Read Talaud YESAYA 33 Bible Online

YESAYA 33 - Talaud bible

YESAYA 33

¹Nasilakate manga seetti ite! I mangitou makkampassa salaiwe i mangitou tawe nipakkampassanna, wuṛṛu mandal᷊eo salaiwe tawe nilal᷊eo. Arawe napawe buatte nakkampassa wuṛṛu nandal᷊eo, i mangitou sarun mabbal᷊i sal᷊em pallaṛṛampassa wuṛṛu pandalal᷊eo.

²Oh MAWU, tal᷊antupa'awe i yami. Ete I'o apan pangantimanni yami. Lu'arewe i yami wuassu allo maddatingngu allo wuṛṛu sal᷊amatewe i yami sutempo masuṛṛipitta.

³Napawe I'o dumarisikka wuṛṛu mapasabbangngu tingin-Nu apan maddallu'a, manga walahanna sarun tumal᷊angnga wuṛṛu massal᷊iawukka.

⁴Naal᷊ihidda ammul᷊annu taṛṛangassa taumata mammangalo wuṛṛu makkampassa darotongngi mangitou.

⁵MAWU tumanite mawantuga; i Tou uataṛṛino al᷊awo'a. I Tou sarun manduittu tita wuṛṛu atatul᷊idda su Yerusalem

⁶wuṛṛu mangonggollu atatammudda su uman-Ne. Darotongnga apan naapanal᷊amatta si mangitou uddewe apapande wuṛṛu asingkatta see lai addatta su MAWU.

⁷Manga taumata apan matohassa wuṛṛu waṛṛani u'ui ma'iontolla; manga daroloṛṛanna apan maddea'a paddarame lulluai ringannu sasal᷊iomanna.

⁸Manga lal᷊anna wahewalla apan maasilaka nabbal᷊i mal᷊annabba; tawe taumata apan umamatta isudde. Paaire niwahanna wuṛṛu riandi nitol᷊a'a. Tateddu lai pandumanna.

⁹Wanua tinantangnga naola'a mal᷊annabba. Manga mahurangngu Libanon maṛṛissitta, wuṛṛu wawal᷊annu Saron apan masuwukka nabbal᷊i wadda'u anne. Su Basan wuṛṛu su Wowon Karmel manga rongnga mattontongnga.

¹⁰MAWU nabbisara su walahanna udde, “Orassa indi Ya'u sarun dumarisikka wuṛṛu mammanarate mapal᷊iatta'u taṛṛino-U.

¹¹Hol᷊agu mangke tawe gunane, wuṛṛu anambon inolaannu tawe gunane lai. Asasa'unu naal᷊ihidda putungnga mannoṛṛobba watangannu sassane.

¹²I yamiu naal᷊ihidda watun sahatta apan tattutunganna olaanna apukka; ere aputta ṛoaanna apan tuwanganna wuṛṛu itambunna su putungnga.

¹³Wala'ewe anambon taumata apan marani wuṛṛu aroddi lai marau maaringikka inolaan-Ku wuṛṛu manga'u taṛṛino-U.”

¹⁴Manga taumata marosa su Sion mangngiladdu atata'utta. Unni mangitou, “Laṛṛawessu Ruata naal᷊ihidda putungnga apan lukkengngamma sarangkal᷊o'enge. Wotongngewe piaddu maataṛṛangnga sulal᷊ummu putungnga apan ma'apate udde?”

¹⁵I yamiu wotongnge maataṛṛangnga amungkangngu i yamiu mabbisara wuṛṛu inolaannu naṛṛino. Arie paddea'a auntunganna ringannu mannansara taumata asiangnga, wuṛṛu arie panengkamma roitta sasogokka. Arie pallaṛṛenggenna taumata apan manggol᷊agu pamamate wuṛṛu al᷊al᷊eo waine.

¹⁶Ne i yamiu sarun lal᷊u'aranna wuṛṛu amanna, ereola'u sulal᷊ummu tanda batu apan matohassa. Anna wuṛṛu ua'e uddete nasaddiate si yamiu.

¹⁷Sarun a'omanna tempone i yamiu maasilo sangkatou ratu apan mammarenta ringannu mawantuga su wanua apan uawatadda su ahewallu pi'une.

¹⁸Atata'unnu apan nal᷊iu su mallal᷊uṛṛu wose, tembonanne wuṛṛu mandariaga lo'a ete tumba'u nannaunganna.

¹⁹I yamiu tate lai maasilo manga taumata lo'a maṛṛagissa apan mabbisara sulal᷊ummu sasinaukka apan tawe asunnannu.

²⁰Pa'ellege soan Sion, tampan kite mallaghu manga andeangngu agama. Pa'ellege Yerusalem! Al᷊angngannawe eteapa tampa udde atanaanna, naal᷊ihidda rasanna apan tawe saran paassa niingkatta, pati'anna tawe saran paassa nisawutta wuṛṛu tal᷊ine tawe saran paassa nabbassutta.

²¹MAWU sarun mamasilon awawantu-Ge si ite. I ite sarun mabbiakka su winggin sal᷊ukka apan mal᷊oangnga, apan tawe apassenggotannu apallu seetta.

²²Al᷊awo'u saranapa su apalli mangitou tawe gunane; manga senggone tawe iaruitta! Anambon paa'alan tantaran seetta sarun aṛṛoanni ite, wuṛṛu saranapane tumanite manambo, na'oman sara taumata lome lai naasomba wageangnge. MAWU sassane sarun maola'a ratun kite; i Tou sarun mamarenta, maparisikku tita wuṛṛu manal᷊amatta si ite wuassu seetta.

²⁴Tawe saran sangkatou su wanuan kite apan sumal᷊iomanna ana waugu maradda'a, wuṛṛu anambon dosa sarun ampunganna.