Read Talaud YESAYA 43 Bible Online

YESAYA 43 - Talaud bible

YESAYA 43

¹Israel, eteindi wisara MAWU, “Ete i Ya'u apan nandiaddi wuṛṛu na'ola'a si'o, arie pa'atautta, i'o sarun Ta'u iapasal᷊amatta! Ya'u buatte namaggo si'o ringannu arannu, i'o uddewe pussa'a-U.

²Napawe i'o mamare ua'e, i Ya'u sarun uaṛundinganna si'o, i'o tawe mawontolla sulal᷊ummu manga asasusanu. Napawe umamatta su putungnga, i'o tawe mal᷊oso, manga wawono'a mawakkatta tawe maasilaka si'o.

³Ana waugu ete i Ya'u MAWU, Ruatanu, Ruata na'ukkassu Israel, Mananal᷊amannu. Mesir Ta'u nionggolla maola'a tatubbussa si'o, Sudan wuṛṛu Syeba maola'a hahantinu.

⁴I'o maarega su mata-U, i Ya'u mangngareganu wuṛṛu marangngu si'o; ne i Ya'u nangonggollu taumata maola'a hahantinu, manga walahanna maola'a wawaekku niawanu.

⁵Imbaṛṛangnga mata'utta, ana waugu i Ya'u ual᷊u'adda si'o. Wuassu waṛṛatta wuṛṛu wuassu ra'i Ta'u irolokka ana'a pulunnu iaparanta ma'ammulla.

⁶I Ya'u namarenta sawannakka wuṛṛu timukka, tadea'u i mangitou mal᷊ihakka ipallossa. Wala'e manga anangngu esakka mawelengnga wuassu tampa marau, wuṛṛu manga anangngu wawine mapul᷊e wuassu manga pentakku runia.

⁷Ana waugu i mangitou sarangkanambone buatte niwagoannu ringannu arang-Ku, i mangitou Ta'u niriaddi iapawantuga si Ya'u.”

⁸Ruata nabbisara, “Doloṛṛa'e ararisiṛṛa'e su saruanna pabbawala-U apan buta, salaiwe i mangitou pia mata; apan bengella, salaiwe i mangitou pia tal᷊inga.

⁹Doloṛṛa'e anambon walahanna ma'ammulla wuṛṛu anambon ṛuanganna masemodda. Isaite suwallattu manga monganni mangitou buatte namasingkatta apa apan mariaddi orassa indi? Isaite suwallatti mangitou wotongnge maasi'attu tempo addantane? Wala'e manga tiala mangitou dumarisikka, wuṛṛu mapal᷊iatta'a manungku i mangitou naṛṛino, tadea'u sarangkanambone apan naaringikka si mangitou mabbisara, manungku atonna aroddi!

¹⁰Ei uma-U, ete i yamiu manga tiala-U, i yamiu Ta'u nipile maola'a manga allang-Ku, tadea'u masingka-U wuṛṛu mangngimanna si Ya'u, wuṛṛu maasunna manungku ete i Ya'u Ruata. I Ya'u Ruata Apan Tinggassa taweddu wal᷊ine ro'en al᷊amonane wuṛṛu piate i Ya'u.

¹¹I Ya'u sassane MAWU, baline i Ya'u tawedu maasal᷊amatta.

¹²I Ya'u buatte namasingkatta si'o, Ete i Ya'u apan nanal᷊amatta si yamiu, wuṛṛu wal᷊ine mawu awagananna suwallatti yamiu; ete i yamiu apan maola'a manga tiala-U. Wuṛṛu i Ya'u, i Ya'u indi Ruata,

¹³saran mal᷊annu-l᷊annu i Ya'u sidutu Ruata. Taweddu mal᷊iu wuassu taṛṛino-U, ara'e manal᷊are ṛiing-Ku.”

¹⁴MAWU mananal᷊amannu, Apan Na'ukkassa su Israel, nabbisara, “Ana waugu i yamiu, i Ya'u nandolokku tantara watukku Babel, wuṛṛu Ta'u nihohakka manga papal᷊e ngaran tuttupanna; manga hion taumatan Kasdim Ta'u niwal᷊u nabbal᷊i lal᷊uai.

¹⁵Ete i Ya'u MAWU, Ruatanu apan na'ukkassa, Ratunu, apan nandiaddi si'o, ei Israel!”

¹⁶MAWU buatte na'ola'a sambau lal᷊anna sumabbi tahal᷊oangnga, sumabbi ua'e apan matandi'a.

¹⁷I tou nandolokku tantara wuṛṛu manga piaṛṛangnge mapapangalo, wuṛṛu i mangitou inaite ringannu keretan awal᷊o. Arawe i mangitou nanawo, tate maararisikka apia, i mangitou nate naal᷊ihidda nanal᷊in sol᷊o apan nappaddumma.

¹⁸MAWU nabbisara, “Tawe gunane mannaungnga tempo nangkal᷊iu, tawe gunane tempo apan nal᷊iute.

¹⁹Panutukke, i Ya'u mallanginnu apa apan bakku; orassa indi mannantakke, i'o tawe maasilo? Ya'u sarun ma'ola'a lal᷊anna su wadda'u anne, wuṛṛu manga sal᷊ukka su wadda'a mal᷊alangnga.

²⁰Winatangnga matengnga sarun mamantuga si Ya'u; serigala wuṛṛu manu'a unta sarun maddalo si Ya'u ana waugu i Ya'u napa'elekku ua'e su wadda'u anne, wuṛṛu manga sal᷊ukka su wadda'a mal᷊alangnga tadea'u mapa'inummu umatta nipile-U.

²¹Ete i mangitou walahanna apan Ta'u niola'a wuassu watangang-Ku, tadea'u wotongnge magion daralo si Ya'u.”

²²MAWU nabbisara, “Arawe i'o Israel, tawe nassubba si Ya'u, wuṛṛu tate lai mattaṛṛamawu si Ya'u.

²³I'o tawe nangapiddu domba maola'a sasambanu itattambunna, tate mangaddatta si Ya'u ringannu sasambanu. Sumbal᷊i i Ya'u tawe nangonggollu winabbawa si'o su ola'u sasamba, ara'e napaasusanu ringannu maddea'a amania.

²⁴I'o tawe namalli dupa mawangngi huna-Ku, tawe napaal᷊ai-U ringannu tawa sasamba nipotonnu. Ewe'e i'o mawal᷊i'a nangonggollu winabbawa si Ya'u ringannu manga rosanu, napaasusa-U ringannu manga pasasal᷊anu.

²⁵Arawe i Ya'u Ruata apan namappassa rosanu, i Ya'u nangampungnga si'o ana waugu etearoddi apulu-U; i Ya'u tate mannaungnga rosanu.

²⁶Paanaungete i Ya'u, wette i ite inaite su mallaṛṛuunga, alaea'e hattonu tadea'u lumiatta'a manungku i'o ṛinone.

²⁷Iupungngu al᷊amonanu paarorone buatte na'ola'a rosa, manga piaṛṛangngu buatte namangalo si Ya'u,

²⁸manga imammu buatte nandal᷊eo Wal᷊e-U. Ne Israel Ta'u itantilla iapal᷊obbossa, papapulunni Yakub Ta'u iwala ṛaddaanna.”