Read Talaud YESAYA 37 Bible Online

YESAYA 37 - Talaud bible

YESAYA 37

¹Sutempo udde i Ratu Hizkia naaringikka aalae wuassu siri tallu taumata udde, i tou nanggesa'a laungnge wuṛṛu nalluṛṛen karongnga tatiala massusa, wua'udde i tou inaite su Wal᷊en MAWU.

²Wua'udde i tou nandolokki Elyakim tembonannu wal᷊en araratuanna, i Sebna mamamoṛṛettu araratuana wuṛṛu manga imam apan pia pangkanne inai maisasomba Nabi Yesaya, ana'i Amos. I mangitou lai nalluṛṛen karongnga.

³Eteindi tanatan Hizkia apan niwal᷊on mangitou si Yesaya, “Allo indi allon lullal᷊o; i ite niṛṛuumanna wuṛṛu nial᷊uandahanna. I ite naal᷊ihidda wawine apan mangunsiwete, arawe niasueannu ikkatta.

⁴Ratun Asyur buatte nandolokku tembonannu tantara atanggaṛṛanne niapaal᷊uandaga Ruata apan biakka. Isai masingkatta MAWU Ruata naaringikka a'al᷊uandaga udde wuṛṛu sarun makkuumanni mangitou apan nabbisara! Ana waugu udde aal᷊iomante su Ruata hunan manga taumatan kite apan ta'e wiakka.”

⁵Napawe naaringikka tanata wuassi Ratu Hizkia udde,

⁶i Yesaya nandolokku manga daroloṛṛanna udde iapawal᷊on sasimbakke indi, “MAWU nabbisara, i tuangnga ariete mata'utta maaringikka wisaran manga allangngu ratun Asyur udde manungku MAWU tawe maapallossi ite.

⁷MAWU sarun ma'ola'a ratun Asyur sarun maddarungikka watti'u anginna na'oman sara i tou mapul᷊e su wanuane sassane, wuṛṛu poiaroddi i tou sarun pateanna.”

⁸Tembonannu tantara atanggaṛṛannu Asyur udde naaringikka watti'a manungku ratune nanantangken Lakhis wuṛṛu tantal᷊anna uapapangalo mando'appa soan Libna, tawe marau wua isudde. Ne i tou inaite poiaroddi maisasomban ratune udde.

⁹Ratun Asyur naaringikke lai watti'a manungku tantaran Mesir su alungngu piaṛṛa'i Tirhaka wuassu Sudan tantal᷊anna inawarendi mamangalo si mangitou. Ana waugu udde, ratun Asyur nangirimmu suratta si Hizkia,

¹⁰ratun Yehuda. Arendi tingikku suratta udde, “Arie awahiannu pa'airen Duata apan pangunsandaṛṛannu udde manungku i'o sarun tawe manawo su lima'u.

¹¹I'o buatte naaringikka manungku suapan banua apan nipangaloannu manga ratun Asyur mangke niṛṛadda'a. Arie massunna manungku i'o wotongnge maatal᷊angnga.

¹²Sutempo udde al᷊amona'u nakkimunsa'a soan Gozan, Haran, wuṛṛu Rezef, see lai namate manga taumatan Eden apan uatana'a su Telasar, tawe saran sangkatou wuassu manga monganni mangitou nanal᷊amatta si mangitou.

¹³Suapate manga ratun soa Hamat, Arpad, Sefarwaim, Hena wuṛṛu Iwa?”

¹⁴Hizkia nanengkamma suratta udde wuassu manga daroloṛṛanna wuṛṛu nabbasate. Wua'udde i tou inaite su Wal᷊en MAWU wuṛṛu namilattu suratta udde su saruannu MAWU,

¹⁵ana see niumal᷊iomanna, wisarane,

¹⁶“MAWU Apan Lembontaṛṛino, Ruatan Israel, apan ua'ianna su aṛṛa'uannu Ruata, ete I'o Ruata tinggassa apan uataṛṛino al᷊awo'u araratuanna su wowon dunia indi. Ete I'o apan nandiaddi langitta wuṛṛu runia.

¹⁷MAWU, antimanna ellehewe apa apan nariaddi si yami. Daringiṛṛewe al᷊awo'u aal᷊uandagi Sanherib su saruan-Nu, Ruata apan biakka.

¹⁸I yami sarangkanambone masingkatta, MAWU, manungku manga ratun Asyur buatte namate manambo manga walahanna wuṛṛu nakkimunsa'a manga wanuan mangitou.

¹⁹Manga monganni mangitou lai nitutungnga wuṛṛu niṛṛimunsa'a, ana waugu atonna manga monganna udde tawe taṛṛinone. I mangitou tumba'u paal᷊uanna wuassu alu wuṛṛu manga watu apan nilanginnu taumata.

²⁰Oh, MAWU Ruatan kami, pallosaawe i yamiu wuassu manga taumatan Asyur udde, tadea'u al᷊awo'u walahanna su runia maasingkatta manungku tumba'u I'o MAWU.”

