Read Talaud YESAYA 39 Bible Online

YESAYA 39 - Talaud bible

YESAYA 39

¹Sutempo udde, ratun Babel, eteudde i Merodakh ana'i Baladan, naaringikka manungku i Ratu Hizkia wakkute napia wuassu radda'a. Ne i tou nandolokku taumata niapaapiddu suratta wuṛṛu aonggolla si Hizkia.

²I Hizkia nanal᷊oho manga daroloṛṛanna udde ringannu naungnga mal᷊uassa wuṛṛu namasilo si mangitou anambon pa'a'alane, eteudde wul᷊awanna wuṛṛu sal᷊a'a, manga rampa-rampa wuṛṛu lana mawangngi, wuṛṛu anambon ahiddu tantarane. Tawe saran sambau su wal᷊en araratuanna wuṛṛu su ahewallu araratuanne apan tawe nipasilone si mangitou.

³Wua'udde i Nabi Yesaya sinumaruanna si Ratu Hizkia wuṛṛu naiwal᷊o, “Wuassuapa manga taumata udde? Apa unni mangitou?” I Hizkia sinumimbakka, “I mangitou wuassu Babel, wanua apan marau.”

⁴“I mangitou ma'ellega apa indi su wal᷊en araratuanna?” aiwal᷊on Yesaya apia. “Sarangkanambone,” sasimbakki Hizkia. “Tawe sambau saranapa sulal᷊ummu paa'alan araratuanna apan tawe ta'u niapasilo si mangitou.”

⁵Wua'udde i Yesaya nabbisarate ratu, “MAWU Apan Lembontaṛṛino nabbisara,

⁶‘Sarun a'omanna tempone anambon pa'aala sulal᷊ummu wal᷊en araratuannu, wuṛṛu apan buatte niammullu al᷊amonanu naddatingngu allo indi, iapidda watukku Babel. Taweddu matantangnga.

⁷Wuassu ana'a pulunnu piaddu sarun iapidda wuṛṛu olaanna mammamanaran wal᷊en araratuanna mangngimbe ratun Babel.’ ”

⁸I Ratu Hizkia sinumimbakka, “Mapia lai tanata MAWU apan niapasingkannu si ya'u.” I tou sinumimbakka aroddi ana waugu naṛṛingidda, “Sawal᷊iate araratuangku sidutu mal᷊angnganna wuṛṛu su paddarame su al᷊o'engngu allo i ya'u mabbiakka.”