Read Talaud YESAYA 24 Bible Online

YESAYA 24 - Talaud bible

YESAYA 24

¹MAWU sarun mapaawinasan dunia, ma'oman sara mal᷊ol᷊okka wuṛṛu mal᷊annabba. I Tou sarun mangal᷊isangu wowon dunia wuṛṛu manal᷊iawukku tumanangnge.

²Anambon taumata sarun maapendamma pal᷊addu pabbiaṛṛanna apan uasul᷊ungnga: manga imam wuṛṛu ana'u wanua, allangnga awalli wuṛṛu ṛamawuanne, mabbawal᷊u'a wuṛṛu mamamalli, mabbawallassa wuṛṛu iapa mappawallassa, ala wuṛṛu asiangnga.

³Runia sarun mattal᷊eṛṛonga wuṛṛu ṛimunsaanna. MAWU buatte nabbisara, wuṛṛu olangnge udde sarun matipussa.

⁴Runia mabbal᷊i mamara wuṛṛu tumol᷊angnga, ahewallu runia massusa su sambau.

⁵Runia mabbal᷊i lal᷊eo ana waugu tumanangnge lullawangnga manga parentan Duata, mammal᷊u manga atoranna wuṛṛu massinaaddu riandi apan niolangnge ringanni mangitou saran mal᷊annu-l᷊annu.

⁶Ana waugu MAWU buatte namontoga runia wuṛṛu nakkuumannu tumanangnge ana waugu inolaanni mangitou. I mangitou nitutungnga, wuṛṛu tumba'u matul᷊u suwallatti mangitou apan nasal᷊amatta.

⁷Punnu anggore maṛṛissitta wuṛṛu ua'en anggore masahadda paddeaanne. Taumata apan dorone lulluassa orassa indi massusate.

⁸Tate lai aringiṛṛanna tengkellu kecapi apan maal᷊uassa wuṛṛu tingikku rebana apan ma'al᷊ala'a. Paddaramean taumata apan lulluassa naddote.

⁹Tate lai taumata ma'inumma anggore ringannu mangngantari, tate lai taumata apan mamendamma temangngu ua'e ma'awu'anna.

¹⁰Ahewallu soa uasongkakka, anambon ngaran bal᷊e ua'unsi ana waugu tatahuanne matta'utta.

¹¹Manga taumata mangngintul᷊i su manga lal᷊anna ana waugu niasueannu anggore. Tate lai al᷊al᷊uassa su wanua udde saran mal᷊annu-l᷊annu.

¹²Soa na unote, wuṛṛu manga ngarane naṛṛaate pasi tal᷊eṛṛongnga.

¹³Eteudde apan sarun mariaddi su ahewallu runia su anambon araratuanna. Nassul᷊ungnga ere lai sutempon pangangitingnga, sutempo wuan zaitun ti'oanna abbi-abbi wuṛṛu wuan anggore apan panginsueanne ti'oanna wuassu al᷊une.

¹⁴Manga taumata apan nasal᷊amatta sarun mangngantarin lal᷊uassa. Taumata su samba'an waṛṛatta sarun mabbatti'u awawantugu MAWU,

¹⁵wuṛṛu taumata su samba'a ra'i maddalo si Tou. Tumana'u winggin sahatta sarun maddalo MAWU, Ruatan Israel.

¹⁶Wuassu pentakku runia aaringiṛṛanna tingikku daralo su Israel, walahanna apan matuṛṛutta. Arawe nasilakate i ya'u! I ya'u massusa! Mamamate ta'e sidutu mammate, ewe'e lai i mangitou aatambanna su pamamate.

¹⁷Paddaringikke, ei anambon tumana'u runia! Pagahahio, sedda wuṛṛu sasongnga uaṛṛaddo si yamiu.

¹⁸Taumata apan tumal᷊angngu watanganne wuassu pagahahio udde sarun umul᷊ussa sulal᷊ummu sedda, wuṛṛu taumata apan mal᷊iu wuassu sedda sarun asongnganna. Uranna masaddatta sarun mawambinna wuassu langitta, wuṛṛu rapappakku runia sarun umio'a.

¹⁹Runia nawa'a, napussa'a wuṛṛu niumio'a.

²⁰Al᷊imatan dunia lullengge naal᷊ihidda taumata wu'anna, wuṛṛu niumio'a naal᷊ihidda sambengessa nitiuppu anginna al᷊isusu. Runia naṛṛa'a ana waugu mawakkatta rosane. I tou naṛṛimunsa'a wuṛṛu tate maapabbuatta apia.

²¹Sutempo udde MAWU sarun makkuumannu manga tembonannu winalanganna wuṛṛu manga ratu su runia.

²²I mangitou sarun iammulla suadio'a naal᷊ihidda taumata tataṛṛanganna sulal᷊ummu liangnga, wuṛṛu nitaṛṛo sulal᷊ummu tutupanna maddatingngu tempone i tou iṛṛuumanna.

²³Wul᷊anna sarun mabbal᷊i marandumma wuṛṛu matannallo tate lai semakke, ana waugu MAWU Apan Lembontaṛṛino sarun mamarenta maola'a sangkatou ratu. I Tou sarun mamarenta su Yerusalem, su Wuiddu Sion, wuṛṛu mapal᷊iatta'u awawantu-Ge su manga piaṛṛa'u uman-Ne.