²¹Wua'udde i Yesaya nangirimmu tanata si Ratu Hizkia maola'a sambau sasimbakku aal᷊iomannu ratu,

²²MAWU nabbisara, “Soan Yerusalem lullage wuṛṛu mallobbossa si'o, Sanherib!

²³Masingkattawe i'o isai apan lallelannu wuṛṛu aal᷊uandahannu udde? I Ya'u, Ruatan Israel, Ruata apan na'ukkassa.

²⁴I'o nandolokku daroloṛṛanna iapatal᷊imoṛṛonganna manungku ringannu manambo keretan pangalonu, i'o buatte namaddon manga wowone matanggakka su Libanon. I'o mammunga manungku i'o buatte nanuwangnga manga punnu cemara apan atanggaṛṛanne wuṛṛu maṛṛamaga, lapiddu sinumuṛṛi su manga mahurangnge apan aappal᷊anne.

²⁵I'o lai mammunga manungku i'o na'al᷊i paṛṛihi wuṛṛu ma'inumma ua'e su manga wanua waine, wuṛṛu manungku tantaranu mangke makkinda Sal᷊ukku Nil na'oman sara namara.

²⁶Apa i'o taambe naaringikka manungku sarangkanambone udde buatte Ta'u niṛṛiinna ro'en dorone? Ne orassa indi Ya'u mappaamatta. Ete i Ya'u apan nangonggolla si'o taṛṛino ipakkimunsa'a manga soa pia tanda batune naola'a manga tuidda.

²⁷Manga taumata apan uatana'a poiaroddi naal᷊unganne; i mangitou niṛṛumindu'a wuṛṛu matta'utta. I mangitou naal᷊ihidda wal᷊abbukka su wadda'a ara'e wal᷊abbukka apan tinumuwo su atuppu wal᷊en, apan mamara napawe tiupannu anginna ra'i apan mal᷊oso.

²⁸Arawe i ya'u masingkattu al᷊awo'a su ola'u dirinu. I Ya'u masingkattu inolaannu wuṛṛu watukkuapa i'o umamatta. I Ya'u masingkatta manungku i'o tumaniten massa'u si Ya'u,

²⁹wuṛṛu i Ya'u naaringikke su ola'u asasa'unu wuṛṛu awawunganu udde. Orassa indi Ya'u mantaingngu pe'anna su ngirunnu wuṛṛu tal᷊i su moṛṛongngu, tadea'u i'o Ta'u wol᷊enganna mapul᷊e umamatta su lal᷊anna apan niamatannu sutempo nirumanta.”

³⁰Yesaya nangirimmu lai tanata indi si Hizkia, “Eteindi apan sarun maola'a tiala si'o. Tonna indi wuṛṛu tonna suhati taumata sarun umanna gandumma apan tinumuwo sassane. Arawe wua'udde i mangitou wotongnge massuannu gandumma wuṛṛu anggore lapiddu umanna wuane.

³¹Taumatan Yehuda apan ta'e wiakka sarun su lal᷊umanna'a ere sasuanna apan ṛamunne tumaniten mal᷊al᷊umma wuṛṛu mapasabbangu wuane.

³²Su Yerusalem wuṛṛu su puiddu wowon Sion sarun pia manga taumata apan nasal᷊amatta, ana waugu MAWU Apan Lembontaṛṛino buatte nanantunna manungku olangnge udde sarun matipussa.

³³Eteindi apan niwisara MAWU su ola'u ratun Asyur: ‘i Tou sarun tawe maasutta su Yerusalem ara'e mamiti'u anaanne watukku soa udde. Manga tantara apan pia allungnge taweddu mangundanin soa udde, wuṛṛu uapal᷊iwutta sarun tawe olaanna tampa pamangaloanna.

³⁴Ratun Asyur sarun mapul᷊e umamattu lal᷊anna apan niamatanne sutempo i tou nirumanta, ringannu tawe sumutta su soa udde. I Ya'u, MAWU, buatte nabbisara.

³⁵Soan Yerusalem sarun Ta'u itahekka wuṛṛu Ta'u lindumanna ana waugu awawantu-Ku sassane wuṛṛu ana waugu paaire-Ku ringannu allang-Ku i Daud.’ ”

³⁶Ṛabbi udde lai mala'ekattu MAWU nirumanta su paddasanannu taumatan Asyur wuṛṛu namate 185.000 su atoune tantara. Tiṛṛabbine marua allo manga winal᷊unanni mangitou uatal᷊eṛṛonga.

³⁷Ne sinumoṛṛotte i Sanherib, ratun Asyur, wuṛṛu napul᷊ete su Niniwe.

³⁸Su allo sambau, sutempo i tou tantal᷊anna mattaṛṛamawu sulal᷊ummu kuil Monganna Nisrokh, i tou nipaten hal᷊ele ṛattanganni Adramelekh wuṛṛu Sarezer, manga parinsine. Wua'udde i mangitou tinumal᷊angnga watukku Ararat. Ne Esarhadon, sinangianne, nabbal᷊i ratu nallol᷊ossa si tou.