Read Talaud YESAYA 2 Bible Online

YESAYA 2 - Talaud bible

YESAYA 2

¹Eteindi manga tanatan Duata su ola'u Yehuda wuṛṛu Yerusalem apan nisengkammi Yesaya ana'i Amos:

²Wuassu manga allo addantane wuidda tampan Bal᷊en MAWU apan uapasi'a matanggakka wuṛṛu uarisikka matohassa roso su manga wowone wuṛṛu manga wuidda. Anambon walahanna mangngelekka inai poiaroddi,

³i mangitou sarangkanambone mabbisara, “Wette i ite sumaate su Wuiddu MAWU, watukku wal᷊en Duatan Israel. I Tou sarun mangaṛṛa'a si ite manara apan ṛinone olaanni ite. I ite sarun manantuṛṛutta lal᷊an-Ne, ana waugu al᷊aṛṛa'u MAWU darantane wuassu Yerusalem, i Tou mabbisara wuassu Sion.”

⁴I Tou sarun makkuungngu manga pabbawalaga, wuṛṛu makkawessu hatton manga ṛuangannu walahanna. Hal᷊ele sarun horapanna maola'a pajeko, wuṛṛu sambeangnga olaanna lari'a papol᷊o. Manga walahanna tate lai mamangalo, tate lai uasasaddia inai mappangalo.

⁵Ei, papapulunni Yakub, wette i ite umamatte sulal᷊ummu asasemakku MAWU!

⁶Oh Ruata, I'o nanantangken uman-Nu, papapulunni Yakub! Ana waugu su al᷊awo'u tampa su wanua indi taumata mappaattu daroa apan darantane wuassu ra'i wuṛṛu wuassu Filistin. Manga taumata mattanno inanaramannu taumata raho.

⁷Wanuane napenen sal᷊a'a wuṛṛu wul᷊awanna, wuṛṛu darotongnge tawe iareengnga. Awal᷊one tumaniten manambo, wuṛṛu keretane tawe iareengnga anambone.

⁸Suapan tampa pia passasubba monganna, wuṛṛu i mangitou massubba manga paal᷊uanna apan nilanginni mangitou sassane.

⁹Suapan taumata sarun pansilianna wuṛṛu iapawawo. Arie pa'ampungewe i mangitou oh MAWU!

¹⁰I mangitou sarun sumutta sulal᷊ummu manga loṛṛangnga su manga wuidda watu, ara'e ma'al᷊i loṛṛangnga sulal᷊ummu leta'a tadea'u mal᷊iu wuassu asasa'un MAWU wuṛṛu wuassu taṛṛino-Ne apan mawantuga.

¹¹Taumata mawunga sarun iapawawo wuṛṛu taumata matanggakka sarun iapasuṛṛubbawa. Tumba'u MAWU sassane wantuhanna.

¹²Su allo udde MAWU Apan Lembontaṛṛino sarun mapawawon sarangkanambone apan mannanggakku watanganne wuṛṛu makkuumannu sarangkanambone apan mawunga wuṛṛu matanggakka.

¹³Manga alun cemara apan mal᷊angkassa su Libanon wuṛṛu anambon aaluanna masallakka su Basan sarun pateanna.

¹⁴Manga wowone wuṛṛu manga wuidda apan maṛṛansangnga sarun iratakka.

¹⁵Manga candi apan matanggakka wuṛṛu darandungnga tanda'a watu sarun iapaaṛṛa'a.

¹⁶Manga apalla apan ahewal᷊anne wuṛṛu aṛṛansanganne sarun iapal᷊akkubba.

¹⁷Taumata mawunga sarun iapawawo, wuṛṛu taumata matanggakka iapasuṛṛubbawa. Tumba'u MAWU sassane apan wantuhanna.

¹⁸Manga paal᷊uanna sarun mawul᷊i abbi-abbi.

¹⁹Sutempo MAWU dumarisikka wuṛṛu mangio'u runia, taumata sarun sumutta sulal᷊ummu manga liangnga su manga wuiddu watu ara'e ma'al᷊i loṛṛangnga sulal᷊ummu leta'a tadea'u mal᷊iudda wuassu asasa'un MAWU wuṛṛu wuassu taṛṛino-Ne apan mawantuga. Amungkangngu allo udde nia'omante, manga pasasubba paal᷊uanna sal᷊a'a wuṛṛu wul᷊awanna apan nilanginni mangitou wuṛṛu sassubbanna, udde sarun itantangnga aroddi su wal᷊awo wuṛṛu pani'i.

²²Nariaddi, ariete pangantimma su taumata apan mattate, ana waugu i tou tawe aregane.