan mal᷊angkassa wuṛṛu pisine al᷊ussa wuṛṛu ia'ata'utta su ahewallu runia. I mangitou sarun dumanta su Wuiddu Sion, watukku tampa MAWU Apan Lembontaṛṛino sassubbanna.