Read Talaud YESAYA 29 Bible Online

YESAYA 29 - Talaud bible

YESAYA 29

¹Nasilakate soan Yerusalem apan isassago mezbah Duata! Nasilakate soan tampan Daud naddasanna! Wala'e manga tonna uahahanti ringannu manga rameane.

²Arawe Ruata sarun mandanta asasilaka su soa udde, na'oman sara taumata sussal᷊iomanna wuṛṛu ma'uare. Ahewallu soa naal᷊ihidda mezbah apan nappeta'u daṛṛa.

³Ruata sarun mamangalo soa udde wuṛṛu pangaloanne wuassu al᷊awo'u pappi'uanne.

⁴Yerusalem naal᷊ihidda setanna apan maddea'a mapararingikku tingikke wuassu lal᷊ummu leta'a, tingikka apan masi'ome wuassu lal᷊ummu awu.

⁵Arawe anambon taumata raho apan maṛṛagissa udde sarun mawul᷊i naal᷊ihidda awu wuṛṛu wal᷊a'a nitiuppu anginna. Ringannu sangkaṛṛondappa wuṛṛu tawe niaṛṛangngo.

⁶MAWU Apan Lembontaṛṛino sarun mamallossu soa udde ringannu anginna ma'ikkatta wuṛṛu linukka apan masaddata. I Tou sarun mandatan anginna al᷊isusu wuṛṛu putungnga apan mangngepodda.

⁷Wua'udde anambon tantara waine apan mamangalo Yerusalem, soa mezbah Duata, sarangkanambone apan ual᷊iwunna wuṛṛu mammangalo soa udde, sarun mawul᷊i ere wal᷊iawa sutempo ṛabbi.

⁸Manga walahanna apan uaammulla mamangalote Yerusalem sarun maola'a ere taumata niamal᷊unusanna apan mabbal᷊iawa i tou tantal᷊anna u'anna, ana see napu'o ringannu tianna tawe loṛṛone, ara'e ere taumata marou apan mabbal᷊iawa i tou tantal᷊anna ma'inumma, wua'udde napu'o ringannu tonggol᷊amme mamara.

⁹Asala'e tuttiangnga wuṛṛu manutubbu mata ere taumata wuta! Pattingkaola'e wu'anna, arawe wal᷊ine ana waugu na'inumma anggore. A'amatte lullallengge, arawe wal᷊ine ana waugu na'inumma tuba.

¹⁰MAWU na'ola'a si yamiu a'amatiil᷊anna wuṛṛu mattiilla mal᷊angnga. I Tou nanaappa mata manga nabi wuṛṛu nallindumma hati manga taṛṛa pasi'atta.

¹¹Atappasannu anambon aellega sarun iwuni, ere buke apan niseggele. Amungkangngu buke udde iapidda su sangkatou apan botongnge mabbasane si'o, i tou sarun mabbisara manungku i tou tawe wotongnge, ana wuke udde niseggele.

¹²Napawe iapidda ringannu taumata apan wuta huruppa, i tou sarun sumimbakka manungku i tou tawe maawasa.

¹³MAWU nabbisara, “Manga taumata udde tumba'u massubba si Ya'u ringannu manga wisara, arawe naungngi mangitou marau wuassi Ya'u. Agama mangitou tumba'u atorannu taumata apan wotongnge ihapalle.

¹⁴Ana waugu udde i mangitou sarun Ta'u paṛṛindu'anna ringannu puul᷊anna masokka-sokka. Taumata pande sarun mabbal᷊i woddo, wuṛṛu anambon apapande mangitou udde tawe gunane.”

¹⁵Nasilakate taumata apan mattinsahadda mammunin hol᷊age su MAWU! I mangitou ma'inolaanna ringannu mal᷊anna-l᷊annabba, wuṛṛu massunna manungku tawe saran sangkatou apan ua'ellega ara'e masingkattu inolaanni mangitou.

¹⁶Al᷊awo'a iwabbal᷊elonga. Suapane apan ahunanne,maaola'a urinna ara'e leta'a maṛṛamu? Wotongnge iapa a'olaanna mabbisara siapa ma'aolangnge, “Wal᷊inewe i'o apan na'ola'a si ya'u”? Ara'e wotongngewe saranapa udde mabbisara si tou, “I'o tawe ma'aola'a apa-apa”?

¹⁷Pia sasanato'a apan tingikke arendi, “Tate mal᷊annu lai mahurangnge sarun maola'a pabbail᷊anna, wuṛṛu leta'a pabbail᷊anna apia maola'a mahurangnga.”

¹⁸Sutempo udde taumata wengella sarun maaringikka manga wisara wuassu sambau buke apan iabbasa, wuṛṛu taumata wuta apan tanginna mabbiakka marandumma sarun maasilo.

¹⁹Manga taumata asiangnga wuṛṛu lal᷊ebbone sarun maapendamma apia lal᷊umannange apan nionggollu Ruata na'ukkassu Israel.

²⁰Eteudde panguddusannu manga taumata apan mangngallangnga taumata waine wuṛṛu mallobbossa Ruata. Ruata sarun makkadda'a anambon taumata marosa,

²¹taumata apan apulune mangngal᷊uandaga, taumata apan tawe mapaṛṛuumannu taumata lal᷊eo, wuṛṛu taumata apan mannal᷊iawukku manga watti'a awusu tadea'u taumata mapia tawe maasomba atatul᷊idda.

²²Ana waugu udde MAWU, Ruatan Israel apan namallossi Abraham, orassa indi nabbisara, “Pabbawala-U, i yamiu tate lobbosanna lai wuṛṛu hatinu tate mamillossa lai ana waugu massili.

²³Ana waugu napawe i yamiu naasilo manga anangngu apan Ta'u nionggolla si'o, ne i yamiu sarun manga'u manungku ete i Ya'u Ruata na'ukkassu Israel. I yamiu sarun mangaddatta si Ya'u wuṛṛu mata'u-U.

²⁴Taumata woddo sarun mangurumma tadea'u maasunna wuṛṛu taumata apan sidutu sussawutulla sarun mal᷊uassa aṛṛaanna.”