Read Talaud YESAYA 36 Bible Online

YESAYA 36 - Talaud bible

YESAYA 36

¹Su tonna mapul᷊o appatta su pamamarentan Hizkia ratun Yehuda, manga soan Yehuda apan pia tandange watu nipangaloanna wuṛṛu niwaddon Sanherib, ratun Asyur.

²Wua'udde i tou nandolokku tembonannu tantara atanggaṛṛanne wuassu Lakhis watukku Yerusalem ringannu tantara apan manambo ipaddorongnga tadea'u i Ratu Hizkia manga'u mawaddo. I mangitou na'oma su soa udde wuṛṛu namile tampa su wawail᷊anna apan isassago Waillu Mabbawansalla, maranin hote apan pangleṛṛannu ua'e wuassu rano al᷊iu rosone.

³Wua'udde siri tallu mammanara Hizkia nirumanta naisasomban tembonannu tantaran Asyur udde. Siri tallu mamanara udde eteudde i Elyakim ana'i Hilkia tembonannu amonannu wal᷊en araratuanna, i Sebna mamamoṛṛettu araratuanna, wuṛṛu i Yoah ana'i Asaf, mamamoṛṛettu wal᷊en araratuanna.

⁴Perwira ara'e tembonannu tantaran Asyur udde nabbisara si mangitou, “Wal᷊oa'a si Hizkia wisaran datun Asyur indi, ‘Anio i'o mammendamma manungku watangannu matohassa?

⁵Su sunnanu tumba'u wisara wotongnge maapallol᷊ossa apande wuṛṛu auatannu tantara? Isaite pangunsandaṛṛannu na'oman sara i'o waṛṛani mando'appa Asyur?

⁶Atonna i'o uaantimma sasumbala Mesir, arawe udde nassul᷊ungngu mappaattu alun akke olaanna ta'inna; — sal᷊immurine ta'inna udde mapaddi wuṛṛu limanu ma'usu'a. Etearoddi ratun Mesir su anambon taumata apan uaantimma si tou.’ ”

⁷Wua'udde tembonannu tantaran Asyur udde nabbisara, “Ara'e asinungka i yamiu mabbisara manungku i yamiu uaantimma MAWU Ruatanu? Sutempo i Hizkia mammarenta tadea'u taumatan Yehuda wuṛṛu Yerusalem tumba'u mattaṛṛamawu su saruannu mezbah su Yerusalem, wal᷊inewe apan nihohakke udde mezbah wuṛṛu manga tampa passubbanna MAWU sassane?

⁸Orassa indi i ya'u ringannu arannu ratun Asyur waṛṛani mabbataṛṛu manungku amungkangngu i yamiu onggol᷊annu dua ṛiwu awal᷊o, ne i yamiu tawe taumata aroddi anambone apan maola'a sumasa'ene.

⁹Su ipando'appa tembonannu tantaran Asyur apan awawoanne lai i yamiu wal᷊ine parene. Arawe i yamiu mangngantimma lai Mesir mangirimmu sasumbala keretan pangalo wuṛṛu tantaran awal᷊o!

¹⁰I yamiu massunna i yami mamangalo wuṛṛu mamaddon banuanu ringannu tawe sumbala MAWU? Ete MAWU sassane apan nandolokki yami mamangalo wuṛṛu makkadda'a si yamiu.”

¹¹Wua'udde wisaran Elyakim, Sebna wuṛṛu Yoah su tembonannu tantaran Asyur udde, “Tuangnga, mabbisara sulal᷊ummu sasinaukku Aram ringanni yami, i yami ma'asunna. Arie mappaattu sasinaukku Ibrani, takka asunnannu tumanange roso su tanda'u soa udde.”

¹²Tembonannu tantaran Asyur udde sinumimbakka, “Apa tumba'u si yamiu wuṛṛu ratunu i ya'u nirolokka iapapasingkattu sarangkanambone indi? Ya'u lai mabbisara su tumana'u soa apan ua'ianna su tanda'u, apan suadio'a ringanni yamiu sarun umanna taine sassane wuṛṛu ma'inumma passul᷊iune sassane.”

¹³Wua'udde tembonnannu tantara atanggaṛṛanne ara'e perwira matangga udde dirumarisikka wuṛṛu nangintul᷊i sulal᷊ummu sasinaukku Ibrani, “Paddaringikka apa apan niwal᷊on datun Asyur,

¹⁴‘Imbaṛṛangnga awahianni Hizkia! I tou tawe maapanal᷊amatta si yamiu!

¹⁵Imbaṛṛangnga maddaringikka papal᷊ononne ipangantimma MAWU. Arie massunna manungku MAWU sarun manal᷊amatta si yamiu ara'e maningaddu tantaran Asyur mangaṛṛo soanu.

¹⁶Arie paddaringikka si Hizkia! I ya'u, ratun Asyur mandolokka tadea'u i yamiu sumabbangnga wuassu soanu wuṛṛu manantillen batangannu. Sal᷊immurine i yamiu wotongnge umanna wuan anggore wuassu wawail᷊annu sassane, wuṛṛu umanna wuan alu ara wuassu punnene sassane, see lai ma'inumma ua'e wuassu paṛṛihinu sassane,

¹⁷ma'oman sara i yamiu iingkatta su sambau wanua apan saṛṛene marani massulungngu wanuanu sassane. Poiaroddi pia baillu anggore apan mabbuan anggore hunan kamiu, wuṛṛu wawail᷊annu ganduma apan mangngonggollu taponna maola'a anni yamiu.

¹⁸Arie paddaringikka si Hizkia! I tou tumba'u mammahia si yamiu ringannu mabbisara manungku MAWU sarun manal᷊amatta si yamiu. Buattewe mongannu walahanna waine nanal᷊amatta wanuane wuassu taṛṛino'u?

¹⁹Suapate manga mongannu wanua Hamat wuṛṛu Arpad? Suapate manga mongannu Sefarwaim? Apa piaddu nanal᷊amatta Samaria?

²⁰Monganna suapa apan buatte namallossu wanuane wuassu taṛṛino'u? Tawe mariaddi MAWU manal᷊amatta Yerusalem!’ ”

²¹Naaringikka udde, tumana'u Yerusalem tawe sinumimbakka, ana waugu i Ratu Hizkia buatte namarenta tadea'u i mangitou al᷊annabba.

²²Ne i Elyakim, i Sebna wuṛṛu i Yoah nanggesa'a laungnge maola'a tatiala massusa, wua'udde inaite namasingkatta ratu sarangkanambone apan buatte niwisaran tembonannu tantaran Asyur udde.